JANGLARDA TOBLANIB, MEHNATDA ChINIQQAN BOBO

XIX asrning 60-yillarida dunyoga kelgan Abdurahmon maxsum tadbirkor inson boʻlganligidan oʻz mehnati orqasidan oilasini toʻq, farzandlarini mehnatsevar va bilimdon qilib tarbiyalay olgan, el ichra hurmatli inson boʻlganlar.

Xalqini yurakdan ardoqlab, yaxshi koʻradigan Abdurahmon maxsumning abjir  oʻgʻli Oʻrozboy "murt” (uni Mangʻit elatida barcha shunday atardi) ham ota-bobolari singari butun ongli hayotini aziz Vatani, xalqi baxt-saodati yoʻlidagi fidoyi mehnat onlariga baxsh etib yashadi.

Oʻtgan asrning boshida, 1912-yilda dunyoga kelgan Oʻrozboy Abdurahmon maxsum oʻgʻli insoniyat boshiga xavf solgan Ikkinchi jahon urushining dastlabki kunlaridanoq koʻngillilar safida jangga kirdi.

Oʻrozboy 1941-1945-yillarda sobiq ittifoq qoʻshinlari safida fashizmga qarshi ayovsiz janglarda ishtirok etdi. Rossiya qishining 30-40 darajali sovuqlarida beligacha qor kechib, qon kechib, minglab chaqirim yoʻllarni  yayov bosib, dushmanni to Berlin ostonasigacha quvib bordi. Urush tufayli xarobazorga aylangan shahar va qishloqlarni fashizm asoratidan  qutqarishdek qaqshatqich janglarda ishtirok etdi. Hatto shunday janglarning birida dushman qoʻliga asir tushib, azob-uqubatlar chekdi. Italyan partizanlari safiga qoʻshilib, yana qaytadan fashizmga qarshi jangga kirdi.

Oʻrozboy Abdurahmonov janglardagi jasoratlari uchun sobiq ittifoq Oliy Bosh qoʻmondoni tomonidan bir necha jangovar orden va medallar bilan taqdirlandi. Jasur jangchi gʻalabadan soʻng ona Vataniga qaytgach, oʻz bilimini oshirish uchun intildi. Qishloq xoʻjalik texnikumida hosilot (agronom) mutaxassisligi boʻyicha tahsil oldi. U dastlab Qipchoq tumanidagi kolxozlardan biriga rais, keyinchalik MTSda agronom, Qipchoq tuman qishloq xoʻjalik boʻlimida katta agronom, 5-ovul Kengashida rais lavozimlarida faoliyat yuritdi. 1953-1954-yillarda  u Mangʻit paxta tozalash zavodi tajriba xoʻjaligida hosilot (agronom) vazifasida xizmat qildi. 1954-1962-yillarda tuman goʻsht mahsulotlari tayyorlash idorasi tasarrufidagi ferma mudiri sifatida sidqidildan xalqqa xizmat qildi. 1962-yilda Oʻrozboy Abdurahmonovning shaxsiy tashabbusi bilan Mangʻit shahri markazida poliz va sabzavot mahsulotlari bilan savdo qiluvchi ilk doʻkon-market tashkil etildi. Bu doʻkon-market shaharliklarga juda katta qulayliklar yaratdi.

Azizlar, inson – aziz, uning xotirasi – muqaddas. Tirikligidagi ezgu amallari bilan xalq dilida nomi ulugʻlanib kelayotgan insonlarni yodga olish, ularning yaxshiliklarini eslash, dilimizda minnatdorlik tuygʻulari ila ruhi-poklariga tilovatlar qilish – biz tiriklarning burchimizdir. Amu elimizning  bugungi baxtiyor kunlari uchun fidoyilik qilib yashagan insonlardan biri Oʻrozboy bobo Abdurahmonovning  xotirasi ham har birimiz uchun azizdir.

                                                           Robiya YOʻLDOShEVA.

                                                                                                                (Foto - http://fikr.uz)