Ёшлар ўртасида ҳуқуқбузарлик ва жиноятчиликнинг олдини олиш бўйича йиғилиш ўтказилди
Туман ҳокимлигининг кичик мажлислар залида Республика ишчи гуруҳининг оммавий учрашувлари доирасида Ўзбекистон Ички ишлар вазири ўринбосари, полковник Рустам Ҳотамов ёшлар иштирокида йиғилиш ўтказди. Унда Қорақалпоғистон Республикаси Ички ишлар вазири Айтбай Темирханов, Қорақалпоғистон Республикаси Ички ишлар вазири ўринбосари Ислом Аҳмедов, туман Ички ишлар бўлими бошлиғи Улуғбек Худойберганов ҳамда туманнинг фаол ёшлари, Пробация бўлими назоратидаги, уюшмаган, иш билан банд бўлмаган ёшлар қатнашишди.
Вазир ўринбосари Рустам Ҳотамов дастлаб, сўнгги йилларда Президентимиз томонидан ёшларга қаратилаётган эътибор, яратилаётган шарт-шароитлар ҳақида сўз юритди. Кўпчилик ёшлар асосан бекорчилиги, ҳуқуқий саводхонлигининг пастлиги, ўзи содир қилган ижтимоий хавфли қилмишини тўғри баҳолай олмаганликлари, ушбу ҳаракат жиноят ёки ҳуқуқбузарлик эканлигини англаб етмаганликлари оқибатида шу ишларга йўл қўйиб, жиноят содир этаётганлигини айтиб ўтди. Сўнгра, ёш авлод ўртасида ҳуқуқий онг ва ҳуқуқий маданиятни юксалтириш, уларга ҳар бир жиноят ёки ҳуқуқбузарликларнинг мазмун-моҳияти нимадан иборат эканлигини тушунтириш, ижтимоий-сиёсий фаоллигини ошириш, ўз вақтида жиноятчиликнинг олдини олишда муҳим аҳамият касб этишини таъкидлади.
Туман Ички ишлар бўлимининг хотин-қизлар масалалари бўйича катта инспектори Дилафрўз Шарифова ҳам тегишли ташкилотлар билан ҳамкорликда ёшлар жиноятчилигини барвақт профилактика қилиш бўйича ҳар ойда тарғибот декадалари, тушунтириш ишлари, турли лойиҳалар тизимли равишда ташкил этилаётганлигини, натижада туман ҳудудида ҳуқуқбузарлик ва жиноятларни камайтиришга эришилгани ҳақида маълумот берди. Шунингдек, туманда ёшлар бандлигини таъминлаш, уларни турли тўгаракларга жалб этиш ҳамда тарбияси оғир, жиноят содир этишга мойиллиги бўлган ёшларнинг ҳам эзгу ғоялари, ташаббуслари билан танишиб, уларни амалга ошириш учун кўмак берилаётгани, шароитлар яратилаётгани ҳақида гапирди.
Йиғилишда муқаддам жиноят содир этиб, туман Пробация бўлими назоратида турган 10 нафар ёшлар билан алоҳида суҳбат ўтказилди. Ҳозирги кунда уларнинг қандай ишлар билан бандлиги, яшаш шароитлари ва дуч келаётган муаммолар билан қизиқди. Уларга эндиликда фойдали меҳнат билан шуғулланиб, ўз ҳаётларини тўғри йўлга солишлари, жамият равнақига ўз ҳиссаларини қўшишлари кераклиги тушунтирилди.
Учрашув доирасидаги йиғилиш сўнгида ёшлар ҳаётидаги муаммоларга доир мурожаатларни тингланди. Иш билан банд бўлмаган ёшлардан 6 нафари бандлигини таъминлаш бўйича мурожаат қилди. Хитой овулида яшовчи Дониёр Ҳайитбоев эса ҳудуд ёшлари спорт билан шуғулланиши учун футбол майдончаси қурмоқчи эканлигини айтиб, кредит ва ер майдони ажратилиши масаласида кўмак сўради. Ёшларнинг мурожаатлар шу ернинг ўзида ўрганилиб, бу бўйича мутасадди раҳбарларга топшириқлар берилди ва ижроси назоратга олинди.
Барча учун қизиқарли ўтган тадбир давомида келажагимиз ёшлар қўлида бўлганлиги боис улар томонидан жиноят, ҳуқуқбузарлик эмас, эзгу ва бунёдкорлик ташаббуслари чиқиши кераклиги, бундай ишлар амалга оширилишини таъминлаш учун барчамиз бирдек ҳаракатда бўлмоғимиз кераклиги таъкидланди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
