ДЕПУТАТ МИНБАРИ

Солиқ соҳасидаги ўзгаришлар иқтисодиёт ривожига ва халқ манфаатларига хизмат қилади

Мадамин КАЗАКОВ,

халқ депутатлари туман Кенгаши депутати.

Президентимизнинг яқинда қабул қилган “Ўзбекистон Республикасининг солиқ сиёсатини такомиллаштириш концепцияси тўғрисида”ги Фармонида солиқ соҳасидаги иқтисодий ўсиш, тадбиркорлик борасидаги фаолликнинг ошиши ва тўловлар йиғилувчанлигини таъминлаш кабиларга тўсқинлик қилаётган муаммоларни бартараф этиш, шунингдек, бу борада Ҳаракатлар стратегиясида белгиланган вазифаларни амалга ошириш мақсади кўзланган.

Ўзбекистон Республикасининг солиқ сиёсатини такомиллаштириш концепцияси доирасида 2019 йил 1 январдан бошлаб меҳнатга ҳақ тўлаш фондига солиқ юки камайтирилади. Барча фуқаролар учун жисмоний шахслардан олинадиган даромад солиғининг ягона ставкаси 12 фоиз миқдорида жорий этилади. Шундан 0,1 фоизи шахсий жамғариб бориладиган пенсия ҳисобварақларига йўналтирилади ва айрим тоифадаги фуқароларнинг энг кам ойлик иш ҳақининг 4 баробари миқдоридаги даромадларини солиқ солишдан озод қилишнинг амалдаги тартиби сақлаб қолинади.

Солиқ солишнинг соддалаштирилган тартибига ўтиш мезонлари эса давлат мақсадли жамғармаларига юридик шахсларнинг тушумидан ундириладиган мажбурий ажратмаларни бекор қилиш, фойда солиғи ставкасини 14 фоиздан 12 фоизгача, тижорат банклари учун – 22 фоиздан 20 фоизгача, дивидентлар ва фоизлар кўринишидаги даромадлар бўйича тўлов манбаидан ушлаб қолинадиган фойда солиғи ставкасини 10 фоиздан 5 фоизгача пасайтириш ҳамда тадбиркорлик субъектлари учун баъзи солиқ турларини жорий этиш кабилар орқали такомиллаштирилади.

Шунингдек, Фармонга кўра, илғор хорижий тажрибани ҳисобга олган ҳолда, юридик шахслар кўчмас мулкининг бозор қийматини аниқлаш механизмини жорий қилиш юзасидан чора-тадбирлар киритилади. Фармонда кўрсатилган солиқ тизимини ислоҳ қилиш бўйича белгиланган чора-тадбирларни инобатга олган ҳолда 1 августга қадар Ўзбекистон Республикасини ривожлантиришнинг 2019-2021 йилларга мўлжалланган асосий макроиқтисодий кўрсаткичлари прогнози ҳам ишлаб чиқилади.

Мамлакатимизда солиқ юкининг изчиллик билан камайтирилиши ҳамда мазкур Фармонда кўрсатилганидек, солиқ тўлашни ўзгартириш, тадбиркорлик субъектларига нисбатан белгиланган солиқлар фарқини бартараф этиш, фойда солиғи ставкасини пасайтириш кабиларнинг амалга ошиши натижасида аҳоли даромадлари янада ортади. Бу ўз навбатида иқтисодий ривожланишга ҳам самарали таъсир кўрсатади.

***

ҲАҚИҚИЙ ЕР ЭГАСИ УЧУН ҲАМ МОДДИЙ, ҲАМ МАЪНАВИЙ РАҒБАТ

Улуғбек ЎРОЗБОЕВ, халқ депутатлари туман

Кенгаши депутати, фермер.

Муҳтарам Президентимиз Шавкат Мирзиёевнинг 2017 йил 9 октябрдаги “Фермер, деҳқон хўжаликлари ва томорқа ер эгаларининг ҳуқуқлари ва қонуний манфаатларини ҳимоя қилиш, қишлоқ хўжалиги экин майдонларидан самарали фойдаланиш тизимини тубдан такомиллаштириш чора-тадбирлари тўғрисида”ги Фармони ва 2017 йил 10 октябрдаги “Фермер, деҳқон хўжаликлари ва томорқа ер эгалари фаолиятини янада ривожлантириш бўйича ташкилий чора-тадбирлар тўғрисида”ги Қарори мамлакатимиз қишлоқ хўжалиги соҳасининг ривожида янги босқични бошлаб берди. Ушбу Фармон ва Қарор туфайли фермер, деҳқон хўжаликлари эгалари ва томорқачи деҳқонлар учун кенг имкониятлар эшиги очилди. Жумладан, ушбу ҳужжатларда қишлоқ хўжалиги ишлаб чиқарувчиларини янада қўллаб-қувватлаш, фермер, деҳқон хўжаликлари ва томорқачиларга тегишли бўлган экин майдонларидан фойдаланиш самарадорлигини таъминлаш, пировард натижада ер эгаларининг даромадларини кўпайтиришга қаратилган устувор вазифалар белгилаб берилди.

