Амударёда Янги йил шукуҳи: қувонч, эътибор ва эзгу ташаббуслар байрами кенг нишонланди
Янги йил — янгиланиш, эзгу ниятлар ва келажакка бўлган ишонч тимсоли. Ана шундай қувончли ва файзли кунлар арафасида Амударё туманида “Президент арчаси” байрам тадбири кўтаринки руҳда ўтказилди. Ушбу тантана нафақат жажжи болажонлар, балки бутун туманда Янги йил шукуҳини ҳис этиш, меҳр-оқибат ва эътибор муҳитини янада мустаҳкамлашга хизмат қилди.
Байрам тадбирида Амударё тумани ҳокими Собир Хўжаметов иштирок этиб, юртдошларимизни, айниқса келажагимиз эгалари бўлган болажонларни кириб келаётган Янги йил байрами билан самимий ва қизғин табриклади. Ўз табригида туман ҳокими Янги йил тинчлик, барака ва фаровонлик йили бўлишини, амалга оширилаётган ислоҳотлар ҳар бир хонадонда ўз самарасини беришини таъкидлади.
Байрам тадбири доирасида ҳоким томонидан болажонларга “Янги йил” муносабати билан “Президент совғалари” тантанали равишда топширилди. Жажжи юракларда қувонч, юзларда беғубор табассумлар пайдо бўлиб, ушбу лаҳзалар байрамнинг энг унутилмас онларидан бирига айланди. Болалар қувончи – давлатимиз олиб бораётган инсонпарвар сиёсатнинг ёрқин ифодасидир.
Тадбир “Янги йил эртаги” номли ранг-баранг саҳна кўринишлари билан давом этди. Жажжи болажонларнинг ажойиб чиқишлари, қувноқ рақслари, шеър ва қўшиқлари тадбир иштирокчиларига юқори байрамона кайфият улашди. Залда янграган қарсаклар, болаларнинг кулгуси Янги йил сеҳрини янада ҳис эттирди.
Байрам тадбири фақат қувонч ва томошалар билангина чекланиб қолмади. Унда муҳим ижтимоий ташаббуслар ҳам ўз ифодасини топди. Хусусан, Ўзбекистон Республикаси Вазирлар Маҳкамасининг 656-сонли қарорига асосан туман ҳокими томонидан 5 нафар ёшга Дўстлик маҳалласида жойлашган “Янги Ўзбекистон” массивида барпо этилган замонавий уй-жойларнинг калитлари тантанали равишда топширилди.
Бу воқеа Янги йил арафасида ёшлар учун энг катта ва қадрли совғалардан бири бўлди. Янги хонадон эгалари бўлган ёшларнинг чеҳрасидаги шодлик ва миннатдорлик мамлакатимизда ёшларга кўрсатилаётган ғамхўрлик ва эътиборнинг амалий натижаси эканини яна бир бор тасдиқлади. Туман ҳокими ёшларга мустаҳкам оила, фаровон ҳаёт ва ёруғ келажак тилакларини билдирди.
Амударёда ўтказилган Янги йил байрам тадбири — меҳр-оқибат, эътибор ва келажакка ишонч ғояларини ўзида мужассам этган тантана бўлди. Болалар қувончи, ёшларга яратилган имкониятлар ва байрамона кайфият уйғунлашган ушбу тадбир туманда Янги йилни кўтаринки руҳда қарши олишга мустаҳкам замин яратди.
Шубҳасиз, ана шундай эзгу ташаббуслар билан бошланган Янги йил Амударё туманида фаровонлик, барака ва янги ютуқларга бой йил бўлишига ишончни янада мустаҳкамлади.
Чарос Арслонова, туман ҳокимлигининг Ахборот хизмати раҳбари
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
