Такрорий овоз бериш ўтказилди

Барчамизга маълумки, жорий йилнинг 22 декабрь куни мамлакатимизда Олий Мажлис Қонунчилик палатаси, Қорақалпоғистон Pеспубликаси Жўқорғи Кенгеси, Халқ депутатлари вилоят, туман, шаҳар кенгашларига сайловлар бўлиб ўтди. 23 декабрь куни сайловнинг дастлабки натижалари эълон қилинди. Қонунга мувофиқ, номзодлардан бирортаси ҳам етарли овоз тўплай олмаган сайлов округларида 2020 йил 5 январь куни такрорий овоз бериш ўтказилди.

Маълумот ўрнида айтиш керакки, Сайлов кодексига биноан, Олий Мажлис Қонунчилик палатаси ва маҳаллий Кенгашлар депутатлари сайловида сайлов округи бўйича икки нафардан ортиқ номзод қўйилган бўлса, аммо улардан ҳеч бири сайланмаса, округ сайлов комиссияси энг кўп овоз олган икки нафар номзод бўйича округда такрорий овоз беришни ўтказиш ҳақида қарор қабул қилади ва бу ҳақда тегишли сайлов комиссиясини ҳамда округ сайловчиларини хабардор этади. Такрорий овоз беришда иштирок этган сайловчиларнинг овозини бошқа номзодга нисбатан кўпроқ олган номзод сайланган деб ҳисобланади. Такрорий овоз бериш асосий сайловдан кейин икки ҳафта муддат ичида ўтказилади. Такрорий овоз беришда сайловчиларнинг иштирок этиши фоизи ҳисобга олинмайди.

Ушбу кодексга кўра, такрорий овоз бериш асосий сайловни ўтказиш учун тузилган ўша сайлов участкаларида ва сайловчиларнинг ўша рўйхатлари бўйича ўтказилди.

Ўзбекистон Pеспубликаси Олий Мажлиси Қонунчилик палатасига сайлов ўтказувчи 25 та сайлов округларидаги 1730 та сайлов участкасида такрорий овоз бериш жараёни бўлиб ўтди.

Марказий сайлов комиссияси берган маълумотларга кўра, ушбу округлардаги сайловчилар сони жами 3 миллион 148 минг 921 нафарни ташкил этади.

Шунингдек, Қорақалпоғистон Pеспубликаси Жўқорғи Кенгеси, Халқ депутатлари вилоят кенгашларига сайлов ўтказувчи 95 та сайлов округидаги 1104 та сайлов участкасида ҳамда Халқ депутатлари туман ва шаҳар кенгашларига сайлов ўтказувчи 587 та сайлов округидаги 1117 та сайлов участкасида такрорий овоз бериш жараёни бўлиб ўтди.

Халқ депутатлари Амударё туман Кенгашининг 2 та сайлов округидаги 3 та сайлов участкасида бўлиб ўтган такрорий овоз бериш жараёнларида рўйхатга олинган сайловчилар сони 6827 нафар бўлиб, шундан 4607 нафар сайловчи сайловда иштирок этди. Жумладан, 24-Оқ олтин сайлов округида рўйхатга олинган 4377 нафар сайловчилардан 2922 нафари такрорий овоз беришда иштирок этди. Такрорий овоз бериш натижаларига кўра, ушбу сайлов округидан Тадбиркорлар ва ишбилармонлар ҳаракати – Ўзбекистон Либерал демократик партиясидан кўрсатилган номзод Маҳмуд Шерметов 2207 та овоз олди, бу жами овозларнинг 75,5 фоизини ташкил қилиб, у Халқ депутатлари туман Кенгаши депутатлигига сайланди.

Шунингдек, 2-Чордара сайлов округида рўйхатга олинган сайловчилар сони 2450 нафар бўлиб, шундан 1685 нафар сайловчи такрорий овоз беришда иштирок этди. Ушбу сайлов округидан Тадбиркорлар ва ишбилармонлар ҳаракати – Ўзбекистон Либерал демократик партиясидан кўрсатилган номзод Муяссар Pаҳматуллаева 1068 та овоз олиб, Халқ депутатлари туман Кенгаши депутатлигига сайланди. Бу эса жами овозларнинг 63,4 фоизини ташкил қилади.

Таъкидлаш керакки, сайловларнинг якуний натижаларига кўра, Халқ депутатлари туман Кенгаши депутатлигига Тадбиркорлар ва ишбилармонлар ҳаракати Ўзбекистон Либерал-демократик партиясидан 9 нафар, “Миллий тикланиш” демократик партиясидан 6 нафар, Халқ демократик партиясидан 6 нафар, “Адолат” социал-деморатик партиясидан 5 нафар, Экологик партиясидан 4 нафар номзод сайланди. Депутатларнинг 9 нафарини аёллар ташкил этади.

Чарос Арслонова, туман ҳокимлиги Ахборот хизмати раҳбари