ЯНГИ ҲИСОБЛАГИЧЛАРНИНГ АФЗАЛЛИГИГА БАҒИШЛАНГАН МАТБУОТ АНЖУМАНИ ЎТКАЗИЛДИ

Жорий йилнинг 27 ноябрь санасида Амударё тумани электр таъминоти корхонасида Ўзбекистон Республикаси Президентининг “Ёқилғи-энергетика соҳасида ўзаро ҳисоб-китобларни янада такомиллаштириш ва молиявий барқарорликни ошириш чора-тадбирлари тўғрисида”ги Фармони мазмун-моҳиятига оммага етказиш, фармон билан белгиланган вазифалар ижросини таъминлашга бағишланган онлайн матбуот анжумани бўлиб ўтди. Онлайн матбуот анжуманида “Қорақалпоқ ҳудудий электр тармоқлари” акциядорлик жамияти бош директори Зийнаддин Керимзатов, “Тахиатош иссиқлик электр станцияси” акциядорлик жамияти бош директори Фаҳриддин Халиллаев, “Ўзбекистон миллий электр тармоқлари” Қорақалпоғистон филиали директори Сергей Умбетов, республикадаги оммавий ахборот воситалари вакиллари, блогерлар қатнашдилар. Шунингдек, туманлардаги ҳудудий электр таъминоти корхоналари ходимлари, маҳаллалар раислари, маҳаллий оммавий ахборот воситалари вакиллари онлайн тарзда  иштирок этдилар.

Матбуот анжуманида сўз олган масъуллар мамлакатимизда давлатнинг иқтисодиётдаги иштирокини қисқартириш, ёқилғи-энергетика комплексига ва иқтисодиётнинг бошқа асосий тармоқларига хорижий инвестицияларни фаол жалб қилиш бўйича институционал ва таркибий ислоҳотлар жадал суръатлар билан олиб борилаётганлигини таъкидладилар.

Шу билан бирга, ёқилғи-энергетика соҳаси бошқарув тизимини ислоҳ қилиш ва тариф сиёсатини такомиллаштириш соҳа корхоналарининг молиявий барқарорлигини таъминлаш, улар ўртасидаги ўзаро ҳисоб-китобларни яхшилаш, электр энергияси, табиий газ ва иссиқлик энергияси ишлаб чиқарувчилари ўртасидаги дебитор ва кредитор қарздорликни қисқартириш орқали ишлаб чиқариш самарадорлигини ошириш, шунингдек, ушбу соҳада молиявий интизомни янада мустаҳкамлаш мақсадида “Ёқилғи-энергетика соҳасида ўзаро ҳисоб-китобларни янада такомиллаштириш ва молиявий барқарорликни ошириш чора-тадбирлари тўғрисида”ги Фармони қабул қилинганини қайд этдилар.

Шунингдек, анжуманда эндиликда жорий этилаётган янги тизим электр энергиясини ҳисобга олиш ва назорат қилишнинг автоматлаштирилган тизимининг маиший истеъмолчилар учун афзалликлари хусусида сўз юритилди. Хусусан, мазкур тизим ишга туширилганидан кейин истеъмолчилар электр таъминоти корхонаси ёки банклар эшигида узундан-узун навбатларда туришмайди. Электр ҳисоблагичларнинг кўрсаткичларини суратга олиб, Мажбурий ижро бюросида ниманидир исботлашга мажбур бўлишмайди. “Ҳисоблагичингиз кўрсаткичини ёзиб олай”, деб ҳеч ким истеъмолчини безовта ҳам қилмайди. Қолаверса, ҳисоблагич ўрнатилгач, янги тизимга уланади, код киритилиб, ҳисоб рақам очилади. Истеъмолчиларга SMS хабар орқали барча маълумотлар автоматик тарзда етказиб турилади. Мобиль телефон рақамига уланиши тўловни уйдан чиқмай “on-line” режимида амалга ошириш имконини беради. Энг муҳими, “шахсий кабинет” орқали ҳар бир истеъмолчи қанча электр энергияси сарфлаганини кузатиб туриш имконига эга бўлади.

Шу билан бирга  янги тизимда ҳисоблагичдаги маълумотларни компьютер назорат қилади. Электр таъминоти корхонаси ходимлари уйма-уй юришга кетадиган вақтини тармоқларнинг техник ҳолатини яхшилашга сарфлайди. Шунингдек, истеъмол қилинган энергия ҳақидаги маълумотларни йиғишда инсон омили таъсири камаяди. Фойдаланиш жараёнида сансалорлик ва бюрократия камроқ – янги авлод ҳисоблагичлари 10 йилда бир маротаба қиёсловдан ўтказилади.

Янги «ақлли» ҳисоблагичнинг яна бир хусусияти шундаки, маълумотларни сохталаштиришга уриниш, яъни ҳисоблагичга таъсир ўтказиш ҳолатлари юзага келса, дарҳол ўчади ва тизимга хабар жўнатади. Истеъмолчи энергия тўлови тўланмаган тақдирда масофадан ўчиш хусусиятига ҳам эга.

Матбуот анжуманида Қорқалпоғистон Республикасидаги 8 та туман ушбу янги тизимга ўтказилгани қайд этилди ва бу борада юзага келаётган муаммолар, тушунмовчиликлар кенг муҳокама қилинди. Оммавий ахборот воситалари вакиллари томонидан янги тизим хусусида берилган турли саволларга, масъуллар томонидан аниқ жавоблар қайтарилди.

Айтиш керакки, жорий йилнинг шу даврига қадар туманимиздаги 6 минг 778 та электр энергияси истеъмолчиларининг жами 2 млрд 43 минг сўм миқдоридаги қарздорлиги мавжуд бўлиб, туманимиз ушбу янги ҳисоблагич тизимига ўтказилганидан кейин ушбу қарздорлиги бўлган истеъмолчилар автоматик тарзда тармоқдан узилади. Қардорлиги бартараф қилинган истеъмолчилар шу заҳотиёқ тармоққа уланади.

Чарос Арслонова, туман ҳокимлигининг Ахборот хизмати раҳбари.