Амударё тумани ИИБ бошлиғининг ҳуқуқбузарлик ва жиноятчиликнинг олдини олиш бўйича аҳолига мурожати

Ассалому алайкум, ҳурматли юртдошлар!

Амударё туманида ҳуқуқбузарлик ва жиноятчиликнинг олдини олиш бўйича ҳуқуқни муҳофаза қилувчи идоралар, сектор бошлиқлари ҳамда жамоатчилик билан биргаликда профилактик ва манзилли чора-тадбирлар амалга оширилмоқда.

Ўтган 5 ой давомида ҳисобга олинган жиноятларни таҳлил қилганимизда, баданга ҳар хил даражадаги жароҳат етказиш, фирибгарлик, ўғирлик, гиёҳвандлик ва ҳаттоки қотиллик жиноятлари содир қилингани ҳар биримизни ташвишга солиши шубҳасиз.

Бу биринчи навбатда биз – ҳуқуқни муҳофаза қилиш органлари ходимларининг амалга ошираётган ишларимиз етарли даражада эмаслигини кўрсатади. Шу сабабли 5 ой якуни бўйича жиноятчилик аҳволи муҳокама қилиниб, ҳуқуқни муҳофаза қилувчи идоралар ва сектор бошлиқлари билан биргаликда, бугунги кун талабидан келиб чиқиб, жиноятни жиловлашнинг “маҳаллабай”, “оилабай” ишлаш тизими ишлаб чиқилди. Ҳар бир маҳаллага, ушбу ҳудудда содир бўлган жиноят турларидан келиб чиқиб йўл хариталари ишлаб чиқилиб, ижрога қаратилди.

Ҳурматли амударёликлар!

Содир бўлаётган жиноятлар аҳволидан келиб чиқиб, Сизларга қуйидаги “профилактик огоҳлантириш мурожаатини” йўлламоқчимиз.

Фирибгарлик билан шуғулланувчи шахсларнинг тасирига тушиб қолмаслик учун, танишлари орқали ишга жойлаштириш, ер майдонини олиб бериш, пулларингизни икки баробар фойдаси билан қайтариш, халқаро интернет савдо каналлари орқали номингизга микроқарз ёки кредит олиб, пулларни ўз вақтида тўлашни ваъда қилаётганларга, арзон нархда, имтиёзли равишда автомашина олиб беришни ваъда қилувчи шахсларга, чорва молларингизни қиммат нархда сотиб беришни ваъда қилиб қарзга олувчи шахсларнинг тегишли ҳужжатлари бўлмаса, уларга ишонмасликларингизни сўраймиз.

Ҳар ҳил компьютер ўйинлари, виртуал спорт мусобақалари бўйича қимор ўйинларига қатнашманг. Сизларга пул мукофотларини ўтказиб беришни ваъда қилиб, банк пластик картангизнинг рақамлари, код ва паролларини сўровчи бошқа шахсларга маълумот берманг.

Уй-жой, ер майдони, кўчмас мулк сотиб олишда огоҳ бўлинг, ушбу мулкларнинг эгалари ва тегишли ҳужжатлари борлигига давлат идоралари орқали аниқлик киритгандан сўнгина тўловни амалга оширинг.

Психотроп моддаларнинг қонунга ҳилоф равишда сотилишига, айниқса ёшларимиз орасида бундай ёт иллатлар кенг тарқалишига қарши курашишда фаол қатнашишга чақирамиз. Бундай ҳолатлар бўйича ҳар қандай маълумотга эга бўлсангиз, зудлик билан ҳудудий ички ишлар идораларига хабар беринг. Хабар берган шахслар тўғрисида маълумотлар сир сақланади.

Ҳурматли юртдошлар!

Интернет тармоқлари орқали ўзга шахслар билан танишишда, уларга ўзингиз тўғрингизда маълумотлар, расмлар беришда, профилингизга расмлар жойлаштиришда эҳтиёткорлик чораларига эътибор беришингизни сўраймиз.

Ўғирлик жиноятидан жабрланиб қолмаслик учун яшаш жойингизда эшик ва деразаларнинг мустаҳкамлигига эътибор қаратиб, видеокузатув камералари ва қўриқлаш ҳизматининг имкониятларидан фойдаланишни тавсия этамиз.

Транспорт воситаларини қаровсиз ёки салонида пул, қимматбаҳо буюмлар билан қолдирманг. Чорва молларни дала майдонида қаровсиз қолдирмасликка чақирамиз.

Оилаларда, танишларингиз орасида ер, сув, уй-жой ва бошқа масалаларда низолар пайдо бўлса зудлик билан ҳудудий ички ишлар идораларига хабар беринг. Бундай масалаларни ҳуқуқни муҳофаза қилувчи идоралар ва маҳалла вакиллари билан биргаликда ҳал этишга ҳаракат қилинг.

Автомашина бошқаришда йўл ҳаракати қоидаларига қатъий амал қилинг, йўл ҳаракати иштирокчиларига ҳурмат билан муносабатда бўлинг. Сабаби, йўлдаги ҳар бир қоидабузарлик мудҳиш, аянчли оқибатларга олиб келиши мумкинлигини ҳеч қачон эсингиздан чиқарманг. Фарзандларингизни йўлнинг қатнов қисмига яқин жойларда қаровсиз қолдирманг.

Ҳурматли ватандошлар!

Ҳуқуқбузарликлар ва жиноятчиликнинг олдини олишда биз – ҳуқуқни муҳофаза қилувчи идоралар вакиллари Сиз азизларнинг ёрдамингизга ишонамиз ва суянамиз. Давлат органлари, секторлар, жамоатчилик вакиллари ва фидоий фуқаролар билан биргаликда тегишли чора-тадбирларни амалга ошириш орқали туманимизни, ҳар бир овул ва маҳаллани, ҳар бир оилани жиноятдан ҳоли ҳудудга айлантиришимизга ишонаман.

Сизларни мазкур профилактик чора-тадбирларда фаол иштирок этишга чақириб қоламиз.

Улуғбек Худойберганов, Амударё тумани ИИБ бошлиғи