Шимоли-ғарбий ҳарбий округда ҳарбий хизматчилар ўртасида киберспорт бўйича округ биринчилиги ўтказилди

Замонавий дунёда ахборот технологиялари ва рақамли тизимлар нафақат фуқаролик соҳасида, балки мудофаа тизимида ҳам ҳал қилувчи аҳамият касб этмоқда. Бугунги кун ҳарбий хизматчисидан нафақат жисмоний тайёргарлик, балки юксак интеллектуал салоҳият, тезкор стратегик фикрлаш ва замонавий технологик воситаларни мукаммал эгаллаш талаб этилади. Ана шу мақсадларни кўзлаган ҳолда, Шимоли-ғарбий ҳарбий округ тасарруфидаги қисм ва бўлинмалар ўртасида киберспорт мусобақасининг округ босқичи юқори савияда ташкил этилди.

Мазкур турнир шунчаки кўнгилочар ўйин сифатида эмас, балки ҳарбий хизматчиларнинг профессионал кўникмаларини виртуал муҳитда синовдан ўтказиш майдони сифатида ташкил этилди. Жамоавий ҳамкорлик ва ўзаро ишончни мустаҳкамлаш, стресс ва кучли руҳий босим остида тезкор ва тўғри қарор қабул қилиш қобилиятини ривожлантириш, виртуал жанговар ҳаракатлар орқали стратегик ва тактик фикрлашни чархлаш ҳамда замонавий ахборот технологияларидан фойдаланиш маданиятини юксалтириш мусобақанинг асосий вазифалари этиб белгиланди.

Округ босқичида қуйи босқичлардан саралаб олинган энг кучли 8 та жамоа иштирок этди. Беллашувлар киберспортнинг дунё миқёсида тан олинган тактик йўналишлари бўйича иккита мураккаб харитада бўлиб ўтди. Қуръа ташлаш натижасига кўра, жамоалар шартли равишда “Махсус кучлар” ва “Рақиб” томонларига бўлиниб, ўзаро куч синашдилар.

Мусобақа регламентига кўра, ҳар бир ўйин икки босқичда, жами 30 раунддан иборат бўлди. Ҳар бир томон 15 раунддан сўнг ролларни алмашган ҳолда ўз маҳоратини намойиш этди. Бу эса иштирокчилардан ҳам ҳужум, ҳам мудофаа тактикасини бирдек мукаммал эгаллашни талаб қилиши билан аҳамиятли бўлди.

Ўйин жараёнида жамоалар рақибнинг ҳаракатларини олдиндан прогноз қилиш, аниқ режалаштириш ва сониялар ичида вазиятга мослашиш орқали устунликка эришишга ҳаракат қилдилар. Ҳар бир раунддан сўнг командирлар ўз стратегиясини янгилаб, йўл қўйилган хатоларни таҳлил қилган ҳолда янги тактик схемаларни амалиётга татбиқ этдилар.

Беллашувлар давомида аниқландики, якка тартибдаги маҳоратдан кўра, мувофиқлаштирилган жамоавий ҳаракат ва бир-бирини сўзсиз тушуниш ғалабанинг асосий омили ҳисобланади. Ҳарбий хизматчилар виртуал майдонда ҳам худди ҳақиқий жанговар вазиятдагидек интизом ва жипсликни намойиш этдилар.

Мусобақа ташкилотчиларининг таъкидлашича, Киберспорт — бу шунчаки монитор қаршисидаги ўйин эмас, бу онг ва стратегиялар тўқнашувидир. Бу ерда ҳар бир сония аҳамиятга эга ва қабул қилинган битта қарор бутун бошли жамоа тақдирини ҳал қилиши мумкин.

Мусобақа якунида ғолиб ва фаол иштирокчилар округ қўмондонлиги томонидан муносиб тақдирландилар. Ташкилотчиларнинг таъкидлашича, бу каби тадбирлар ҳарбий хизматчиларнинг нафақат бўш вақтини мазмунли ташкил этиш, балки уларнинг интеллектуал ва технологик тайёргарлигини янги босқичга олиб чиқишда муҳим ўрин тутади.

Шимоли-ғарбий ҳарбий округда рақамли технологиялар ва инновацион ёндашувларни ҳарбий таълим ҳамда тарбия жараёнига татбиқ этиш ишлари изчил давом эттирилмоқда.