Маҳалла ва оилани қўллаб-қувватлаш бўлими қошидаги Ҳомийлик хайрияларини мувофиқлаштириш маркази қандай фаолият юритмоқда?

Коронавирус инфекцияси сабабли давом этаётган карантин даврида туманимиздаги кам таъминланган, якка-ёлғиз ҳамда ногиронлиги бўлган фуқароларнинг ҳолидан хабар олиш ҳамда озиқ-овқат хавфсизлигини таъминлаш мақсадида туман Маҳалла ва оилани қўллаб-қувватлаш бўлими қошида жамоатчилик асосида Ҳомийлик хайрияларини мувофиқлаштириш маркази ташкил этилган эди. Навбатдаги лавҳамиз мазкур марказнинг фаолияти хусусида.

Манғит шаҳрининг Қиличбой кўчасида, Болалар ва ўсмирлар спорт мактаби  биносида жойлашган мазкур марказ ҳомийлар билан доимо гавжум бўлади. Марказга ўз фаолиятини амалга ошириши учун 2 та “Дамас” русумли автотранспорт воситаси ажратилди ҳамда Маҳалла ва оилани қўллаб-қувватлаш бўлими, Ёшлар иттифоқи туман Кенгаши томонидан кўнгилли волонтёрлар бириктирилган. Эҳтиёжманд оилалар билан мулоқот қилиш учун 515 49 29, 515 40 21 телефон рақамлари узлуксиз хизмат кўрсатмоқда. Марказ ишини юритишга туман  Маҳалла ва оилани қўллаб-қувватлаш бўлими ходими Мадамин Казаков масъул қилиб бириктирилган. Ёшлар иттифоқи туман Кенгаши волонтёрлари Мақсуд Ражапов, Равшанбек Рейимов, Бекзод Эркаев, Азамат Хидиров, Шуҳрат ва Ҳасан Якубовлар, туман Халқ таълими бўлимидан Фарҳод Жумабоев, Музаффар Мадаминов, мактабгача таълим бўлимидан Соатбой Мадраимовлар мурожаатларни қабул қилишда ҳамда маҳсулотларни аҳоли хонадонларига етказиб беришда яқиндан кўмак беришмоқда. 

Коронавирус пандемияси даврида туман аҳолисини, биринчи навбатда, ёрдамга муҳтож бўлган оилаларни озиқ-овқат маҳсулотлари билан бепул таъминлаш чоралари кўрилмоқда. Жумладан, дастлаб маҳаллалардаги кам таъминланган, ижтимоий ҳимояга муҳтож, ногиронлиги бўлган оилалар, якка-ёлғиз кексалар рўйхати шакллантирилиб, эҳтиёжманд оилаларга тадбиркорлар ва кўнгиллиларнинг хайрияларидан йиғилган озиқ-овқат маҳсулотлари тизимли равишда етказиб берилмоқда.

Марказга жорий йил 5 май ҳолатига жами 2223 килограмм ўсимлик ёғи, 22 минг 620 килограмм ун, 1352 килограмм шакар, 1336 килограмм макарон, 2808 килограмм картошка, 469 килограмм пиёз, 1161 килограмм гуруч, 200 килограмм мош, 3000 дона тиббий ниқоб, 45 та турли гигиена воситалари, 2592 килограмм сабзавот маҳсулотлари йиғилди.

Марказ томонидан асосан 1197 қисқа рақамига мурожаат қилган 704 нафар фуқаролардан ҳақиқатда эҳтиёжманд деб топилган 345 нафарига ҳамда фуқаролар йиғини тавсиясига асосан ёрдам кўрсатилди. Ўз маҳалласига ҳомийлик қилишни истаган тадбиркорлар ҳамда марказ ҳамкорлигида Ўзбекистон маҳалласи ҳудудидаги 300 та оилага, Дурунки маҳалласи ҳудудидаги 300 та оилага, Ўрта қалъа овули ҳудудидаги 200 та оилага, турли озиқ-овқат маҳсулотлари етказиб берилди.

Шунингдек, 1182 нафар кам таъминланган, ижтимоий ҳимояга муҳтож ногиронлиги бўлган, боқувчисини  йўқотган оилаларга 3400 килограмм олма ва 1200 килограмм узум маҳсулотлари, 113 нафар якка-ёлғиз ва ўзгалар парваришига муҳтож ногирон кексаларга 336 килограмм олма ва узум, 226 килограмм шакар маҳсулотлари етказиб берилди. Ҳозирги кунда марказда 870 килограмм ун, 730 литр ўсимлик ёғи, 104 килограмм шакар, 1800 килограмм сабзи, 65 килограмм картошка маҳсулотлар заҳираси мавжуд. Бу маҳсулотлар эҳтиёжмандлиги аниқланган оилаларга етказиб берилади.

Маҳалла ва оилани қўллаб-қувватлаш бўлими қошида жамоатчилик асосида ташкил қилинган Ҳомийлик хайрияларини мувофиқлаштириш маркази ҳамда ҳомийларнинг хайриялари муҳтож оилаларни қўллаб-қувватлашда муҳим восита бўлмоқда.

Ойгул РАЖАБОВА