Томорқадан самарали фойдаланиш – камбағалликни қисқартириш ва бандликни таъминлаш омили

Томорқа – ҳар бир хонадон учун барака манбаи. Айниқса, озиқ-овқат хавфсизлигини таъминлаш, аҳолининг даромадини ошириш ҳамда ижтимоий муаммоларни бартараф этишда томорқачилик муҳим аҳамият касб этади. Бугунги кунда давлатимиз раҳбари ташаббуси билан томорқа ва ижара ерлардан самарали фойдаланишга алоҳида эътибор қаратилиб, томорқа эгаларини имтиёзли кредитлар, уруғлик ва кўчатлар, агротехник хизматлар ҳамда зарурий воситалар билан таъминлаш борасида қатор янги имкониятлар яратилмоқда.

Аҳолининг турмуш даражасини ошириш, камбағалликни қисқартириш ва бандликни таъминлаш давлат сиёсатининг устувор йўналишлари сифатида қаралиб, бу борада томорқачиликни ривожлантириш, мавжуд ер ресурсларидан самарали фойдаланиш муҳим аҳамият касб этмоқда.

Амударё туманидаги маҳаллаларда давлатимиз раҳбари томонидан жорий қилинган янги тизим асосида томорқа ва аҳоли томонидан ижарага олинган ерлардан самарали фойдаланиш, шу орқали оилалар даромадларини ошириш, камбағалликни қисқартириш ва бандликни таъминлаш масалаларига бағишланган семинар ташкил этилди.

Тўлқин овулидаги намунали томорқачи Азимжон Мухторов томорқасида ташкил этилган семинарда Қорақалпоғистон Вазирлар Кенгаши раисининг молия-иқтисодиёт ва камбағалликни қисқартириш масалалари бўйича биринчи ўринбосари — иқтисодиёт ва молия вазири Нуруллан Ерлепесов, Камбағалликни қисқартириш ва бандлик вазири Қуанишбай Азербаев, туман ҳокими Собир Хўжаметов, ҳоким ўринбосарлари, тегишли ташкилотлар раҳбарлари ҳамда 49 та “Маҳалла еттиликлари” масъуллари иштирок этдилар.

Семинарда сўзга чиққан масъуллар ҳар бир маҳаллани камбағалликдан ҳоли ҳудудга айлантириш, бандликни таъминлашда томорқалардан самарали фойдаланишини ташкил этиш энг асосий омил эканлигини, бунда маҳаллалар масъуллари ўзаро ҳамкорликдаги ишларни ташкил этишлари, ҳар бир ҳудудда намунали томорқачилар билан тажриба алмашиш мақсадида семинарлар ташкил этиш, ҳудудларга намунали томорқачиларни бириктириш лозимлиги хусусида сўз юритдилар.

Таъкидлаш жоизки, томорқадан унумли фойдаланиш, энг аввало, ишни тўғри режалаштиришдан бошланади. Ерни мақсадли тарзда ишлатиш, замонавий суғориш технологияларидан фойдаланиш, экин турларини илмий асосда танлаш орқали ҳам озгина ерда ҳам катта ҳосил олиш мумкин. Масалан, сабзавот, мева-чева, полиз маҳсулотлари ёки доривор ўсимликларни экиш орқали йил давомида бозорда талаб юқори бўлган маҳсулотлар етиштирилади. Бу эса, бир томондан, оила даромадини оширса, иккинчи томондан, ички бозорда нарх-наво барқарорлигига хизмат қилади. Томорқадан унумли фойдаланиш орқали ҳар бир хонадон ўз томорқасида доимий ёки мавсумий иш жойи яратиши мумкин. Айниқса, аёллар ва ёшлар учун томорқачилик орқали ўз бизнесини йўлга қўйиш имконияти очилади.

Тўлқинлик илғор томорқачи Азимжон Мухтаров мавжуд ер имкониятларидан оқилона фойдаланиб, томорқасида карам, 7 сотих иссиқхонасида помидор ва бодринг, булғор қалампири каби сабзавот маҳсулотлари ва турли кўчатларини етиштириб, 2 маротаба яхши ҳосил ва юқори даромад олиб келмоқда.

Семинар иштирокчилари томорқада ташкил этилган ишлар билан яқиндан танишдилар ҳамда ўзаро билим ва тажриба алмашдилар.

Чарос Арслонова, туман ҳокимлигининг Ахборот хизмати раҳбари.