ОЗОД ЮРТГА ОБОД КЎЧАЛАР ЯРАШАДИ
Вақт ўтгани сари энг улуғ ва энг азиз айём – мамлакатимиз мустақиллигининг 25 йиллик байрами тобора яқинлашмоқда. Юртимизнинг барча гўшаларида истиқлол айёмини муносиб тарзда қарши олишга ва уюшқоқлик билан, кўтаринки руҳда ўтказишга пухта тараддуд кўрилмоқда.
Халқимиз азал-азалдан катта байрамлар, тўю маъракалар олдидан ўз уйини, ўзи истиқомат қилаётган гўшани саранжом-саришта ҳолга келтириш, кўрк-у чиройини очишдек эзгу ишларга одатланган.
Қорақалпоғистон Республикаси Вазирлар Кенгашининг 2016 йил 16 май кунги "Ўзбекистон Республикаси Мустақиллигининг 25 йиллигига бағишлаб, Қорақалпоғистон Республикаси шаҳар ва туманларида 25 тадан кўчаларни реконструкция қилиш, лойиҳалаштириш, қуриш ҳамда таъмирлаш ишларини ташкил этиш чора-тадбирлари тўғрисида”ги 130-сонли қарори ва шу қарор асосида 2016 йил 27 май куни туман ҳокимининг 289-сонли қарори қабул қилинди.
Мазкур вазифаларни амалга ошириш ишларини назорат қилиб бориш мақсадида ишчи гуруҳ тузилиб, ишчи гуруҳга шаҳар, туман ва қишлоқларда кўчаларни замонавий меъморчилик ва шаҳарсозлик талаблари асосида лойиҳалаштириш, қуриш ҳамда таъмирлаш, маҳаллалар ҳудудида санитария тозалигини таъминлаш, ободонлаштириш ишларини ташкил этиш, бу борада амалга оширилаётган ишларни зарурат бўлганда ўрганиш, қолоқликка ва камчиликларга йўл қўйган ҳудудларда тезкор чоралар кўриш каби вазифалар топширилди ва чора-тадбирлар дастури тасдиқланди.
Чора-тадбирлар дастурида кўчалар ёқасида жойлашган турар ва нотурар жой объектларини таъмирлаш, ноқонуний қурилишларни бартараф қилиш, ҳудудларда санитария ҳолатларини яхшилаш, ёнғин хавфсизлигини таъминлаш, кўчаларнинг транспорт қатнови қисмларини ҳамда кўчалар бўйидаги йўлакларни, мавжуд коммуникация тармоқларини таъмирлаш, ҳудудларда гулзорлар, болалар ўйингоҳларини ва спорт майдончаларини ташкил этиш каби ишларни амалга ошириш режалаштирилган.
Туман ҳокимининг қарорига асосан реконструкция ва ободонлаштириш ишлари олиб бориладиган 25 та кўчалар белгилаб олиниб, ушбу кўчаларга масъуллар бириктирилди.
Айни кунларда мазкур кўчаларда кенг кўламли ободонлаштириш ва бунёдкорлик ишлари қизғин давом этмоқда. Айниқса, туманимизнинг Гурлан, Маданият, Самарқанд, Баркамол авлод каби кўчалари ушбу кўчалар аҳолиси ва бириктирилган масъулларнинг саъй-ҳаракатлари боис, янгича қиёфа касб этмоқда.
Халқимизда "Ободлик кўнгилдан бошланади”, деган ҳикматли ибора бор. Ҳақиқатдан ҳам, кўнгли, қалби обод инсон ўзи яшайдиган ҳудуднинг озодалигига ҳам катта эътибор билан қарайди, атрофидагиларни ҳам покликка, озодаликка ундайди. Шундай экан, азиз юртдошлар, келинг, мустақиллигимизнинг қутлуғ 25 йиллик тўйини чор-атрофимизни обод ва саранжом-саришта қилган ҳолда кутиб олайлик! Туманимиздаги овул ва маҳаллалар аҳли, мулкчилик шаклидан қатъий назар, барча корхона, ташкилот ва муассасалар, таълим масканлари жамоалари, кекса-ю ёш ўзимиз истиқомат қилаётган ҳудуддаги барча гўшаларни тартибга келтириш, тозалаш, ободонлаштириш, кўкаламзорлаштириш тадбирларида онгли равишда, чин кўнгилдан, фаол иштирок этиб, маҳалламизнинг, юртимизнинг янада обод бўлишига ҳисса қўшайлик!
Санжар МУРОДОВ,
туман бош меъмори.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
