МАТБУОТ СОҲАСИНИНГ ФИДОЙИСИ

ЭЪТИРОФ ВА ЭҲТИРОМ

Матбуот соҳаси жонкуярларининг ҳаёти ва фаолиятига назар ташлайдиган бўлсак, уларнинг кўпчилиги ҳақиқий ижодкор сифатида шакллангунларига қадар имкони борича ҳаётни кенгроқ ўрганишга ҳаракат қилганларининг гувоҳи бўламиз. Бу тоифа ижодкорлар ҳақиқатан ҳам у ёки бу масалаларга ойдинлик киритишда ёхуд муаммоли масалаларни ҳал этишда қийинчиликларга дуч келишмайди, ижодий ишларининг ҳар бир саҳифасида ҳаёт ҳақиқатлари акс этиб туради.

Таъбир жоиз бўлса, кўплаб ёшларнинг севимли устози, "Шуҳрат" медали соҳиби, Қорақалпоғистон Республикасида хизмат кўрсатган журналист Алламберган Жуманиёзов ана шундай журналистлар тоифасидан. Отахон журналист ўзининг ишчанлиги, ҳақиқатпарварлиги, ташаббускорлиги билан ибратга муносиб ижодий тажриба мактабини яратган, қорақалпоғистонлик журналистларга ҳамиша намуна бўлиб келган инсон сифатида қадрланади.

Алламберган Жуманиёзов айни пайтда 75 ёшга тўлдилар. Ўз ҳаётини халққа маънавият улашишдек сермашаққат ва шарафли касб — журналистика соҳасига бағишлаган отахон журналист ҳамиша халққа интилиб, уларнинг ташвиш ва муаммоларига елка тутиб яшади ва ана шу фазилати унинг ҳаёт мазмунига айланган.

ҲАЁТ ТАЖРИБАСИ ВА ИЖОД ЙЎЛИ

Илк меҳнат фаолиятини 1966 йилда Хоразм вилояти 167-қурилиш трестида оддий ишчи бўлиб ишлашдан бошлаган Алламберган Жуманиёзов то ҳақиқий ижодкор сифатида шакллангунга қадар турли вазифаларда ишлади: электромонтёр, собиқ иттифоқ армияси сафида оддий аскар, ҳарбий хизматдан сўнг алоқа бўлими бошлиғи, теплоходда ишчи-матрос, ҳатто пахта териш машинаси механизатори каби касбларни мукаммал эгаллаш билан бирга ҳаётни, турфа хулқ-атворли инсонларни пухта ўрганди. Буларнинг барчаси унга журналист сифатида ижодий фаолиятини бошлаганида ҳаётий тажриба сифатида қўл келди.

Устоз журналист Тошкент Давлат (ҳозирги Ўзбекистон Миллий) Университетини журналист ихтисоси бўйича муваффақиятли тамомлаб, 1975-1984 йилларда Амударё тумани "Амударё ҳақиқати" газетаси таҳририятида мухбир, масъул котиб, муҳаррир ўринбосари лавозимларида фаолият юритди. 1984 йилдан 1995 йилгача Амударё тумани партия қўмитасида консультант, бўлим мудири ўринбосари, Халқ депутатлари А. Темур номли овул Кенгаши ижроия қўмитаси раисининг ўринбосари, Халқ депутатлари Амударё туман Кенгаши ижроия қўмитаси раиси ўринбосари, туман Кенгаши ижроия қўмитаси ташкилий бўлим мудири, Амударё туман ҳокимлиги ташкилий бўлим мудири каби масъулиятли вазифаларда ишлаб, халққа ҳалол ва сидқидилдан хизмат қилди. У қаерда, қайси лавозимда ишлашидан қатъи назар, ўзининг севимли машғулоти — ижод қилишдан асло тўхтамади.

У 1995 йилда тамоман янги давр ва янги шароитда ижод майдонига қайтди. Бозор иқтисодиётига ўтиш даврининг ўзига хос синовлари матбуот соҳасига ҳам ўз муҳрини босган бир даврда у туман газетаси муҳаррирлигини қабул қилиб олди.

