9 май- Хотира ва қадрлаш куни

Фашизм устидан қозонлиган Буюк Ғалабанинг 73 йиллиги бутун дунё тинчликпарвар халқлари томонидан ҳар йили муносиб тарзда нишонланади. Мамлакатимизда эса 9 май – Хотира ва қадрлаш куни сифатида иккинчи жаҳон уруши иштирокчилари билан учрашувлар, давра суҳбатлари, иккинчи жаҳон уруши жанггоҳларида ҳалок бўлган қаҳрамон жангчиларни хотирлаш маросимлари ўтказилиб, фронт ортида фидойилик билан меҳнат қилган инсонларга ҳурмат-эҳтиром кўрсатишдек хайрли ишлар амалга а.

Шу кунларда туманимиздаги маҳаллаларда, ўқув муассасалари, жамоат ташкилотларида ҳам уруш фахрийлари билан учрашувлар ўтказилиб, уларнинг уйларига ташриф буюриб, ўсиб келаётган ёш авлоднинг кекса жангчилар билан мулоқотлари бўлиб ўтмоқда.

Қипчоқ қишлоғида истиқомат қилувчи иккинчи жаҳон уруши иштирокчиси Ўтамурод бобо Бозорбоевнинг хонадони ҳам ҳар куни бобони кўргани келган давлат ва жамоат ташкилотлари раҳбарлари, ўқувчи-ёшлар билан гавжум. Шу йилнинг 30 апрель куни 65-сонли, 18-сонли умумтаълим мактаблари ҳамда Амударё агробизнес касб-ҳунар коллежи раҳбарлари Ўтамурод бобо хонадонида бўлишди.

65-сонли мактаб ўқувчилари мактаб ўқитувчиси Юлдуз Болтабоева ҳамда Ёшлар Иттифоқи бошланғич ташкилоти етакчиси Шаҳло Ўрозбоевалар раҳбарлигида Ўтамурод бобонинг кўнглини ҳушнуд қилиш мақсадида “Биз учун шарафдир боболар йўли!” деб номланган дастурни намойиш этишган бўлишса, 18-сонли мактаб ўқувчилари устози Феруза Исмоилова раҳбарлигида ўзлари тайёрлаб келган она Ватан, қаҳрамонлик, мардлик ва жасорат, ватанпарварлик ва тинчлик мавзуларидаги шеърларни ўқиб бердилар.

Ўз навбатида Ўтамурод бобо Бозорбоев ўқувчи-ёшларга она Ватан хизматига ҳамиша тайёр, ўқимишли, мард ва жасур фарзандлар бўлиб вояга етишларида тилакдошлик билдирди.

- Эл-юрт, аҳли дунё тинч, халқимиз соғ-омон, турмушимиз фаровон бўлсин! – дея дуо қилди барчани нуроний отахон.

Р.ЙЎЛДОШЕВА