“Yusuf Eshon bobo” jome masjidida maxsus-taktik oʻquv mashqlari oʻtkazildi
Xalqimizning asriy qadriyatlari, mehr-oqibat va saxovat ramzi boʻlgan muqaddas Ramazon oyi yurtimizda oʻzgacha tadorik bilan kutib olinmoqda. Ushbu fazilatli oyni tinch va osoyishta, koʻtarinki ruhda oʻtkazish, ramazon oyi davomida oʻqiladigan taroveh namozlari vaqtida masjidlarga tashrif buyuruvchi aholining xavfsizligini har tomonlama taʼminlash huquqni muhofaza qiluvchi organlar va favqulodda vaziyatlar boʻlimlari oldida turgan eng dolzarb vazifalardan biridir.
Ayniqsa, odamlar gavjum toʻplanadigan jamoat joylari, ziyoratgohlar va masjidlarda xavfsizlik choralarini kuchaytirish, yuzaga kelishi mumkin boʻlgan har qanday koʻngilsiz hodisalarning oldini olish maqsadida joylarda profilaktik tadbirlar va amaliy oʻquv mashgʻulotlari tashkil etilmoqda. Amudaryo tumanida oʻtkazilgan koʻrgazmali maxsus-taktik oʻquv mashqi ham ana shunday muhim tadbirlardan biri boʻldi.
Tumanning Boy ovul mahallasi hududida joylashgan “Yusuf Eshon bobo” jome masjidida Amudaryo tumani Favqulodda vaziyatlar boʻlimi tashabbusi bilan tegishli xizmatlar hamkorligida yongʻin xavfsizligi va favqulodda vaziyatlarda harakat qilish boʻyicha amaliy mashgʻulot tashkil etildi.
Mazkur tadbirda tuman Favqulodda vaziyatlar boʻlimi qutqaruvchilari, Ichki ishlar boʻlimi xodimlari, Tibbiyot birlashmasining tez yordam brigadalari hamda kommunal xizmat koʻrsatish sohasi vakillari ishtirok etib, oʻzaro hamkorlikdagi harakatlarni sinovdan oʻtkazdilar. Mashgʻulot stsenariysiga koʻra, masjid binosida shartli ravishda yongʻin sodir boʻlganligi haqida xabar kelib tushdi. Xabar olingan zahoti voqea joyiga shartli signal asosida maxsus texnikalar va tezkor guruhlar zudlik bilan yetib keldi.
Mashq davomida birinchi navbatda inson hayotini saqlab qolishga eʼtibor qaratildi. Qutqaruvchilar tomonidan masjid ichida qolib ketgan fuqarolarni xavfsiz hududga evakuatsiya qilish, jabrlanganlarga birinchi tez tibbiy yordam koʻrsatish va ularni shifoxonaga joʻnatish jarayonlari amalda koʻrsatib berildi. Shu bilan birga, yongʻin oʻchirish ekipajlari tomonidan shartli yongʻin oʻchogʻi qisqa muddatda oʻrab olinib, bartaraf etildi.
Tadbirning yana bir muhim jihati jamoat tartibini saqlash bilan bogʻliq boʻldi. Ichki ishlar organlari va Milliy gvardiya xodimlari tomonidan mashgʻulot davomida yuzaga kelgan vaziyatdan foydalanib, jamoat tartibini buzuvchi shaxslarni aniqlash, ularni zararsizlantirish va hududda xavfsizlikni taʼminlash boʻyicha tezkor harakatlar amalga oshirildi. Bu esa binoda nafaqat yongʻin, balki turli tartibsizliklar kelib chiqishining oldini olishga ham tayyorgarlik koʻrilayotganidan dalolat beradi.
Oʻquv mashgʻuloti yakunida barcha xizmatlarning harakatlari tahlil qilindi. Yoʻl qoʻyilgan ayrim kamchiliklar koʻrsatilib, kelgusida favqulodda vaziyatlarda yanada tezkor va uygʻun harakat qilish boʻyicha zarur tavsiyalar berildi. Tashkilotchilar tomonidan mashqning faol ishtirokchilariga, oʻz vazifasini sidqidildan bajargan xodimlarga minnatdorlik bildirildi.
Xulosa oʻrnida aytish mumkinki, Amudaryo tumanida oʻtkazilgan ushbu taktik oʻquv mashqi Ramazon oyini tinch va osoyishta oʻtkazish, yurtdoshlarimizning ibodatlarini emin-erkin ado etishlari uchun xavfsiz muhit yaratish yoʻlidagi muhim qadam boʻldi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
