9 май тонги ўйлари

Ҳур, озод Ватанда қанча яйрасак

Дилдан шукроналар айтишиб такрор.

Бугунги ҳаётга пойдевор қўйган,

Ота, боболарга ташаккур минг бор.

Яшасалар ҳамки дилларда мангу,

Ёд этиб турсак ҳам уларни ҳар дам.

Бугун бизлар учун алоҳида кун,

Руҳларин шод этмоқ учун бўлиб жам.

Қирғинбарот қилган башарни даҳшат,

Етмиш бир йил олдин топса-да якун.

Инсонлар қалбига етган жароҳат,

Азоб берар ҳамон, ҳаттоки бугун.

Аввал эса суриб зафар нашъасин,

Олдда муаммолар бўлса-да ҳали,

Қайтганлар дийдори ювиб ҳаммасин,

Кўп айро кўнгиллар топди тасалли.

Тўлдирган  эдилар бизни ғурурга,

Улуғ жангда зафар қучишиб қайтиб.

Худди улар билан бўлгандай бирга,

Юрдик ғалабанинг қўшиғин айтиб.

Мудҳиш фашизмнинг томирин қирқиб,

Пойдевор қўйганлар дунё эркига.

Вайрон мамлакатни обод этиш ҳам,

Тушган эди яна улар чекига.

Кўксида қўрғошин бўлаги билан,

Яна ким одимлаб қўлтиқтаёқда.

Ишлагани боис қисқа муддатда,

Вайрона мамлакат турди оёққа.

Бир ғишт қўйса бири янги бинога,

Битта кетмон урса кечаги аскар.

Яна бир ғишт – шаҳид дўстим учун деб,

Меҳнат қилдилар то тонгдан тун қадар.

Дўстлик-биродарлик воситасида

Бизларга яратиб турмуш осуда.

Ҳаётга ташрифнинг мақсадин оқлаб,

Кўп инсон ётибди мангу уйқуда.

Олдин имконият берувчи фурсат,

Умрга чегара қўяр бешафқат.

Ўтганлар руҳини шод этибгина,

Инсонийлик қарзин узармиз фақат.

Ҳаёт бўлганлари ҳурматда доим,

Уларни қўярмиз давра тўрида.

Чунки ҳар лаҳзани ғанимат билиб

Лозим эъзозламоқ имкон борида.

Лекин, эсиз, сиғмас ўтмиш "айпад”га,

Интернетга буткул жойлашмас тарих.

Аждодлар ибратин кўрсатмоқ учун,

Авлодларга керак неча муаррих.

Чунки урушларнинг солган кулфатин,

Билмаган ё билиб унутган каслар.

Турли низоларни яна янгидан,

Бошлаш ниятидан қайтган эмаслар.

Долғали дунёда кечаркан ҳаёт,

Бундай синовлар кўп ўтар орадан.

Бизга сезгир нигоҳ, ўткир онг лозим,

Ажратиб олиш-чун оқни қорадан.

Боболар минг хавфдан асрашиб омон,

Бизларга қолдирган азиз Ватанни.

Асрамоқ кўзимиз қорачиғидай,

Бурчимиз, бағишлаб жон ила танни.

Аҳмад НАФАСОВ.

(Фото - http://umid.zn.uz)