“Энг намунали сардорлар Кенгаши” танловининг туман босқичи ўтказилди

Ўзбекистон ёшлар иттифоқи ўсмир-ёшларнинг интеллектуал қобилиятини ошириш, қизиқишлари доирасини кенгайтириш, билимдон бўлиб вояга етишларига эришиш борасида кўпгина саъй-ҳаракатларни амалга оширмоқда.

“Энг намунали сардорлар Кенгаши” танлови ҳам шулар жумласидандир.

Шу йилнинг 27 февралида 9-сонли Болалар мусиқа ва санъат мактаби биносида мазкур танловнинг туман босқичи ўтказилди. Танлов 1-7-синфлар ва 8-11-синфлар ўқувчилари орасида бўлиб ўтди ва унда 1-7-синфлар сардорларидан 7 та, 8-11-синфлар сардорларидан 7 та жамоа ўзаро беллашдилар.

Танлов учта шарт бўйича ўтказилди. “Бу бизнинг фаолият” деб номланган илк шартда иштирокчи жамоалар сардорлар кенгаши томонидан амалга оширилаётган ишларни бадиий чиқиш орқали таништирдилар.

“Бизнинг имкониятларимиз” деб номланган иккинчи шартда иштирокчи жамоалар кейинги ўқув йилидаги сардорлар Кенгаши фаолияти йўналишларидан келиб чиқиб, бугунги кунда ўқувчи-ёшлар ўртасида долзарб бўлган муаммолар ва унинг ечимига бағишланган лойиҳани ишлаб чиқиб, кўргазмали воситалардан фойдаланган ҳолда саҳнада ҳимоя қилдилар.

Учинчи шартда эса синф сардорлар Кенгаши аъзолари 5 дақиқа ичида ижтимоий, сиёсий, маънавий-маърифий ва Ўзбекистон ёшлар иттифоқи, “Камалак” болалар ташкилоти, шунингдек, синф сардорлар Кенгаши фаолиятига оид 10 та саволларга жавоблар бердилар.

Танлов якунида 1-7 синфлар сардорлари ўртасида 76-сонли мактабнинг “Келажак” жамоаси ғолиб бўлди. Иккинчи ўринни 11-сонли мактабнинг “Ниҳол”, учинчи ўринни 31-сонли мактабнинг “Темурийлар авлоди” жамоаси эгаллади. Шунингдек, 8-11-синфлар сардорлари ўртасидаги баҳсда 15-мактабнинг “Келажак” жамоаси ғолибликни қўлга киритди. Иккинчи ўринни 76-сонли мактабнинг “Ёшлар”, учинчи ўринни 40-сонли мактабнинг “Ўзбекистон ёшлари” жамоаси эгаллади.

Ғолиблар ва иштирокчилар Ўзбекистон ёшлар иттифоқи туман Кенгаши томонидан рағбатлантирилди.    

О.Pажабова.