Президентимиз Ш.Мирзиёевнинг шу йил, 26 июнь куни қабул қилган “Илғор фермер”, “Меҳнаткаш деҳқон” ва “Намунали томорқачи” кўкрак нишонларини таъсис этиш чора тадбирлари тўғрисида”ги Қарори фермерларни, деҳқон хўжалиги эгаларини ва томорқачи фуқароларни янада руҳлантириб юборди. Чунки бу қарор ердан унумли фойдаланиб, мўл-кўл қишлоқ хўжалиги маҳсулотлари етиштиришда фидокорона меҳнат қилган деҳқонларни маънавий жиҳатдан рағбатлантириш мақсадида қабул қилинган муҳим ҳужжатдир.

Шулардан хулоса қилиб айтганда, эндиликда ҳақиқий ер эгаларини ва ҳақиқий меҳнат кишиларини мўл даромад ва мукофотлар кутади.

***

МТМ СОҲАСИДА ДАВЛАТ–ХУСУСИЙ ШЕРИКЛИКНИ РИВОЖЛАНТИРИШГА КЕНГ ЙЎЛ ОЧИЛДИ

Гулмирза БОБОЖОНОВ,

52-мактаб ўқитувчиси, халқ депутатлари туман Кенгаши депутати:

2018 йил 25 июнда Ўзбекистон Республикаси Вазирлар Маҳкамасининг “Мактабгача таълим соҳасида давлат-хусусий шерикликни ривожлантириш учун шарт-шароитлар яратиш чора-тадбирлари тўғрисида”ги Қарори қабул қилинди.

Қарорга мувофиқ, давлат-хусусий шериклик асосида нодавлат МТМлар ташкил этиш учун ер участкалари ажратилади ва бўш турган давлат мулки объектлари тадбиркорлик субъектларига бепул асосда берилади, шунингдек, қурилиш ишларини олиб бориш учун фоизсиз кредитлар ажратилади. Бунда давлат-хусусий шериклик тўғрисидаги битимлар ўз вақтида ва самарали амалга оширилиши қатъий назорат қилиб борилади. Бу чора-тадбирларни амалга оширишдан кўзланган мақсад – болажонларни мактабгача таълим-тарбия билан қамраб олиш даражасини ошириш, уларнинг соғлом, зукко бўлиб улғайишларига эришишдир.

Албатта, ёшликда олинган илм — тошга ўйилган нақш каби, деган ибора бежиз айтилмаган. Кичкинтойларимиз мактаб таълимига МТМларда муносиб тарбияланиб, кириб борсалар, бу ўзининг ижобий самарасини бериши шубҳасиз.

Болажонларни МТМларларга қамраб олишни яхшилаш туманимизда ҳам долзарб вазифалардан бири бўлиб турибди. Чунки айни кунда 37 та мактабгача таълим муассасалари фаолият юритмоқда. Бу боғча ёшидаги болажонларнинг 29,7 фоизини қамраб олиш имкониятини бераяпти.

Жорий йилда 10 та нодавлат МТМларнинг фаолият бошлаши режалаштирилган эди. Ҳозиргача 1 та ана шундай муассаса иш бошлади. Қолганларида қурилиш ишлари бошланиб кетди. Эндиликда мактабгача таълим тизимининг нодавлат секторини ривожлантиришга ва моддий-техника базасини мустаҳкамлашга эътибор кучайтирилаверади.

Бу борада фаолият олиб боришни истаган тадбиркорлик субъектларига яратилган имкониятлар МТМ соҳасида давлат-хусусий шерикликни ривожлантиришга кенг йўл очиши шубҳасиз.

Биз депутатлар бу борадаги ҳукуматимиз қарори ҳаётга татбиқ этилишига ўз ҳиссамизни қўшишга интиламиз.