Таҳририят ижодий жамоаси билан ҳамкорликда, қолаверса, туман ҳокимлигининг қўллаб-қувватлови билан газета обуначиларини кўпайтириш, таҳририятда пуллик хизмат кўрсатишни йўлга қўйиш чоралари кўрилди. Натижада таҳририят 1996-2005 йилларда газетанинг полиграфик ижроси ва адади, обуначиларининг географик қамрови кенглиги жиҳатидан Қорақалпоғистон миқёсида илғорлар сафидан жой олди. 2001 йилда Республика Жўқорғи Кенгесининг матбуот соҳасига бағишланган махсус мажлисида Қорақалпоғистон Республикасидаги энг сифатли ва энг намунали туман газетаси деб эътироф этилди.

ТАДБИРКОР ЖУРНАЛИСТ ВА МУНОСИБ ЭЪТИРОФ

Ўз касбий фаолиятига бўлган меҳр ва янгиликларга интилиш ҳисси Алламберган Жуманиёзовни матбуот соҳасининг тадбиркори сифатида шакллантирди. У 1998 йилда Ўзбекистонда биринчи бўлиб Амударё туман хотин-қизлар қўмитасининг нашри — "Садоқат гулшани" газетасига асос солди.

1999 йилда мамлакатимиз мустақиллигининг 8 йиллиги муносабати билан Амударё туманида ўтказиладиган семинар-кенгашига бағишлаб "Қорақалпоғистон Республикаси Амударё тумани" деб номланган ранг-тасвирли суратли альбомни чоп қилдирди. Тадбиркор журналист 2003-2005 йилларда Манғит пахта тозалаш заводи — "Юлдуз" ҳиссадорлик жамиятининг "Ҳамроз" адабий-бадиий, ижтимоий ва таржима газетасини ташкил этиб, Қорақалпоғистон Республикасининг еттита туман ва шаҳарларига обуна йўли билан тарқатишга эришди.

Алламберган Жуманиёзов нафақага чиққач ҳам ижоддан кўнгил узиб кетмади. У 2011 йилдан 2020 йилга қадар "Тараққиёт кўзгуси" газетаси таҳририятида масъул котиб, махсус мухбир лавозимларида фаолият олиб борди. Кейинчалик 2021-2023 йилларда тумандаги 56-сонли мактабда ижодий-маданий масалалар бўйича тарғиботчи вазифасида ишлаб, мактаб ўқувчиларининг ижодий қобилиятларини ривожлантириш, уларни миллий-маънавий қадриятларга, она Ватанга муҳаббат, мустақиллик ғояларига садоқат руҳида тарбиялашга муносиб ҳисса қўшди.

Отахон журналист Алламберган Жуманиёзов ҳамон тетик, бардам ва бақувват. Айни пайтда Бой овул МФЙ раисининг нуронийлар масалалари бўйича маслаҳатчиси сифатида деярли ҳар куни халқ орасида. Шу билан бирга, ўзи учун қадрдон бўлиб қолган "Тараққиёт кўзгуси" газетаси таҳририятида ҳам тез-тез бўлиб, ижодий жамоага, шогирдларига қимматли маслаҳатлар бериб, янги ғоялар сари руҳлантириб туришдан асло чарчамайдилар.

Тиниб-тинчимас фидойи устоз, "Шуҳрат" медали соҳиби, Қорақалпоғистон Республикасида хизмат кўрсатган журналист Алламберган Жуманиёзовнинг эл-юрт фаровонлиги, миллий-маънавий қадриятларни мустаҳкамлаш, ўсиб келаётган ёш авлод онгида келажакка ишонч, ватанпарварлик, миллатлараро тотувлик, истиқлол ғояларига садоқат туйғуларини сингдириш борасидаги самарали меҳнатлари давлатимиз томонидан яна бир бор эътироф этилди. Мустақиллигимизнинг 34 йиллиги муносабати билан отахон журналист 1-Даражали "Меҳнат фахрийси" кўкрак нишони билан тақдирланди.

Биз отахон журналист, кўплаб ёшларнинг севимли устози Алламберган ота Жуманиёзовни, аввало умрининг қутлуғ 75 йиллик довони билан ҳамда 1-Даражали "Меҳнат фахрийси" кўкрак нишони билан чин дилдан муборакбод этамиз. Яна узоқ йиллар ижод майдонида дадил одимлаб, шогирдлар билан биргаликда қалам тебратиш насиб этсин, ҳамиша халқ назарида яшаб, невара-чевараларнинг камолини кўриш бахтига мушарраф бўлинг, деймиз.

Робия ЙЎЛДОШЕВА.