ДУНЁ МАТОҲЛАРИ ИМОНДАН АЗИЗ ЭМАС
Ҳаёт – бебаҳо! Тириклик саҳнасида ҳар ким ўз хоҳишича, салоҳияти етганича меҳнат қилиб, ҳеч кимдан кам бўлмай яшагиси келади, шунга интилади. Лекин бу дунё барибир бири кам-да. Рўзғор – ғор деганларидай, уни бут қилиб, энди бўлди, деб ўзимиз ҳақимизда ўйлашга фурсат тополмаймиз, ҳаётдан завқланиб яшашга, соғлиғимизни тиклашга эътибор қилмаймиз. Чунки кун сайин уй–рўзғор буюмларининг, жиҳозларнинг, мебелларнинг, кийим–кечаг-у тақинчоқларнинг янгиси, давр тили билан айтганда, “зўри” чиқаверади. Бировдан олдин, бировдан орқада дегандай, “зўр”ларга интилаверамиз. Жисмимиздан қувват кетиб, турли хасталиклар намоён бўла бошлаганида эса афсуски, кеч бўлади. Соғлигимиздан кечиб йиққанларимизнинг қадри бир пул эканлигини ана шу вақтда англаймиз...
Бу долғали дунёда бизнинг бунингдек ҳаёт тарзимиздан фарқли киши танг қоларлик воқеа–ҳодисалар жуда кўп.
Ер куррасининг қай бир бурчагида бир ўта бой одам ҳаётининг сўнгги лаҳзаларида бутун бойлигини умр йўлдошига – аёлига эмас,итига мерос қилиб қолдирибди, яна биров кўп йиллар давомида орзу қилганидай ит қиёфасига кирибди, тимсоҳга уйланган эркак эса ўзини жуда бахтиёр ҳис қилаётганини билдирган. Бу унинг таъбирича, одамларнинг жонзотларга меҳр-эътиборини қаратиш учун қилган иши экан.
Бунингдек ажабтовур ҳангомаларни санайверсак, адоғига етолмаймиз. Бироқ ижтимоий тармоқдаги маҳаллий сайтлардан бирида эълон қилинган бир хабар эътиборимни тортди, тортдигина эмас, ҳам ҳайратландим, ҳам ажабландим. Эмишки, 16 кишилик стол ўтирғичи билан 350 млн., шу столга яраша идиш-товоқ 133 млн., тарелка-ю қошиқлари ҳам шунга яраша, жами эса 483 млн. сўмдан ортиқ экан. Албатта, ҳар кимнинг пули ўз чўнтагида туради, қачон, нима харид қилиш ҳар кимнинг ўз ихтиёрида. Бироқ, шу хабарни ўқиган неча одам (айниқса, аёллар)нинг кўнглида шу матоҳларни харид қилиш истаги туғилган бўлса ажаб эмас. Ачинарлиси, бундай суммадаги харидларни ҳалол ишлаб пул топаётганлар қилиши ақлга сиғмайди. Яна билмадим. Ишқилиб, дунё матоҳлари юртдошларимизни ҳалол ризқ топиш йўлидан оздирмаса бўлди.
Ахир ҳеч нарса имондан азиз эмас, шундай эмасми?..
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
