Тадбиркорлар мурожаатларини кўриб чиқиш қабулхонаси томонидан 134 нафар тадбиркорнинг мурожаатлари ўрганилди
Мамлакатимизда сўнгги йилларда тадбиркорликни ривожлантириш, бизнес юритиш учун қулай шароит яратиш ва аҳолини тадбиркорликка кенг жалб этиш бўйича кўплаб фармон ва қарорлар қабул қилинди. Турли дастурлар доирасида тадбиркорлик истагидаги фуқароларни қўллаб-қувватлаш учун кредитлар ажратилди. Натижада юртимизда янгидан ташкил этилган тадбиркорлик субъектлари сони ўсди.
Ундан ташқари, Президентимизнинг ўтган йилги “Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида”ги фармони асосида жойларда Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари ташкил этилди. Қабулхоналарга асосий вазифа сифатида тадбиркорлик фаолиятини тобора кенгайтириш, улардаги муаммолар ечими билан тизимли ишларни ташкил этиш, энг асосийси уларни доимий қабул қилган ҳолда мурожаатларни кўриб чиқиш тизими белгилаб берилди.
Ўтган қисқа давр мобайнида Бош вазирнинг туманимизда ташкил қилинган Тадбиркорлар мурожаатларини кўриб чиқиш қабулхонасида ҳам тадбиркорлар қабул қилиниб, дуч келаётган муаммоларни ҳал этишда бир қанча ишлар амалга оширилди. Бугунги кунгача қабулхонага 134 нафар тадбиркорлар томонидан 144 та масала бўйича мурожаатлар келиб тушди. Мурожаатларнинг барчаси ўрганилиб, 87 таси ижобий ҳал этилди. Шундан 57 та мурожаат юзасидан эса ҳуқуқий тушунтиришлар берилди. Қабулхона масъуллари мурожаатлар юзасидан ижро жараёнларида ҳам бевосита иштирок этиб, уларнинг қисқа муддатларда ҳал қилинишини таъминлади.
“SARDOR BEGJON” оилавий корхонаси раҳбари Сарвар Бекчанов 2019 йилда ўзи яшайдиган Қиличбой овулида тадбиркорлигини кенгайтириш мақсадида “Обод қишлоқ” дастури доирасида аҳолига маиший хизмат кўрсатиш биносини қуриш учун ер майдони олган эди. Ушбу бино қуриб битказилганидан сўнг, тадбиркор электр таъминотига уланишда муаммога дуч келди. Бу муаммони ҳал қилишда кўмак сўраб, Ўзбекистон Республикаси Бош вазирининг тумандаги Тадбиркорлар мурожаатларини кўриб чиқиш қабулхонасига мурожаат қилди. Қабулхона томонидан электр тармоқлари корхонаси билан тизимли ишлар ташкил этилиши натижасида мурожаат қисқа муддатда ижобий ҳал этиб берилди.
Тўлқин овулида яшовчи “AMU-ANORLARI” маъсулияти чекланган жамияти раҳбари Пўлат Абдураҳмонов ҳам “Микрокредитбанк” туман филиалидан “Ҳар бир оила – тадбиркор” дастури доирасида анор кўчатларини олиш учун имтиёзли кредит олишда амалий ёрдам сўраб мурожаат қилди. Тадбиркорлар мурожаатларини кўриб чиқиш қабулхонасида ушбу мурожаат кўриб чиқилди ва “Микрокредитбанк” туман филиали томонидан 30 млн. сўм миқдорида кредит ажратилиб берилишида амалий ёрдам кўрсатилди.
“AMU SHAXJAXON” маъсулияти чекланган жамияти раҳбари Жаҳонгир Ражапов Беш том маҳалласи ҳудудида чинни маҳсулотларини ишлаб чиқариш цехини ташкил қилди. Ишлаб чиқарилган маҳсулотларни маҳаллий бозорга ва экспортга чиқаришни мўлжаллаётган тадбиркор цехни газ тармоғига улашда муаммоларга дуч келди. Шу сабабли у тумандаги Тадбиркорлар мурожаатларини кўриб чиқиш қабулхонасидан ушбу муаммони ҳал қилишда ёрдам сўради. Қабулхонада мурожаат кўриб чиқилиб, Қорақалпоғистон Республикаси «Ҳудудгаз Қорақалпоғистон» масъулияти чекланган жамияти томонидан қисқа муддат ичида газ тармоғига улаб берилди.
Қабулхона ходимлари томонидан мурожаатчиларга амалдаги қонунчилик асосида йўл-йўриқ ва тушунчалар берилиб борилмоқда. Айни пайтда қабулхона қошида “business.gov.uz” ягона интерактив портали фаолият кўрсатмоқда. Порталда мурожаатлар ва уларнинг ҳал этилиш саналари ҳамда ҳолати акс эттириб борилмоқда. Амалга оширилаётган бу каби ишлар туман аҳолиси ва тадбиркорлари фаолиятида ўзининг ижобий самарасини бериб келмоқда. Бу эса ўз навбатида тадбиркорлар сафи кенгайишига хизмат қилмоқда.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
