ЖАНГЛАРДА ТОБЛАНИБ, МЕҲНАТДА ЧИНИҚҚАН БОБО

ХIX асрнинг 60-йилларида дунёга келган Абдураҳмон махсум тадбиркор инсон бўлганлигидан ўз меҳнати орқасидан оиласини тўқ, фарзандларини меҳнатсевар ва билимдон қилиб тарбиялай олган, эл ичра ҳурматли инсон бўлганлар.

Халқини юракдан ардоқлаб, яхши кўрадиган Абдураҳмон махсумнинг абжир  ўғли Ўрозбой "мурт” (уни Манғит элатида барча шундай атарди) ҳам ота-боболари сингари бутун онгли ҳаётини азиз Ватани, халқи бахт-саодати йўлидаги фидойи меҳнат онларига бахш этиб яшади.

Ўтган асрнинг бошида, 1912 йилда дунёга келган Ўрозбой Абдураҳмон махсум ўғли инсоният бошига хавф солган Иккинчи жаҳон урушининг дастлабки кунлариданоқ кўнгиллилар сафида жангга кирди.

Ўрозбой 1941-1945 йилларда собиқ иттифоқ қўшинлари сафида фашизмга қарши аёвсиз жангларда иштирок этди. Россия қишининг 30-40 даражали совуқларида белигача қор кечиб, қон кечиб, минглаб чақирим йўлларни  яёв босиб, душманни то Берлин остонасигача қувиб борди. Уруш туфайли харобазорга айланган шаҳар ва қишлоқларни фашизм асоратидан  қутқаришдек қақшатқич жангларда иштирок этди. Ҳатто шундай жангларнинг бирида душман қўлига асир тушиб, азоб-уқубатлар чекди. Италян партизанлари сафига қўшилиб, яна қайтадан фашизмга қарши жангга кирди.

Ўрозбой Абдураҳмонов жанглардаги жасоратлари учун собиқ иттифоқ Олий Бош қўмондони томонидан бир неча жанговар орден ва медаллар билан тақдирланди. Жасур жангчи ғалабадан сўнг она Ватанига қайтгач, ўз билимини ошириш учун интилди. Қишлоқ хўжалик техникумида ҳосилот (агроном) мутахассислиги бўйича таҳсил олди. У дастлаб Қипчоқ туманидаги колхозлардан бирига раис, кейинчалик МТСда агроном, Қипчоқ туман қишлоқ хўжалик бўлимида катта агроном, 5-овул Кенгашида раис лавозимларида фаолият юритди. 1953-1954 йилларда  у Манғит пахта тозалаш заводи тажриба хўжалигида ҳосилот (агроном) вазифасида хизмат қилди. 1954-1962 йилларда туман гўшт маҳсулотлари тайёрлаш идораси тасарруфидаги ферма мудири сифатида сидқидилдан халққа хизмат қилди. 1962 йилда Ўрозбой Абдураҳмоновнинг шахсий ташаббуси билан Манғит шаҳри марказида полиз ва сабзавот маҳсулотлари билан савдо қилувчи илк дўкон-маркет ташкил этилди. Бу дўкон-маркет шаҳарликларга жуда катта қулайликлар яратди.

Азизлар, инсон – азиз, унинг хотираси – муқаддас. Тириклигидаги эзгу амаллари билан халқ дилида номи улуғланиб келаётган инсонларни ёдга олиш, уларнинг яхшиликларини эслаш, дилимизда миннатдорлик туйғулари ила руҳи-покларига тиловатлар қилиш – биз тирикларнинг бурчимиздир. Аму элимизнинг  бугунги бахтиёр кунлари учун фидойилик қилиб яшаган инсонлардан бири Ўрозбой бобо Абдураҳмоновнинг  хотираси ҳам ҳар биримиз учун азиздир.

                                                           Робия ЙЎЛДОШЕВА.

                                                                                                                (Фото - http://fikr.uz)