FERMERNING EZGU NIYaTLARI

Amudaryolik Davron Allaniyazov bundan roppa-rosa 10-yil avval fermer xoʻjaligini tashkil etish uchun harakat boshlaganida, koʻpchilik uning xoʻjaligi uchun ajratilgan yer maydonining sharoitlaridan kelib chiqib: "Bu yerlarda dehqonchilik qilish oson emas, sharoiti ogʻir yerlar, koʻp mehnat talab qiladi", qabilida fikr bildirishgan edi. Haqiqatan ham, tumanning suv eng kamchil boʻladigan, irrigatsiya tarmoqlari jiddiy taʼmirga muhtoj hududlaridan biri hisoblangan Amir Temur nomli qishloq yerlarida sugʻorish ishlarini koʻngildagiday tashkil etish oson emasdi.

Shunday boʻlsa-da, Davron Allaniyazov oʻz ahdidan qaytmadi, butun vujudi bilan oldiga qoʻygan maqsadlarini amalga oshirishga kirishdi. Ishni eng avvalo oʻz xoʻjaligi uchun ajratilgan yer maydonlarining meliorativ holatini yaxshilash, suv yoʻllarini tozalash va qayta taʼmirlashdan boshladi. Dastlabki yili hosildorligi past deb hisoblangan yerlarda almashlab ekishni yoʻlga qoʻydi, mahalliy oʻgʻit bilan boyitish choralarini koʻrdi. Ayniqsa, kuzgi shudgorlash ishlarini sifatli olib borishga jiddiy eʼtibor qaratdi. Natija esa kutilganidan ziyoda boʻldi. "Allaniyaz Nurjon" fermer xoʻjaligi qisqa fursat ichida nafaqat Amir Temur ovulidagi, balki tuman miqyosidagi ilgʻor xoʻjaliklar safidan joy oldi.

Bugungi kunda "Allaniyaz Nurjon" fermer xoʻjaligi yerlari hududdagi eng hosildor yerlar hisoblanadi. Joriy dehqonchilik yilida 34 gektar yerga chigit ekkan xoʻjalik dehqonlari uchun kuzgi yigʻim-terim mavsumi har qachongidan ham barakali boʻldi. Hosildorlik har gektar hisobiga 44 tsentnerni tashkil etdi. 150 tonnalik paxta xirmoni bunyod etilib, shartnomaviy reja oshirib ado etildi.

Albatta, har qanday yutuqning zamirida yil boʻyi qilingan fidoyi mehnat, qolaversa, yuqori saviyada tashkil etilgan namunali sharoit bilan birga ishchilarning moddiy manfaatdorligi muhim ahamiyat kasb etadi. Xoʻjalikda yigʻim-terim mavsumini muvaffaqiyatli oʻtkazish maqsadida terimchilar, koʻngilli hasharchilar uchun dala boshida issiq ovqat tashkil etilib, ishchilarning mehnat haqlari shu kunning oʻzida, tarozi boshida hisob-kitob qilib borilgani terim surʼatini oshirish imkonini berdi.

Ilgʻor terimchilardan Roza Kamolova, Dilnoza Doʻschonova, Muqaddas Vafoyeva, Gulnora Jabborberganova, Oltinoy Otajonova, Muyassar Ibragimova, Safarjon Rahimova, Amina Utamova, Umida Xudoynazarovalar kuniga 120-150 kilogrammdan paxta terib, xoʻjalikning umumiy xirmoniga munosib hissa qoʻshdilar. Fermer xoʻjaligining shartnomaviy rejasini oshirib ado etgani munosabati bilan xoʻjalik rahbari Davron Allaniyazov yigʻim-terim ishlarida faol ishtirok etgan ishchilar va koʻngilli hasharchilarga minnatdorlik bildirib, qimmatbaho sovgʻalar bilan taqdirladi.

Ayni paytda eʼtibor va ragʻbatdan ruhlangan terimchilar dalalardagi hosilni soʻnggi misqoligacha yigʻib-terib olish maqsadida yanada uyushqoqlik va hamjihatlik bilan mehnat qilishmoqda.

Fermer xoʻjaligi rahbari Davron Allaniyazov. Rejadan tashqari yana 25 tonna paxta topshirish va umumiy xirmonni 175 tonnaga, hosildorlikni esa gektaridan 50 tsentnerga yetkazishni niyat qilgan. Fermer xoʻjaligining joriy yilgi paxtadan oladigan daromadi 750 mln soʻmni, sof foyda esa 350 mln soʻmdan ortiqroqni tashkil etishi kutilmoqda.

Fermerning kelgusidagi rejalari ham shunga yarasha, yaʼni xoʻjalik yerlarining hosildorligini oshirish, ishchilarga munosib mehnat sharoitlarini yaratish, dala yoʻllari va yoʻl boʻylarini obodonlashtirish, manzarali va mevali daraxt koʻchatlarini oʻtqazish, dala chetlaridan unumli foydalanish orqali mamlakat oziq-ovqat xavfsizligini taʼminlashga munosib hissa qoʻshish, shu bilan birga xoʻjalik tasarrufidagi texnikalar hamda agregatlarni zamon talablari darajasida yangilash niyatida.

Ezgu niyatlar — xalq manfaati yoʻlidagi jamiki yaxshi ishlarga ragʻbat, deydilar. Biz Amir Temurlik fermer Davron Allaniyazovning ezgu niyatlari roʻyobga chiqishiga chin dildan tilakdoshmiz.

ROBIYa YOʻLDOShEVA.