ФЕРМЕРНИНГ ЭЗГУ НИЯТЛАРИ

Амударёлик Даврон Алланиязов бундан роппа-роса 10 йил аввал фермер хўжалигини ташкил этиш учун ҳаракат бошлаганида, кўпчилик унинг хўжалиги учун ажратилган ер майдонининг шароитларидан келиб чиқиб: "Бу ерларда деҳқончилик қилиш осон эмас, шароити оғир ерлар, кўп меҳнат талаб қилади", қабилида фикр билдиришган эди. Ҳақиқатан ҳам, туманнинг сув энг камчил бўладиган, ирригация тармоқлари жиддий таъмирга муҳтож ҳудудларидан бири ҳисобланган Амир Темур номли қишлоқ ерларида суғориш ишларини кўнгилдагидай ташкил этиш осон эмасди.

Шундай бўлса-да, Даврон Алланиязов ўз аҳдидан қайтмади, бутун вужуди билан олдига қўйган мақсадларини амалга оширишга киришди. Ишни энг аввало ўз хўжалиги учун ажратилган ер майдонларининг мелиоратив ҳолатини яхшилаш, сув йўлларини тозалаш ва қайта таъмирлашдан бошлади. Дастлабки йили ҳосилдорлиги паст деб ҳисобланган ерларда алмашлаб экишни йўлга қўйди, маҳаллий ўғит билан бойитиш чораларини кўрди. Айниқса, кузги шудгорлаш ишларини сифатли олиб боришга жиддий эътибор қаратди. Натижа эса кутилганидан зиёда бўлди. "Алланияз Нуржон" фермер хўжалиги қисқа фурсат ичида нафақат Амир Темур овулидаги, балки туман миқёсидаги илғор хўжаликлар сафидан жой олди.

Бугунги кунда "Алланияз Нуржон" фермер хўжалиги ерлари ҳудуддаги энг ҳосилдор ерлар ҳисобланади. Жорий деҳқончилик йилида 34 гектар ерга чигит эккан хўжалик деҳқонлари учун кузги йиғим-терим мавсуми ҳар қачонгидан ҳам баракали бўлди. Ҳосилдорлик ҳар гектар ҳисобига 44 центнерни ташкил этди. 150 тонналик пахта хирмони бунёд этилиб, шартномавий режа ошириб адо этилди.

Албатта, ҳар қандай ютуқнинг замирида йил бўйи қилинган фидойи меҳнат, қолаверса, юқори савияда ташкил этилган намунали шароит билан бирга ишчиларнинг моддий манфаатдорлиги муҳим аҳамият касб этади. Хўжаликда йиғим-терим мавсумини муваффақиятли ўтказиш мақсадида теримчилар, кўнгилли ҳашарчилар учун дала бошида иссиқ овқат ташкил этилиб, ишчиларнинг меҳнат ҳақлари шу куннинг ўзида, тарози бошида ҳисоб-китоб қилиб борилгани терим суръатини ошириш имконини берди.

Илғор теримчилардан Роза Камолова, Дилноза Дўсчонова, Муқаддас Вафоева, Гулнора Жабборберганова, Олтиной Отажонова, Муяссар Ибрагимова, Сафаржон Раҳимова, Амина Утамова, Умида Худойназаровалар кунига 120-150 килограммдан пахта териб, хўжаликнинг умумий хирмонига муносиб ҳисса қўшдилар. Фермер хўжалигининг шартномавий режасини ошириб адо этгани муносабати билан хўжалик раҳбари Даврон Алланиязов йиғим-терим ишларида фаол иштирок этган ишчилар ва кўнгилли ҳашарчиларга миннатдорлик билдириб, қимматбаҳо совғалар билан тақдирлади.

Айни пайтда эътибор ва рағбатдан руҳланган теримчилар далалардаги ҳосилни сўнгги мисқолигача йиғиб-териб олиш мақсадида янада уюшқоқлик ва ҳамжиҳатлик билан меҳнат қилишмоқда.

Фермер хўжалиги раҳбари Даврон Алланиязов. Режадан ташқари яна 25 тонна пахта топшириш ва умумий хирмонни 175 тоннага, ҳосилдорликни эса гектаридан 50 центнерга етказишни ният қилган. Фермер хўжалигининг жорий йилги пахтадан оладиган даромади 750 млн сўмни, соф фойда эса 350 млн сўмдан ортиқроқни ташкил этиши кутилмоқда.

Фермернинг келгусидаги режалари ҳам шунга яраша, яъни хўжалик ерларининг ҳосилдорлигини ошириш, ишчиларга муносиб меҳнат шароитларини яратиш, дала йўллари ва йўл бўйларини ободонлаштириш, манзарали ва мевали дарахт кўчатларини ўтқазиш, дала четларидан унумли фойдаланиш орқали мамлакат озиқ-овқат хавфсизлигини таъминлашга муносиб ҳисса қўшиш, шу билан бирга хўжалик тасарруфидаги техникалар ҳамда агрегатларни замон талаблари даражасида янгилаш ниятида.

Эзгу ниятлар — халқ манфаати йўлидаги жамики яхши ишларга рағбат, дейдилар. Биз Амир Темурлик фермер Даврон Алланиязовнинг эзгу ниятлари рўёбга чиқишига чин дилдан тилакдошмиз.

РОБИЯ ЙЎЛДОШЕВА.