Сайловларга тайёргарлик жадал суръатларда олиб борилмоқда

Мамлакатимизда жорий йилнинг 22 декабрь куни бўлиб ўтадиган сайловларга тайёргарлик ишлари айни пайтда янада қизғин тусга кирди. Чунки, ушбу муҳим сиёсий жараёнга саноқли кунлар қолди.

Туман ҳудудида ташкил этилган сайлов комиссиялари қонунийлик, ошкоралик ва адолатлилик принципларига қатъий амал қилган ҳолда ўз фаолиятларини олиб боришмоқда. Шунингдек, сайловни миллий қонунларимиз, бой тажрибамиз ва умумэътироф этилган халқаро стандартлар талабларига мос равишда юқори савияда ўтказиш мақсадида тайёргарлик ишлари жадал суръатларда давом эттиришмоқда.

Сайловчиларга қулай шароит яратиш мақсадида 16-сонли мактаб биносида жойлашган 81-сайлов участкаси ҳам жиҳозланиб, тайёр ҳолатга келтирилди. Ушбу сайлов участкаси ҳудудида сайлаш ҳуқуқига эга бўлган 2420 нафар фуқаро истиқомат қилади.

Сайлов участкасида харита, сайлов комиссиялари тўғрисидаги ахборот ва бошқа зарур маълумотлардан иборат баннерлар ўрнатилди. Участка хоналари қонунчиликда белгиланган талаблар асосида жиҳозланди. Шунингдек, зарур техника воситалари – телефон, факс, нусха кўчириш аппарати ва тегишли адабиётлар билан таъминланди. Сайлов қонунчилигига оид маълумотлар, сайловчилар ҳуқуқ ва мажбуриятлари тўғрисидаги тарғибот воситалари кўринарли жойга осиб қўйилди. Овоз бериш кабиналари, стационар ва кўчма сайлов қутилари ҳам келтирилиб, хоналарга жойлаштирилди.

Сайловларга тайёргарлик кўриш ва уни уюшқоқлик билан ўтказиш мақсадида участка сайлов комиссияси аъзолари ўз фаолиятини бевосита Ўзбекистон Республикаси Марказий сайлов комиссияси ва туман сайлов комиссиясининг кўрсатмалари, топшириқлари асосида амалга оширишмоқда. Участка сайлов комиссияси раиси Равшан Ўрозбоева, раис ўринбосари Нилуфар Холбоева ҳамда котиб Насиба Ҳайитмуродовалар комиссия аъзолари билан ҳамкорликда тарғибот ва ташвиқот ишларини қизғин тарзда ташкил этишмоқда.

Айни пайтда участкада белгиланган навбатчилик жадвали асосида масъуллар ташриф буюраётган фуқаролар билан тушунтириш ишларини олиб боришмоқда. Шунингдек, комиссия аъзоларидан Марям Аҳмедова, Хайрулла Гулмонов, Дилдор Ўрозалиева, Наргиза Қурбонбоевалар сайловчиларни сайловчилар рўйхати билан таништириб, рўйхатдаги ноаниқликлар ҳақидаги аризаларни қабул қилишмоқда. Сайлов куни ўз яшаш жойида бўлиш ва овоз беришда қатнашиш имконияти бўлмаган сайловчилардан комиссия аъзолари Динора Қўчқорова, Ўткир Бобожонов, Бозорбой Холимбетов, Муқаддас Хўжаниёзовалар сайлов конвертларини қабул қилиб, тегишли ўзгартишлар киритиш масаласини ҳал қилишмоқда. Ундан ташқари, ҳудудларга бириктирилган масъуллар томонидан ҳам фуқароларни қизиқтирган саволларга тўлиқ ва батафсил жавоблар берилмоқда.

Участкага ташриф буюраётган фуқароларга, айниқса, биринчи марта овоз берадиганлар, нуронийлар, имконияти чекланган шахслар ҳамда ёшларга янги Сайлов кодексининг мазмун-моҳияти кенг тушунтирилиб, ҳуқуқий билимлари оширилмоқда. Ўтказилаётган тарғибот-ташвиқот тадбирлари давомида ҳар бир фуқаро сайловларда фаол иштирок этишга даъват этилмоқда ва уларда дахлдорлик туйғусини кучайтиришга алоҳида эътибор қаратилмоқда.

О.Худойберганова.