“ЗЎРАВОНЛИКСИЗ ОИЛА – СОҒЛОМ ОИЛА” МАВЗУСИДА КЎРГАЗМАЛИ ЎҚУВ-СЕМИНАР ЎТКАЗИЛДИ

Инсон ҳуқуқ ва эркинликларини, қонуний манфаатларини таъминлашга устувор аҳамият қаратилаётгани натижасида оилага, аёл зотига бўлган муносабат ўзгариб, уларга ҳурмат-эҳтиром кўрсатиш ҳаётимизнинг маъно-мазмунига, асосий мақсадига айланди.
Аёл гўзал бўлса – олам гўзал, аёл бахтли бўлса – оила, бутун жамият бахтли бўлади. Бугун Ўзбекистонда яшаётган ҳар бир аёл, чин маънода бахтли. Зеро, унинг ҳуқуқ ва эркинликлари қонунлар билан мустаҳкамланган.
Ўзбекистон тарихида илк бор 2019 йилнинг 2 сентябрида “Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида”ги ва “Хотин-қизларни тазйиқ ва зўравонликдан ҳимоя қилиш тўғрисида”ги Қонунлар қабул қилинди. Ушбу қонун хужжатлари хотин-қизларни турмушда, иш жойларида, таълим муассасаларида ва бошқа жойларда тазйиқ ва зўравонликдан ҳимоя қилиш соҳасидаги муносабатларни ҳам тартибга солади. Тазйиқ ва зўравонликни бошидан ўтказган шахсларни ҳимоя қилиш, жамиятда аёлларга нисбатан тазйиқ ва зўравонликнинг ҳар қандай шаклига муросасиз муҳитни қарор топтиришни кафолатлайди.
Ўзбекистон Республикаси Гендер тенгликни таъминлаш масалалари бўйича комиссиясининг 5-сонли баёнида ҳар бир вилоятда танлов асосида битта туман маркази фаолиятини намунали йўлга қўйиб, улар негизида ҳудудлардаги марказлар ходимлари учункўргазмали ўқув-семинари ўтказиш белгиланган эди. Қорақалпоғистон Республикаси бўйича зўрлик ишлатишдан жабр кўрган шахсларни реабилитация қилиш ва мослаштириш, ўз жонига қасд қилишнинг олдини олиш маркази Амударё туман бўлинмаси намунали деб топилди ва 2021 йил 20 февраль куни “Зўравонликсиз оила – соғлом оила” мавзусида  кўргазмали ўқув-семинар бўлиб ўтди.

Семинарга Қорақалпоғистон Республикаси зўрлик ишлатишдан жабр кўрган шахсларни реабилитация қилиш ва мослаштириш, ўз жонига қасд қилишнинг олдини олиш маркази директори Сайёра Насирова, малакали психолог Роза Аманова, Нукус шаҳар, Хўжайли, Қораўзак, Тахиатош, Беруний, Эллиқалъа туманлари ижрочи директорлари, масъул ходимлари ва жамоатчилик асосида бириктирилган мутахассислар қатнашдилар.
Кўргазмали ўқув-семинар марказнинг жиҳозланиши, моддий-техник базаси ва иш услубининг Низом талабларига мос келиши, ҳужжатлар юритилиши билан танишишдан бошланди.  Семинар иштирокчилари марказнинг жиҳозланиши билан яқиндан танишдилар ва ўзларини қизиқтирган саволларга жавоб олдилар.   
Шундан кейин “Зўравонликсиз оила – соғлом оила” мавзусидаги кўргазмали ўқув-семинарининг иккинчи қисми туман ҳокимлиги биносида давом эттирилиб, марказнинг туман бўлинмаси ижрочи директори Гавҳар Чимбайчиева, Қорақалпоғистон Республикаси маркази директори Сайёра Насирова, психолог Роза Аманова, туман тиббиёт бирлашмаси бошлиғи ўринбосари, бош педиатр Гулшод Юсуповалар маърузалар қилдилар.  Маърузалар юзасидан қизғин мунозаралар давомида иштирокчилар аёлларга нисбатан зўравонлик ҳолатларининг олдини олиш соҳасидаги ижобий ютуқлари, хусусан, туманда аёлларнинг ижтимоий мослашув маркази ташкил этилгани, маиший зўравонлик қурбони бўлган аёллар учун ягона “ишонч телефон” рақамлари ишга туширилгани, оғир ҳаётий вазиятга тушиб қолган аёллар учун психолог, ҳуқуқшунос маслаҳатларининг ташкил этилганлиги, зўравонликнинг олдини олиш бўйича ташвиқот ишлари кучайтирилганлиги қайд этилди.
Кўргазмали ўқув-семинар якунида иштирокчилар зўравонлик масалалари бўйича аҳолининг хабардорлигини ошириш, шунингдек, давлат, ҳуқуқ-тартибот ҳамда ННТларнинг зўравонликнинг ҳар қандай турининг олдини олишга қаратилган ҳамкорликларини кучайтириш лозимлигини таъкидладилар.

Гавҳар ЧИМБАЙЧИЕВА, Республика зўрлик ишлатишдан жабр кўрган шахсларни

реабилитация қилиш ва мослаштириш, ўз жонига қасд қилишнинг

олдини олиш маркази Амударё туман бўлинмаси ижрочи директори.