КЕКСАЛАРНИ ЭЪЗОЗЛАШ - ЭЗГУ ФАЗИЛАТ

Кексаларни эъзозлашдек муқаддас қадрият халқимизни жипслаштириш, одамлар орасида меҳр-оқибат ва ҳамжиҳатликни мустаҳкамлаш, турли миллат вакилларининг аҳил-иноқ яшашига хизмат қилиб келган. Катталарга ҳурмат, кичикларга иззат кўрсатиш улуғлангани боис, жаҳон аҳли бизга ҳавас билан қарайди.

Нуроний отахон ёки онахон  бор оилада файз-у барака, фаровонлик, аҳиллик бўлишини барчамиз биламиз. Уларнинг дуоси билан юртимиз обод, ҳаётимиз тинч, дастурхонимиз тўкин. Юртимизда азалдан кексаларга меҳр кўсатилиб келинган, мустақиллик шарофати туфайли уларнинг ҳурматини жойига қўйиш давлат сиёсати даражасига кўтарилди.

Истиқлол даврида йилларнинг номланишига эътибор қилсак, бу борада аввало оналар соғлигини мустаҳкамлаш, баркамол авлод тарбияси ва кексаларни эъзозлаш ҳар доим устувор вазифалар сифатида белгиланганига гувоҳ бўламиз.

Президентимиз ташаббуси билан 2015 йил "Кексаларни эъзозлаш йили” деб номланиши замирида ҳам инсон манфаати ётади.

Кексаларга бўлган ғамхўрлик ва эътиборни кучайтириш, ёши улуғ инсонларни давлат ва жамият томонидан ҳам моддий, ҳам маънавий жиҳатдан қўллаб-қувватлашга оид қатор меъёрий-ҳуқуқий ҳужжатлар қабул қилинган бўлиб, уларда белгиланган вазифаларнинг бажарилиши натижасида кексаларимизнинг яшаш шароити яхшиланиб, саломатлиги мустаҳкамланаяпти.

Ўзбекистон Республикаси Президентининг 2015 йил 18 февралдаги қарори билан "Кексаларни эъзозлаш йили” давлат дастури тасдиқланди. Мазкур дастурга кўра йил давомида кексаларнинг ҳаёт даражаси ва сифатини янада яхшилаш, уларни моддий ва маънавий қўллаб-қувватлаш кўламини кенгайтириш, ёши улуғ инсонлар, айниқса 1941-1945-йиллардаги иккинчи жаҳон уруши ва меҳнат фронти фахрийларига ижтимоий, пенсия таъминоти ва тиббий хизмат кўрсатишни такомиллаштириш, ёшларни ўзбек халқининг кўп асрлик қадрият ва анъаналари руҳида тарбиялашда кексаларнинг ўрнини мустаҳкамлаш кўзда тутилган.

Ушбу дастур доирасида кексаларни эъзозлаш, ўзаро ҳурмат ва меҳр-муҳаббат, юксак ахлоқий ва маънавий қадриятлар муҳитини шакллантириш, моддий ёрдам кўрсатиш, кекса ёшдаги отахон ва онахонларнинг рўзғор ташвишларини енгиллаштириш учун шарт-шароитларни яратиш, таълим-тарбия тизими ва спортнинг ролини кучайтириш, болалар, айниқса кексалар ўртасида жисмоний тарбия ва спортга меҳр уйғотиш бўйича аниқ чора-тадбирларни амалга ошириш, тадбиркорликни ривожлантириш бўйича маҳалла ва бошқа жамоат тузилмаларининг ролини ошириш, кам таъминланган оилаларга моддий ва маънавий ёрдам кўрсатиш масалаларига алоҳида эътибор қаратилган. Бу борада 2-сонли туман Давлат нотариал идораси ходимлари томонидан қатор ишлар амалга оширилмоқда. Жойларда уч авлод учрашувлари ташкил қилиниб, "Кексаларни эъзозлаш йили” давлат дастурининг мазмун-моҳиятини кенг жамоатчиликка тушунтириш  ишлари олиб борилмоқда. Бундан ташқари, нотариал идорада кекса отахон ва онахонларимизга навбатсиз, бепул маслаҳатлар бериш жорий қилинган.

Кексаларни эъзозлашдек инсонпарварлик замирида улкан маъно-мазмун мужассам. Зеро фарзандлар камоли – юрт қудратини, аёлларга муносабат - маданиятимиз даражасини, кексаларга ҳурмат ва эътибор эса маънавиятимиз истиқболини белгилайди. Зотан, нуронийлари бор элга қут-барака ёғилади, эл аро тинчлик, юртда фаровонлик бўлади.