“Юсуф Эшон бобо” жоме масжидида махсус-тактик ўқув машқлари ўтказилди

Халқимизнинг асрий қадриятлари, меҳр-оқибат ва саховат рамзи бўлган муқаддас Рамазон ойи юртимизда ўзгача тадорик билан кутиб олинмоқда. Ушбу фазилатли ойни тинч ва осойишта, кўтаринки руҳда ўтказиш, рамазон ойи давомида ўқиладиган таровеҳ намозлари вақтида масжидларга ташриф буюрувчи аҳолининг хавфсизлигини ҳар томонлама таъминлаш ҳуқуқни муҳофаза қилувчи органлар ва фавқулодда вазиятлар бўлимлари олдида турган энг долзарб вазифалардан биридир.

Айниқса, одамлар гавжум тўпланадиган жамоат жойлари, зиёратгоҳлар ва масжидларда хавфсизлик чораларини кучайтириш, юзага келиши мумкин бўлган ҳар қандай кўнгилсиз ҳодисаларнинг олдини олиш мақсадида жойларда профилактик тадбирлар ва амалий ўқув машғулотлари ташкил этилмоқда. Амударё туманида ўтказилган кўргазмали махсус-тактик ўқув машқи ҳам ана шундай муҳим тадбирлардан бири бўлди.

Туманнинг Бой овул маҳалласи ҳудудида жойлашган “Юсуф Эшон бобо” жоме масжидида Амударё тумани Фавқулодда вазиятлар бўлими ташаббуси билан тегишли хизматлар ҳамкорлигида ёнғин хавфсизлиги ва фавқулодда вазиятларда ҳаракат қилиш бўйича амалий машғулот ташкил этилди.

Мазкур тадбирда туман Фавқулодда вазиятлар бўлими қутқарувчилари, Ички ишлар бўлими ходимлари, Тиббиёт бирлашмасининг тез ёрдам бригадалари ҳамда коммунал хизмат кўрсатиш соҳаси вакиллари иштирок этиб, ўзаро ҳамкорликдаги ҳаракатларни синовдан ўтказдилар. Машғулот сценарийсига кўра, масжид биносида шартли равишда ёнғин содир бўлганлиги ҳақида хабар келиб тушди. Хабар олинган заҳоти воқеа жойига шартли сигнал асосида махсус техникалар ва тезкор гуруҳлар зудлик билан етиб келди.

Машқ давомида биринчи навбатда инсон ҳаётини сақлаб қолишга эътибор қаратилди. Қутқарувчилар томонидан масжид ичида қолиб кетган фуқароларни хавфсиз ҳудудга эвакуация қилиш, жабрланганларга биринчи тез тиббий ёрдам кўрсатиш ва уларни шифохонага жўнатиш жараёнлари амалда кўрсатиб берилди. Шу билан бирга, ёнғин ўчириш экипажлари томонидан шартли ёнғин ўчоғи қисқа муддатда ўраб олиниб, бартараф этилди.

Тадбирнинг яна бир муҳим жиҳати жамоат тартибини сақлаш билан боғлиқ бўлди. Ички ишлар органлари ва Миллий гвардия ходимлари томонидан машғулот давомида юзага келган вазиятдан фойдаланиб, жамоат тартибини бузувчи шахсларни аниқлаш, уларни зарарсизлантириш ва ҳудудда хавфсизликни таъминлаш бўйича тезкор ҳаракатлар амалга оширилди. Бу эса бинода нафақат ёнғин, балки турли тартибсизликлар келиб чиқишининг олдини олишга ҳам тайёргарлик кўрилаётганидан далолат беради.

Ўқув машғулоти якунида барча хизматларнинг ҳаракатлари таҳлил қилинди. Йўл қўйилган айрим камчиликлар кўрсатилиб, келгусида фавқулодда вазиятларда янада тезкор ва уйғун ҳаракат қилиш бўйича зарур тавсиялар берилди. Ташкилотчилар томонидан машқнинг фаол иштирокчиларига, ўз вазифасини сидқидилдан бажарган ходимларга миннатдорлик билдирилди.

Хулоса ўрнида айтиш мумкинки, Амударё туманида ўтказилган ушбу тактик ўқув машқи Рамазон ойини тинч ва осойишта ўтказиш, юртдошларимизнинг ибодатларини эмин-эркин адо этишлари учун хавфсиз муҳит яратиш йўлидаги муҳим қадам бўлди.