Аҳоли бандлигини таъминлаш ва камбағалликни қисқартириш масалалари юзасидан республика миқёсидаги семинар бўлиб ўтди

Бугунги кунда аҳолини камбағалликдан чиқариш, тадбиркорликни ривожлантириш орқали янги иш ўринларини яратиш, бандликни таъминлашга энг устувор вазифалар сифатида алоҳида эътибор қаратилиб, муҳтарам Президентимиз ташаббуси билан бу борада муҳим ислоҳотлар амалга оширилмоқда. Амударё туманида ташкил этилган республика миқёсидаги семинар ҳам айнан ушбу масалаларга бағишланди.

Туман ҳокимлигининг мажлислар залида ўтказилган семинарда Қорақалпоғистон Республикаси Вазирлар Кенгаши масъуллари, вазирликлар, республика ва туманлар миқёсидаги тегишли ташкилотлар раҳбарлари, шаҳар ва туманлар ҳокимларининг молия, иқтисодиёт ва камбағалликни қисқартириш масалалари бўйича биринчи ўринбосарлари иштирок этди. Ўзаро билим ва тажриба алмашиш мақсади кўзланган семинарда сўзга чиққанлар кун тартибидаги масалалар бўйича фикр-мулоҳазалар билдирдилар.

Семинарда сўзга чиққанлар томонидан ҳудудларда аҳоли турмуш шароитини яхшилаш, тадбиркорликни ривожлантириш, камбағалликни қисқартириш ва ижтимоий қўллаб-қувватлаш дастурларининг натижадорлигига эришиш мақсадида имзоланган Ўзбекистон Республикаси Президентининг “Камбағалликни қисқартириш ва аҳоли турмуш фаровонлигини ошириш борасидаги чора-тадбирларни янги босқичга олиб чиқиш тўғрисида”ги фармони бу борада муҳим дастуруламал бўлиб хизмат қилаётганини таъкидладилар.

Шунингдек, аҳоли бандлигини таъминлашда томорқалардан самарали фойдаланиш, уй шароитида деҳқончилик, ҳунармандчилик, чорвачилик, паррандачилик, тармоқа хўжалиги билан шуғулланишни ташкил этиш, ҳар бир ҳудуд учун мўлжалланган “драйвер” лойиҳаларни ишлаб чиқиш каби вазифалар хусусида сўз юритилди.

Семинар иштирокчилари туман ҳудудидаги овул ва маҳаллаларда томорқалардан самарали фойдаланиш, тадбиркорликни ривожлантириш ва камбағалликни қисқартириш борасида амалга оширилаётган ишлар билан танишдилар.

Дастлаб семинар иштирокчилари Бой овул маҳалласида тадбиркор Дониёр Жумамуратов томонидан уй шароитида ташкил этилган мебель ишлаб чиқариш цехи фаолияти билан танишдилар.

Кейинги манзил Беруний маҳалласида яшовчи ҳунарманд Инобат Хўжаниязованинг хонадони бўлди. Меҳмонлар оила бекаси томонидан уй шароитида ташкил қилинган ҳунармандчилик фаолияти билан яқиндан танишиб, унинг тажрибалари бошқа ҳудудларда ҳам оммалаштириш таклифини билдирдилар.

Шунингдек, семинар иштирокчилари Чойкўл овулида яшовчи фуқаро Давлатбой Бобожоновнинг томорқасидан самарали фойдаланиб, тўқсонбости усулида экинларни етиштириш борасида эришаётган натижалари билан танишиб, ўзларини қизиқтирган саволларга намунали томорқачидан жавоблар олдилар.

Навбатдаги манзил ҳам шу овулдаги илғор томорқачи Маҳмуд Норбоевнинг хонадони бўлди. Тадбир иштирокчилари хонадон эгасининг томорқасида ва деҳқон хўжалигида ташкил этган иссиқхоналари фаолияти билан танишдилар ҳамда қишнинг изғиринли кунларида иссиқхонада етиштирилаётган маҳсулотлар аҳоли дастурхонининг тўкинлиги ва бозорлардаги нарх-навонинг барқарорлигини таъминлашга ҳисса қўшишини эътироф этдилар.

Меҳмонлар шунингдек, чорвачилик ва паррандачилик тармоқларини янада ривожлантириш бўйича туманда амалга оширилаётган ишлар билан ҳам яқиндан танишиб, бу борада томорқа хўжаликларининг ҳиссаси алоҳида аҳамият касб этаётганини эътироф этдилар. Қангли овулида яшовчи Гулмон Сапаров томонидан уй шароитида ташкил этилган паррандачилик ва иссиқхона фаолияти бу ишларга яққол мисолдир.

Масъуллар тадбиркорлар, томорқачилар ҳамда ҳунармандлар билан суҳбатлар мобайнида ушбу тармоқларни янада ривожлантириш борасида яратилаётган янги имкониятлар хусусида сўз юритдилар ҳамда улардан унумли фойдаланиш юзасидан қатор тавсиялар бердилар.

Чарос Арслонова, туман ҳокимлигининг Ахборот хизмати раҳбари.