Халқ қабулхонаси карантинда аҳоли мурожаатларини масофадан қабул қилиб, ҳал этилишига кўмаклашмоқда

Юртимизда бугунги пандемия даврида барча ишхоналарда иш жараёнлари карантин қоидаларига қатъий амал қилган ҳолда ташкил қилинмоқда. Шу жумладан, карантин шароитида вилоят, туман, шаҳар Халқ қабулхоналарида фуқаролардан келиб тушаётган мурожаатларни қабул қилиш учун “онлайн конференциялар” ва “ишонч телефонлари” ташкил қилиниб, барча ҳудуддаги Қабулхоналар биноси олдида мурожаатлар учун махсус қутилар ўрнатилди.

Мамлакатимиз аҳолисига бугунги вазият сабабли уйдан чиқмаган ҳолда телефон орқали ҳам Халқ қабулхоналарига мурожаат қилишига шароит яратилди. Фуқароларга янада қулай бўлиши учун қабулхонага келган мурожаатчилар билан видеоконференцалоқа тизими воситасида мулоқот йўлга қўйилди. Қабулхонага келган ҳар бир мурожаатчи тиббиёт ходимлари томонидан текширувдан ўтказилиб, зарур дезинфекция ишлари олиб борилмоқда.

Шунингдек, тумандаги Халқ қабулхонасида ҳам карантин даврида фуқаролар мурожаатларини электрон почта қутиси ҳамда телефон орқали билдиришлари учун барча шароитлар яратилиб, бу борадаги ишлар тартиб-қоидаларга амал қилинган ҳолда ташкил қилинмоқда.

Карантин эълон қилинганидан шу кунга қадар туман Халқ қабулхонасига озиқ-овқат маҳсулотлари, дори-дармон, моддий ёрдамга муҳтожлик ва шу каби карантин билан боғлиқ бўлган жами 15 та мурожаатлар келиб тушган бўлиб, ушбу мурожаатлар тегишли идоралар билан ҳамкорликда ижобий ҳал қилинди.

  Шунингдек, қабулхона томонидан аҳолининг ижтимоий ҳимояга муҳтож қатламини қўллаб-қувватлаш, эҳтиёжманд оилаларга ҳар томонлама кўмак бериш борасида ҳам самарали ишлар қилинмоқда. Тумандаги ногиронлиги бўлган ва ижтимоий кўмакка муҳтож фуқароларнинг пандемия даврида ижтимоий-иқтисодий аҳволини яхшилаш мақсадида 25 нафар фуқароларнинг яшаш хонадонларига бориб, турмуш тарзи ўрганиб чиқилди ҳамда ун, картошка, ўсимлик ёғи ва бошқа турдаги озиқ-овқат маҳсулотлари етказиб берилди. Халқ қабулхонасида карантингача бўлган даврда келиб тушган мурожаатлар асосида ижтимоий ҳимояга муҳтож 89 та оилаларнинг ҳолидан ҳабар олиниб, хонадонларга озиқ-овқат маҳсулотлари етказиб берилди.

Қолаверса, туман Маҳалла ва оилани қўллаб қувватлаш бўлимига 1197 ишонч телефони орқали жами 793 та мурожаатлар келиб тушган бўлса, шундан 628 та оилаларга, озиқ-овқат маҳсулотлари берилиб, қолган 165 нафар фуқароларнинг оилавий шароити ўрганиб чиқилиб, рўйхат асосида озиқ-овқат маҳсулотлари билан таъминлаш ишлари давом этмоқда. Маҳаллалар фуқаролар йиғинлари раисларининг тавсияларига асосан 305 та оилаларга озиқ-овқат маҳсулотлари берилган.

Таъкидлаш жоизки, Ўзбекистон Республикаси Президентининг тумандаги Халқ қабулхонаси билан маҳалла фуқаролар йиғинлари ўртасида ўрнатилган доимий онлайн мулоқот ҳудудлардаги мавжуд реал ҳолатни мунтазам мониторинг қилиб бориш, мурожаатларни тезкор кўриб чиқиш ва ҳал қилиш учун масъулларни белгилаш ҳамда ижросини назорат қилиш имконини бермоқда. Қабулхона томонидан банд бўлмаган аҳолининг бандлигини таъминлаш, бўш иш ўринларига ишсиз фуқароларни жойлаштириш борасида ҳам туман Бандликка кўмаклашиш ва аҳолини ижтимоий муҳофаза қилиш маркази билан ҳамкорликда самарали ишлар қилмоқда.

Чарос Арслонова, туман ҳокимлигининг Ахборот хизмати.