Топ университетларда таҳсил олиш – қўл етмас орзу эмас!

Ёшлик — орзулар фасли. Бир пайтлар туманимиздаги 36-сонли мактабда ўқиб юрган кезларимда мен ҳам хорижда таълим олишни орзу қилардим. 10–11-синфни Нукусдаги Президент мактабида давом эттириб, орзуларим сари қадам ташладим. Бу ўқув даргоҳидаги Cambridge International дастури асосидаги тўлиқ инглиз тилидаги таълим менда танқидий фикр­лаш, билимга чанқоқлик ва ўз устида ишлаш кўникмасини шакллантирди.

Мен ижтимоий ва аниқ фанларга бирдек қизиқардим. Иқтисодиёт шу икки йўналиш кесишуви сифатида мен учун энг тўғри танлов бўлди. Бу соҳа орқали мен жамият, сиёсат ва глобал жараёнлар билан чуқур танишиш имконига эга бўлдим.
Президент мактабини тугатиш арафасида 10 дан ортиқ университетдан қабул хати олдим ва АҚШнинг Аризона университетини танладим. Университетнинг халқаро нуфузи, таълим сифати ва академик муҳити мен учун асосий омил бўлди.

Қабул жараёнида IELTS даражам, мактаб баҳолари, motivation letter, ўқитувчи тавсиялари, шахсий портфолио ва ижтимоий фаоллигим ҳал қилувчи роль ўйнади.

Таълим харажатларим “Эл-юрт умиди” жамғармаси орқали қопланди. Бу мамлакатимизнинг иқтидорли ёшларга бўлган ишончидир.

Аризона университетида таълим юқори савияда. Академик эркинлик, фанларни мустақил танлаш, problem solving ва critical thinking кўникмалари таълимнинг асосий йўналишидир. Илмий тадқиқотларга кенг имконият яратилган. Электрон кутубхоналар, илмий журналлар — барчаси билимни чуқурлаштиришга хизмат қилади.

Университет мен учун фақат билим маскани эмас, балки шахсий ўсиш майдони ҳамдир. Турли миллат ва маданиятлар вакиллари билан мулоқот, ҳар хил интеллектуал клублар ва ижтимоий ҳаёт инсонни ҳар томонлама бо­йитади.

Ҳозир бакалавр босқичим якунланмоқда. Келажакда Ўзбекистонга қайтиб, халқаро билим ва тажрибам билан мамлакат иқтисодиёти ривожи учун хизмат қилишни мақсад қилганман.

Мен ёшларга ишонч билан айтаманки, хорижда таълим олиш бугун қўл етмас  орзу эмас, балки амалга ошиши мумкин бўлган реал мақсаддир. Президент мактаблари, “Эл-юрт умиди” жамғармаси, Ал Беруний номидаги халқаро мактаб-интернати, халқаро грантлар, IELTS ва SAT имтиҳонларига тайёрлов курслари каби имкониятлар биз ёшлар учун яратилган.

Тенгдошим, орзуларингизни аниқ мақсадга айлантиринг. Илм билан дўст бўлинг. Янгиликка интилинг, сунъий интеллект ва рақамли кўникмаларни ўзлаштиринг. Шу билан бирга, замон талаб­ларидан бири бўлган hard skills билан бир қаторда, мулоқот қилиш, жамоада ишлаш, етакчилик каби soft skills кўникмаларини ҳам ривожлантиринг. Ҳаётдан завқ олинг. Билимларимизни юрт тараққиёти йўлида ишлатиш ҳар бир ёшнинг бурчидир.

Нурбек Йўлдошев, АҚШнинг Аризона университети талабаси.