ОНА ЕР, ОНА ТАБИАТ – БИЗ УЧУН МУҚАДДАС

Она Ер, она табиат биз инсонлар учун ҳамиша муқаддас ҳисобланади. Чунки она Ватанимиз бизни кўксида тутиб турган Ердан бошланади.

Туман табиатни муҳофаза қилиш бўлими томонидан муҳофаза қилинадиган табиий ҳудудлар харитаси тузилган бўлиб, булар ичида табиий сув манбаларидан оқилона фойдаланиш, уларнинг муҳофаза ҳудудларини тоза сақлаш ҳамда ободонлаштириш алоҳида муҳим аҳамият касб этади. Бундан ташқари, назоратдаги ҳудудларнинг атмосфера ҳавоси, ер ости ва ер усти табиий бойликлар заҳираларидан унумли фойдаланишга эришиш мақсадида йил давомида қилинадиган ишлар режаси тузилиб, зарур чора-тадбирлар ишлаб чиқилган. Унга кўра, 2015 йил бошидан Амударёнинг чап ва ўнг қирғоғидаги 500 метрлик муҳофаза ҳудудларига яқин жойда жойлашган фермер хўжаликлари раҳбарларига Табиатни муҳофаза қилиш борасидаги Ўзбекистон Республикаси Қонунларининг мазмун-моҳияти тушунтирилиб, қонунда кўрсатилган йўл-йўриқлар асосида иш олиб бориш топширилди.

Айниқса, Амударёнинг муҳофаза ҳудудида табиий равишда ҳосил бўлган тўқайзорларга эҳтиёткорона муносабатда бўлиш, таъқиқланган ҳавзаларда балиқ овланишига чек қўйиш, браконьерлик фаолияти билан шуғулланувчи шахсларга нисбатан қонуний чора кўришга эришилаётгани назоратдаги ҳудудларда биохилмахилликни сақлаш, ободонлаштириш ва кўкаламзорлаштириш ишларида муҳим аҳамият касб этмоқда.

Бундан ташқари, Манғит-Назархон ирригация тизими, туман Мелиорация бўлими, туман ва шаҳар сув тармоқлари идоралари билан ҳамкорликда олиб борилаётган ишлар ҳам яхши самара бермоқда. Яъни, барча йирик сув йўллари ҳамда сув олиш нуқталарининг техник паспортлари тайёрлангани боис, бу борадаги ечимини кутаётган муаммолар тўлиқ ҳал этилди.

Бизнинг фаолиятимизда назоратдаги ҳудудларда махсус режали текширувлар ўтказиш муҳим аҳамият касб этади. Жорий йилнинг ўтган даври мобайнида 10 дан ортиқ объектда режали текширувлар ўтказилиб, атроф-муҳит тозалиги, ободонлаштириш ва кўкаламзорлаштириш, атмосфера мусаффолиги, ер ва тупроқ экологияси ҳамда ичимлик, оқар сув манбалари билан боғлиқ муаммолар бартараф этилди. Туман ДСЭНМ, ветеринария бўлими, ОФЙ ва МФЙлар ҳузуридаги масъул комиссиялар ҳамкорлигида ўтказилган текширишлар ўзининг ижобий натижасини берди ҳамда назоратга олинган ҳудудларнинг ифлосланишига, табиат бой-ликларининг беҳуда исроф бўлишига йўл қўйган масъул мутахассислар жарима жазоси билан жазоланди. Биргина мисол, туман табиатни муҳофаза қилиш бўлими мутахассислари томонидан 36 та корхона ва ташкилотларга 8,3 миллион сўмликдан ортиқ компенсация тўловлари ҳисобланиб, ушбу тўловлар Қорақалпоғистон Республикаси Табиатни муҳофаза қилиш давлат қўмитасининг махсус жамғармасига ўтказилди. Ер, сув исрофгарчилиги, атмосфера ҳавосининг ифлосланиши, ҳар хил маиший чиқиндилар билан атроф-муҳитга етказган зарарлари учун 64 та ҳолат бўйича айбдорлардан туман прокуратураси билан ҳамкорликда жарималар ундириб олинди.

Назоратдаги ҳудудларда флора ва фаунанинг дахлсизлигини таъминлаш, ер, сув, табиий тўқайзорлар, улардаги ҳайвонот дунёсини янада бойитиш мақсадида Қорақалпоғистон Рес-публикаси Табиатни муҳофаза қилиш Давлат қўмитасининг туман бўлими томонидан олиб борилаётган ишлар ниҳоятда кенг қамровли бўлиб, узоқ келажакни кўзлаб олиб борилаётган барча тадбирларимизда ўрмон хўжалиги, туман тиббиёт бирлашмаси, туман халқ таълими тизимидаги ўқув масканлари, академик лицей,  коллежлар ҳамда овул ва маҳаллалар аҳли фаол иштирок этишаётгани қувонарлидир. Фақат Манғит – Назархон ирригация тизими бошқармаси билан ҳамкорликда баҳорги кўчат экиш мавсумида 46100 туп япон сафораси, 300 туп каштан, 364200 туп мевали ва манзарали дарахт кўчатлари, салкам 80 минг туп тез ўсувчи терак, 6,4 минг туп тут кўчатлари, фермер хўжаликлари томонидан эса 798 700 та терак ва қоратол қаламчалари экилгани халқимиз она табиатни асраш ва уни бойитиш учун қанчалар жонкуяр эканликларидан далолатдир.

Шуни унутмаслигимиз керакки, табиатни муҳофаза қилиш нафақат соҳа ходимларининг, балки ҳар биримизнинг бурчимиздир. Зотан, буюк меҳр-муҳаббат тимсоли – Она табиатга биз ҳам меҳр-муҳаббат кўрсатар эканмиз, бу эътиборимиз бизга янада чексиз меҳр, бойлик ва бахт-иқбол бўлиб қайтмоғини асло унутмайлик!

Шуҳрат БОЛТАБОЕВ,