Top universitetlarda tahsil olish – qoʻl yetmas orzu emas!

Yoshlik — orzular fasli. Bir paytlar tumanimizdagi 36-sonli maktabda oʻqib yurgan kezlarimda men ham xorijda taʼlim olishni orzu qilardim. 10–11-sinfni Nukusdagi Prezident maktabida davom ettirib, orzularim sari qadam tashladim. Bu oʻquv dargohidagi Cambridge International dasturi asosidagi toʻliq ingliz tilidagi taʼlim menda tanqidiy fikr­lash, bilimga chanqoqlik va oʻz ustida ishlash koʻnikmasini shakllantirdi.

Men ijtimoiy va aniq fanlarga birdek qiziqardim. Iqtisodiyot shu ikki yoʻnalish kesishuvi sifatida men uchun eng toʻgʻri tanlov boʻldi. Bu soha orqali men jamiyat, siyosat va global jarayonlar bilan chuqur tanishish imkoniga ega boʻldim.
Prezident maktabini tugatish arafasida 10 dan ortiq universitetdan qabul xati oldim va AQShning Arizona universitetini tanladim. Universitetning xalqaro nufuzi, taʼlim sifati va akademik muhiti men uchun asosiy omil boʻldi.

Qabul jarayonida IELTS darajam, maktab baholari, motivation letter, oʻqituvchi tavsiyalari, shaxsiy portfolio va ijtimoiy faolligim hal qiluvchi rol oʻynadi.

Taʼlim xarajatlarim “El-yurt umidi” jamgʻarmasi orqali qoplandi. Bu mamlakatimizning iqtidorli yoshlarga boʻlgan ishonchidir.

Arizona universitetida taʼlim yuqori saviyada. Akademik erkinlik, fanlarni mustaqil tanlash, problem solving va critical thinking koʻnikmalari taʼlimning asosiy yoʻnalishidir. Ilmiy tadqiqotlarga keng imkoniyat yaratilgan. Elektron kutubxonalar, ilmiy jurnallar — barchasi bilimni chuqurlashtirishga xizmat qiladi.

Universitet men uchun faqat bilim maskani emas, balki shaxsiy oʻsish maydoni hamdir. Turli millat va madaniyatlar vakillari bilan muloqot, har xil intellektual klublar va ijtimoiy hayot insonni har tomonlama bo­yitadi.

Hozir bakalavr bosqichim yakunlanmoqda. Kelajakda Oʻzbekistonga qaytib, xalqaro bilim va tajribam bilan mamlakat iqtisodiyoti rivoji uchun xizmat qilishni maqsad qilganman.

Men yoshlarga ishonch bilan aytamanki, xorijda taʼlim olish bugun qoʻl yetmas  orzu emas, balki amalga oshishi mumkin boʻlgan real maqsaddir. Prezident maktablari, “El-yurt umidi” jamgʻarmasi, Al Beruniy nomidagi xalqaro maktab-internati, xalqaro grantlar, IELTS va SAT imtihonlariga tayyorlov kurslari kabi imkoniyatlar biz yoshlar uchun yaratilgan.

Tengdoshim, orzularingizni aniq maqsadga aylantiring. Ilm bilan doʻst boʻling. Yangilikka intiling, sunʼiy intellekt va raqamli koʻnikmalarni oʻzlashtiring. Shu bilan birga, zamon talab­laridan biri boʻlgan hard skills bilan bir qatorda, muloqot qilish, jamoada ishlash, yetakchilik kabi soft skills koʻnikmalarini ham rivojlantiring. Hayotdan zavq oling. Bilimlarimizni yurt taraqqiyoti yoʻlida ishlatish har bir yoshning burchidir.

Nurbek Yoʻldoshev, AQShning Arizona universiteti talabasi.