OZOD YuRTGA OBOD KOʻChALAR YaRAShADI
Vaqt oʻtgani sari eng ulugʻ va eng aziz ayyom – mamlakatimiz mustaqilligining 25 yillik bayrami tobora yaqinlashmoqda. Yurtimizning barcha goʻshalarida istiqlol ayyomini munosib tarzda qarshi olishga va uyushqoqlik bilan, koʻtarinki ruhda oʻtkazishga puxta taraddud koʻrilmoqda.
Xalqimiz azal-azaldan katta bayramlar, toʻyu maʼrakalar oldidan oʻz uyini, oʻzi istiqomat qilayotgan goʻshani saranjom-sarishta holga keltirish, koʻrk-u chiroyini ochishdek ezgu ishlarga odatlangan.
Qoraqalpogʻiston Respublikasi Vazirlar Kengashining 2016-yil 16-may kungi "Oʻzbekiston Respublikasi Mustaqilligining 25 yilligiga bagʻishlab, Qoraqalpogʻiston Respublikasi shahar va tumanlarida 25 tadan koʻchalarni rekonstruktsiya qilish, loyihalashtirish, qurish hamda taʼmirlash ishlarini tashkil etish chora-tadbirlari toʻgʻrisida”gi 130-sonli qarori va shu qaror asosida 2016-yil 27-may kuni tuman hokimining 289-sonli qarori qabul qilindi.
Mazkur vazifalarni amalga oshirish ishlarini nazorat qilib borish maqsadida ishchi guruh tuzilib, ishchi guruhga shahar, tuman va qishloqlarda koʻchalarni zamonaviy meʼmorchilik va shaharsozlik talablari asosida loyihalashtirish, qurish hamda taʼmirlash, mahallalar hududida sanitariya tozaligini taʼminlash, obodonlashtirish ishlarini tashkil etish, bu borada amalga oshirilayotgan ishlarni zarurat boʻlganda oʻrganish, qoloqlikka va kamchiliklarga yoʻl qoʻygan hududlarda tezkor choralar koʻrish kabi vazifalar topshirildi va chora-tadbirlar dasturi tasdiqlandi.
Chora-tadbirlar dasturida koʻchalar yoqasida joylashgan turar va noturar joy obʼektlarini taʼmirlash, noqonuniy qurilishlarni bartaraf qilish, hududlarda sanitariya holatlarini yaxshilash, yongʻin xavfsizligini taʼminlash, koʻchalarning transport qatnovi qismlarini hamda koʻchalar boʻyidagi yoʻlaklarni, mavjud kommunikatsiya tarmoqlarini taʼmirlash, hududlarda gulzorlar, bolalar oʻyingohlarini va sport maydonchalarini tashkil etish kabi ishlarni amalga oshirish rejalashtirilgan.
Tuman hokimining qaroriga asosan rekonstruktsiya va obodonlashtirish ishlari olib boriladigan 25 ta koʻchalar belgilab olinib, ushbu koʻchalarga masʼullar biriktirildi.
Ayni kunlarda mazkur koʻchalarda keng koʻlamli obodonlashtirish va bunyodkorlik ishlari qizgʻin davom etmoqda. Ayniqsa, tumanimizning Gurlan, Madaniyat, Samarqand, Barkamol avlod kabi koʻchalari ushbu koʻchalar aholisi va biriktirilgan masʼullarning saʼy-harakatlari bois, yangicha qiyofa kasb etmoqda.
Xalqimizda "Obodlik koʻngildan boshlanadi”, degan hikmatli ibora bor. Haqiqatdan ham, koʻngli, qalbi obod inson oʻzi yashaydigan hududning ozodaligiga ham katta eʼtibor bilan qaraydi, atrofidagilarni ham poklikka, ozodalikka undaydi. Shunday ekan, aziz yurtdoshlar, keling, mustaqilligimizning qutlugʻ 25 yillik toʻyini chor-atrofimizni obod va saranjom-sarishta qilgan holda kutib olaylik! Tumanimizdagi ovul va mahallalar ahli, mulkchilik shaklidan qatʼiy nazar, barcha korxona, tashkilot va muassasalar, taʼlim maskanlari jamoalari, keksa-yu yosh oʻzimiz istiqomat qilayotgan hududdagi barcha goʻshalarni tartibga keltirish, tozalash, obodonlashtirish, koʻkalamzorlashtirish tadbirlarida ongli ravishda, chin koʻngildan, faol ishtirok etib, mahallamizning, yurtimizning yanada obod boʻlishiga hissa qoʻshaylik!
Sanjar MURODOV,
tuman bosh meʼmori.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
