Она тилимизнинг фидойи тарғиботчиси
Бугун юртимизда таълим тизимига берилаётган катта эътибор шу соҳада фаолият кўрсатаётган ҳар бир ходимнинг ўз касбига, фаолиятига бўлган масъулиятини ошириб, ўқитувчилар қалбида фахру ифтихори туйғуларини юксалтирмоқда.
Айниқса бу эътибор ва рағбат педагог ходимларни ўз соҳасида чуқур изланишлар олиб бориб, ёшларга берилаётган таълимнинг сифат ва самарадорлигини янада оширишга ундамоқда.
2013 йилда Нукус Давлат педагогика институтини тамомлаб, туманимиздаги 16-сонли ихтисослашган давлат умумтаълим мактабида она тили ва адабиёт фанидан дарс бераётган Нигора Исмоилова ҳам мана шу мақсад йўлида ҳаракат қилаётган фидойи ўқитувчиларнинг биридир.
Нигора олий ўқув юртини тугатиб, ушбу мактабда иш бошлаган дастлабки даврларида унга мактабда кўп йиллардан буён фаолият кўрсатиб келаётган Ҳулкар Қурбонбоева ва Азиза Абдураҳмонова сингари тажрибали ҳамкасблари она тилини ўқитиш услубларини ва касб сирларини ўргатди.
Ўз устида тинмай ишлаши, дарс ўтишнинг илғор усулларидан фойдаланиши, устоз ўқитувчилар тажрибаларига суяниши натижасида кўп ўтмаёқ у фаол ўқитувчилар сафидан ўрин олди.
Айни кунда Нигора Исмоилова томонидан ўқувчилар ўртасида ўтказилаётган “Ёш китобхон” мусобақаси, мушоира ва мақол айтишув тадбирлари ўқувчиларнинг она тили ва адабиёт фанларига бўлган қизиқишни янада оширмоқда.
Ёш ўқитувчининг таълим беришда бор билим ва маҳоратидан, илғор тажрибалардан фойдаланиб иш кўриши унинг ўқувчилари эришаётган муваффақиятларда кўзга ташланмоқда. Мактаб ўқувчиси Диёра Болтабоева каби шогирдлари “Билимлар беллашуви”нинг туман ва Қорақалпоғистон Республикаси босқичларида қатор ютуқларни қўлга киритгани Нигорани янада кўпроқ меҳнат қилишга, ўқувчилар билан янада фаол ишлашга руҳлантирмоқда.
Дарс ўтиш жараёнида интерфаол услублардан фойдаланиш Нигора учун катта имкониятлар эшикларини очиб бераяпти. Малакали ўқитувчи октябрь ойи давомида ўтказилаётган “Она тили ва адабиёт фан ойлиги” доирасида кўплаб тадбирлар ташкил қилиб, ўқитувчиларнинг она тилига, адабиётга бўлган қизиқишларини янада оширишга ҳаракат қилмоқда.
15 октябрь куни мактабнинг 10-синфида ўқувчиларнинг билимини ошириш, фикрлаш доирасини кенгайтириш мақсадида очиқ дарс ўтказилиб, унда ўқувчиларнинг она тилимизни қанчалик чуқур ўзлаштиргани, ўзбек адабиётидан қанчалик даражада хабардор экани яна бир бора синовдан ўтказилди.
Очиқ дарс пайтида ўқувчилар гуруҳларга ажратилиб, уларга ҳар хил қизиқарли мавзуларда матнлар ёзиш вазифалари топширилди. Машғулотлар ва мусобақаларда ўқувчилар фаол иштирок этишиб, муносиб тарзда рағбатлантирилди.
Нигора Исмоилова фақат фан ойлиги доирасидагина эмас, доимий равишда ўқувчилар ўртасида турли қизиқарли тадбирларни ўтказиб, ёшлар қалбида она тилимизга бўлган ҳурмат-эътиборни, ундан фахрланиш туйғуларини ошириш йўлида изланиб, фаол иш олиб бормоқда.
Биз ўз касбига ихлос қўйган жонкуяр муаллима Нигора Исмоилованинг келгуси ишларида муваффақиятлар тилаймиз. Мана шундай фидойи ва жонкуяр ўқитувчилар бор экан, она тилимизнинг қадру қимматини ҳис қилиб, унга ҳурмат билан муносабатда бўладиган ёшлар сафи ортиб бораверади.
А.Жуманиёзов
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
