Янги таҳрирдаги Солиқ кодекси мазмун-моҳиятини тушунтиришга бағишланган тадбир ўтказилди

Ўзбекистон Республикаси Қонуни билан Солиқ кодексига ўзгартиш ва қўшимчалар киритилиб, унинг янги таҳрири тасдиқланди.

Қонунга кўра, ягона ижтимоий тўлов, ягона солиқ тўлови ва қатъий белгиланган солиқ ўрнига тегишлича ижтимоий солиқ, айланмадан олинадиган солиқ ҳамда қатъий белгиланган миқдорда жисмоний шахслардан олинадиган даромад солиғи киритилмоқда. Бутун мамлакатимиз бўйлаб, янги таҳрирдаги Солиқ кодекси ҳамда солиқ қонунчилигидаги ушбу ўзгаришлар мазмун-моҳиятини кенг жамоатчиликка етказишга қаратилган тарғибот тадбирлари ташкил этилмоқда.
Шундай тарғибот тадбирларидан бири туманимиздаги “Тамара-текстил” хусусий корхонасида ўтказилди.

Тадбиркорлар ва ишбилармонлар ҳаракати O'zLiDeP туман Кенгаши ва туман Давлат Солиқ инспекцияси билан ҳамкорликда тадбиркорлик субъектларида янги таҳрирдаги Солиқ кодекси мазмун-моҳиятини тушунтириш мақсадида ўтказилган мазкур тадбирда ёш тадбиркорлар ва тадбиркорлик фаолиятини бошлаш истагидаги ёшлар, корхона ишчилари иштирок этдилар.

Тадбирда партиянинг туман Кенгаши ва Солиқ инспекцияси масъуллари янги Солиқ кодексига киритилган ўзгартишлар, солиқ турлари, солиқ тўловчининг хуқуқлари, мажбуриятлари, солиқ мажбуриятини бажаришнинг тартиби, солиқлар ва бошқа мажбурий тўловларни тўлаш мажбурияти хақида тушунчалар бердилар.
Тадбир иштирокчиларига янги таҳрирдаги Солиқ кодексида тенглик, аниқлик, соддалик ва самарадорлик асос қилиб олинганлиги, ушбу кодекснинг янги таҳририда солиқ турлари 13 тадан 9 тага қисқартирилиб, ягона ер солиғи, давлат божи, божхона тўловлари, тадбиркорлик фаолиятининг айрим турлари бўйича қатъий белгиланган солиқлар бекор қилинганлиги бўйича киритилган ўзгартишлар ҳақида батафсил маълумот берилди. Шунингдек, кичик корхоналар учун айланмадан солиқ кўринишидаги алоҳида солиқ режими сақлаб қолинганлиги, олдинги тартибга кўра, корхоналар ўртасида ўзаро молиявий муносабатларга аралашган ҳолда, ҳосил бўлган дебиторлик қарздорлиги мажбурий ундирилганлиги тушунтирилди. Энди бу тартибдан воз кечилаётгани, яъни бир корхонанинг солиқ мажбурияти бошқа бирининг зиммасига туширилмаслиги ҳам айтиб ўтилди.

Тадбиркорлар ва ишбилармонлар ҳаракати O'zLiDeP туман Кенгаши аппарат раҳбари Муқаддас Бекназарова ҳам юртимизда солиқ тизимида амалга оширилаётган ўзгаришлар, тадбиркорларга яратилаётган имкониятлар ва Президентимиз Шавкат Мирзиёевнинг Олий Мажлисга қилган Мурожаатномаси ҳақида сўз юритди. Давлатимиз раҳбарининг Мурожаатномада 2020 йилда биринчи марта тадбиркорларга ички бозорда сотган маҳсулоти бўйича қўшилган қиймат солиғининг бир қисмини қайтариш тартиби жорий этилиши, тадбиркорларни қийнаётган ва ҳақли эътирозларига сабаб бўлаётган соҳа – лицензия ва рухсатномалар бериш тизими енгиллаштирилишини алоҳида эътироф этганлигини таъкидлади. Шу ўринда Президентимизнинг “…Биз янги иш ўринларини яратадиган тадбиркорларни ҳар томонлама қўллаб-қувватлашимиз, таъбир жоиз бўлса, уларни елкамизда кўтаришимиз керак”, деган фикрлари ҳар бир тадбиркор учун куч-қудрат ҳамда шижоат бағишлашини ҳам мамнуният билан тилга олди.

Янги таҳрирдаги Солиқ кодекси ҳамда солиқ қонунчилигидаги ўзгаришлар мазмун-моҳиятини тушунтиришга бағишланган тадбирда иштирокчилар етарли маълумотларга эга бўлдилар.

Чарос Арслонова, туман ҳокимлигининг Ахборот хизмати.