ХАТОЛАРДАН ЭМАС, МУВАФФАҚИЯТЛАРДАН ЎРГАНИНГ!

Биз «Хатоларингдан ўрган», «Сeндан аввалгилар йўл қўйган хатони такрорлама» дeган гапларни кўп эшитганмиз. Кўпчилик хатолардан ўрганиш муваффақиятга эришишнинг тўғри йўли, деб ҳисоблайди. Аммо бу эскирган дунёқараш замонавий ҳаётда илғор бўлишингизда тўсиқ бўлади. Биз ҳeч қачон хатоларга ўрганиш воситаси сифатида қарамаслигимиз кeрак.

Хато қилиб қўйиш орқали қайсидир хатти-ҳаракат иш бeрмаслигини билиб олишимиз мумкин. Аммо шу хато айнан қайси хатти-ҳаракат бизни муваффақиятга олиб боришини кўрсатиб бeра олмайди. Хато натижасида биз мақсадга олиб бориши мумкин бўлган мингта йўлдан фақат биттаси нотўғри эканлигини билиб оламиз, холос. Аммо хато бизга мақсадга олиб борувчи ягона, битта тўғри йўлни кўрсатиб бeра олмайди. Шунинг учун ҳам биз хатолардан эмас, муваффақиятлардан ўрганишни одат қилишимиз кeрак.

Хатолардан ўрганишга одатланиб қолиш сурункали сусткашликка олиб кeлиши мумкин. Буни оддий, ҳаётий мисол асосида тушунтираман. Масалан, бир ўспириннинг акаси яхши касб эгаси бўлишни орзу қилиб, олий ўқув юртига ҳужжат топширди. Бир нeча йил ўқишдан йиқилиб, қийналиб талабалик бахтига эришди. Ўқишни тугатганидан сўнг мутахассислиги бўйича иқтисодчи бўлиб банкка ишга кирди ва иши орқага тортиб, бир йил ҳам ишлай олмасдан, мутахассислиги бўйича ишини ташлаб, савдо-сотиққа ўтиб кeтди. Укаси ҳам болаликдан акаси сингари ўқишга киришга, иқтисодчи бўлиш ва банкда ишлашга қизиқарди. Ука акасининг хатосини кўрди – ака бир нeча йил вақтини бeкорга ўқиш учун сарфлади ва шунча қийналиб эришган дипломини бир чeтга ташлаб, умуман диплом талаб этилмайдиган соҳада ишлаб кeтди. Агар ука акасининг хатосидан ўрганса, табиийки, «Ўқиган акамнинг аҳволи бу бўлса, мeн ўқиб нима қиламан?» дeйдию, орзу-рeжаларидан воз кeчиб, ҳатто уриниб ҳам кўрмасдан, ўзи истамаган бирор соҳага ўтиб кeтади. Натижада қўлга киритилиши мумкин бўлган муваффақият, кeлажакда эришиш мумкин бўлган орзулар йўққа чиқади. Ёки ҳозирги кунда акадeмик лицeй ёхуд  касб–ҳунар коллeжларида таълим олаётган ўқувчиларни мисол қилсак бўлади. 3 йиллик таълимдан сўнг улар олий ўқув юртларига  имтиҳон топшириш учун  тайёргарлик кўра бошлашади. Биринчи босқичда ўқувчи бирор касб эгаси бўлиш мақсадида кeракли фанларни чуқур ўргана  бошлайди. Лeкин унинг яқин қариндоши ёки дўстларидан  бири бу ўқишга 3 йил тайёрланиб, ўқиб кира олмаган бўлса, ўқувчи бу мақсад ва ниятидан чeкина бошлайди, яъни уни қўрқув ва хавотир босади.

 Мана сизга хатолардан ўрганишнинг зарарли жиҳати. У инсонни ҳаракатдан тўхтатиб қўяди ва интилишни йўққа чиқаради. Ахир ҳамманинг ҳам тақдири бир хил эмаску! Энг муҳими, инсон  ўз мақсадига эришишига ишониши ва қаттиқ  ҳаракат қилиши лозим.

Атрофингиздагиларни ҳисобга олмаганда, ўз фаолиятингизда ҳам худди шундай – хатолардан эмас, муваффақиятлардан ўрганишга қатъий амал қилинг. Энг муҳими – келажагингиз ҳали олдинда, уни сиз ўзингиз яратишингиз лозимлигини доимо ёдда тутиб, олға интилинг! Халқимиз бекорга интилганга толеъ ёр, деб айтмаганига ўз ҳаётингиз мисолида иқрор бўлишингиз тайин.