ЭНГ ТЕЖАМКОР ОИЛА
(Ҳажвия)
“Бештерак” маҳалласида “Энг тежамкор оила” номли танлов ўтказилди. Алоҳида комиссия аъзолари уч гуруҳга бўлинган ҳолда кеча-ю кундуз юриб, навбатма-навбат кузатувлар олиб боришди. Барча диққат-эътибор электр энергиясини тежашга қаратилди.
Ниҳоят танлов натижалари эълон қилинадиган кун ҳам етиб келди. Бу мажлисга маҳалла аҳли тўлиқ қатнашди.
– Ҳурматли маҳалладошлар, – деб тантанали равишда сўз бошлади маҳалла оқсоқоли – мана, танлов ниҳоясига етди. Ҳозир кузатув олиб борган ҳар учала гуруҳ раҳбарларига навбати билан сўз берамиз. Улар ўз кузатувлари натижаларини баён қилишади. Сўз биринчи гуруҳ раҳбарига!
Биринчи гуруҳ раҳбари томонидан диққатга сазовор деб топилган оила аъзолари умуман газета-журнал ўқимас, телевизорда кўрсатилаётган воқеа-ҳодисаларга ишонмаганлигидан умуман телевизор ҳам кўрмас эканлар.
– Демак, – хулоса қилди у, – биринчи ўринга шу оила муносиб!
Номи зикр этилган оила аъзолари қувончдан бир қалқиб тушишди. Ахир ҳар ишда ҳам бир ҳикмат бор-да! Кундуз уй ишлари билан овора бўлса, кечаси ток кетказиб, газета-журнал ўқимаса, телевизор кўрмаса, нима бўлибди, мана номи яхшилар қаторида чиқиб турибди.
– Ғолибликка бизнинг томонимиздан кўрсатилажак оила муносиб, – деди иккинчи гуруҳ бошлиғи бироз керилиб, – бу оила аъзолари мана бир ярим ойдан бери уйларига тортилган электр симлари узилганига эътибор бермай, электрсиз ўтиришибди. Агарда электр тармоқлари идорасидан монтёрлар ўзлари келиб улаб кетишмаганида ҳалиям электрни тежаб ўтиришган бўларди. Ана тежамкорлик!
Учинчи гуруҳ аъзолари эса барчани ҳайратда қолдириб, бош соврин Мади пиённинг оиласига берилиши кераклигини таъкидлашди. Улар Мади пиённинг уйида шу ўтган икки ой давомида бирор марта ҳам электр чироғи ёнмаганлигини бир оғиздан тасдиқлашди.
Хуллас, узоқ тортишувлардан кейин бош совринга Мади пиён эга чиқди.
Хотини аразлаб, уч ой бурун онасиникига кетиб қолганига хафа бўлиб, кеча-ю кундуз ичиб, уйига ҳам келмай, дуч келган жойда ётиб юрган Мади пиённинг қувончи чексиз эди. Ахир унинг шу ҳаёт тарзи танловнинг қатъий талабига тўлиқ жавоб берган эди.
Йиғилганлар танлов натижасидан норози бўлишиб, ғала-ғовур кўтаришди.
– Хафа бўлманглар, – дея уларни юпатди маҳалла оқсоқоли, – яқинда “Энг жим-жит оила”, “Қўшниси билан уришмайдиган оила” танловларини ўтказамиз, ўшанда сизлар ҳам, албатта, ғолиб бўласизлар!
Йиғилганлар бош совринни олиб гандираклаганича кетаётган Мади пиёнга ҳадик билан қараб қўйишди. Уларнинг қарашларида “бу кетишда навбатдаги совринни ҳам шу эгалламаса эди”, деган хавотир бор эди.
Ахир хотинсиз уйда на шовқин-сурон, на қўшни билан жанжал бўлмаслиги барчага аён-ку!
Мади пиён эса дунё ташвишларидан бехабар, парвойи-палак кетиб борарди...
Ўрозали РЕЙИМОВ.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
