Қисқа сатрларда

қишки суғориш ишлари авжида

Ўтган йилнинг кузида туманимиз бўйича 3000 гектар майдонга кузги буғдой экилиб, тўлиқ ниҳол олишга эришилган эди.

Айни кунда униб чиққан ниҳолларни парваришлаш ишларига алоҳида эътибор берилмоқда.

Суғориш ишларига фермер хўжаликларининг 600 нафар тажрибали сувчилари, шунингдек 317 нафар сув хўжалиги ташкилоти ходимлари ва 53 нафар сув истеъмолчилари уюшмалари ходимлари жалб этилган.

Қишки суғориш ишларини сифатли ташкил этиш мақсадида туман давлат солиқ инспекцияси ходимларидан 4 та гуруҳ тузилиб, улар суғориш ишларини доимий равишда назорат қилиб бормоқдалар.

Чорва қишлови беталофат ўтказилмоқда

2015 йил давомида туманимиздаги  чорвачиликка ихтисослашган фермер хўжаликлари ва агрофирмаларда жами 2481 бош қорамол боқилди ва чорва қишловига пухта тараддуд кўрилди.

Ўтган йили ушбу субъектларда режадаги 2729 тонна ўрнига 2737 тонна беда пичани, 6181 тонна ўрнига 6187,7 тонна силос, 2596 тонна ўрнига 2602 тонна сенаж ва 4560 тонна ўрнига 4570 тонна  ҳашаки лавлаги  жамғарилди.

Айни кунда бу субъектлардаги мавжуд қорамоллар тўқ ва соғлом боқилиб, чорва қишлови беталофат ўтказилмоқда.

Шўр ювиш ишлари қизғин

Жорий йилги мавсумда туманимизда 20526 гектармайдоннинг шўрини ювиш ва 16905 гектар майдонга нам суви бериш ишлари режалаштирилган.

Шўр ювиш ишларини ўз вақтида, сифатли олиб бориш мақсадида туманда 17 та суғориш отрядлари тузилиб, ҳар бир СИУда суғориш штаблари ташкил этилди.

Шу кунгача 20526 гектар майдонда биринчи ва 18411 гектармайдонда иккинчи шўр ювиш ишлари амалга оширилди.

САРҲАДЛАРИМИЗ ДАХЛСИЗЛИГИ ЙЎЛИДА

Юртимизда тинчлик ва осойишталикни асраш, фуқароларни янада хушёрликка чақириш ҳамда "Ўзбекистон Республикасининг Давлат чегараси тўғрисида”ги Қонун ва фуқароларнинг паспорт режимига риоя қилиш, диний экстремизм ва одам савдосига қарши курашиш масаласида чегара ҳудудларида жойлашган маҳаллаларда учрашувлар ўтказилмоқда.

Туманимизнинг чегара ҳудудларида жойлашган 9 та овул ва маҳаллаларда ўтказилган йиғилишларда таъкидланганидек, хавфсизликка таҳдид – у қандай кўринишда бўлмасин, мамлакат тинчлигига, барқарорлигига, ижтимоий-иқтисодий тараққиётига, инсон маънавиятига, саломатлигига ва ҳаётига, атроф-табиий муҳит тозалиги, мусаффо осмон софлигига катта хавф туғдиради. Шундай экан, ҳар қандай хавфнинг олдини олишга ҳисса қўшиш нафақат ҳуқуқни муҳофаза қилиш органларининг, балки ҳар биримизнинг бурчимиздир.

соғлом турмуш тарзи тарғиботи

22 январь куни Амударё академик лицейининг мажлислар хонасида "Оиладаги соғлом турмуш тарзи – она ва бола саломатлиги гаровидир” мавзусида Қорақалпоғистон Республикаси Хотин-қизлар қўмитасининг ижтимоий-сиёсий нашри – "Гулайым” газетаси таҳририятининг Ўзбекистон Республикаси Олий Мажлиси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган грант лойиҳаси доирасида семинар ўтказилди.

Лойиҳадан кўзланган мақсад – атроф-муҳитни муҳофаза қилишда, табиий ресруслардан оқилона фойдаланишда нодавлат нотижорат ташкилотларининг, матбуот ва оммавий ахборот воситаларининг ролини ошириш орқали аҳолининг, айниқса хотин-қизларнинг экологик ва тиббий маданиятини яхшилашга эришишдан иборат.

Семинарда туман тиббиёт бирлашмаси, давлат санитария-эпидемиология назорати маркази, фуқаролик ҳолати далолатномаларини ёзиш бўлими, табиатни муҳофаза қилиш қўмитаси ходимлари, нодавлат нотижорат ташкилотлари, фуқароларнинг ўзини-ўзи бошқариш органлари ва жамоат ташкилотлари раислари сўз олиб, кун тартибидаги масала бўйича фикр ва мулоҳазаларини билдирдилар.

Семинар сўнгида кун тартибидаги масала бўйича таклиф ва тавсиялар ишлаб чиқилди.