Чойкўл овулида йўл-транспорт ҳодисаси муҳокамасига бағишланган йиғилиш ўтказилди

Сўнгги йилларда бутун дунёда аҳоли сонининг тобора ортиб бораётгани туфайли инсонларнинг транспорт воситаларидан фойдаланиш эҳтиёжларининг ошишига олиб келмоқда. Автотранспорт воситаларига бўлган талаб ва эҳтиёжнинг ошиши эса йўлларда ҳайдовчи ҳамда пиёдаларнинг ҳаракатланишларида кўплаб ноқулайликлар ҳамда қийинчиликларни келтириб чиқармоқда.

Ачинарлиси шундаки, олиб борилаётган профилактика тадбирларига қарамасдан, автоулов бошқарувчиларининг автотранспорт воситаларидан нотўғри фойдаланишланишлари, ҳайдовчи ва пиёдаларнинг эътиборсизликлари оқибатида натижаси оғир бўлган йўл-транспорт ҳодисаларининг содир этилиши ҳолатлари тобора ортиб бормоқда. Жабрланганларнинг асосий тоифасини болалар ташкил қилиши эса киши кўнглини хира қилади. Маълумотларга кўра, ҳар йили мамлакат кўчаларида ва йўлларида минглаб вояга етмаган йўл ҳаракати иштирокчилари ҳалок бўлишади ва жароҳат олишади.

Жорий йилнинг 9 октябрь санасида Амударё тумани Чойкўл овулида ана шундай аянчли оқибатга олиб келган йўл-транспорт ҳодисаси муҳокамаси бўлиб ўтди. Муҳокамада туман ҳокими ўринбосари, Маҳалла ва оилани қўллаб-қувватлаш бўлими бошлиғи Алишер Йўлдашев, туман Ички ишлар бўлими бошлиғи Улуғбек Худойберганов, туман Йўл-ҳаракати хавфсизлиги гуруҳи бошлиғи Дилшод Аминов, овул фуқаролар йиғини масъул ходимлари, овул фаоллари иштирок этдилар.

Мазкур йиғилишда жорий йилнинг 8 октябрь куни Тошёп овулида яшовчи фуқаролардан бири турмуш ўртоғи номида бўлган “Спарк” русумли автотранспорт воситасини спиртли ичимлик ичган ҳолда бошқариши натижасида Чойкўл овули ҳудудидан ўтган йўлда бошқарувни йўқотиши оқибатида ўзи билан бир йўналишда ҳаракатланаётган трактор тиркамасига урилиб, йўл транспорт ҳодисаси содир этганлиги ҳолати муҳокама қилинди.

Муҳокамада қайд этилишича, мазкур йўл-транспорт ҳодисаси оқибатида “Спарк” русумли транспорт воситасида йўловчи сифатида ҳаракатланаётган, йўл-транспорт ҳодисаси содир этган шахснинг 11 ёшли вояга етмаган фарзанди автоҳалокат қурбони бўлган. Йиғилишда бу каби аянчли оқибатларга олиб келувчи йўл-транспорт ҳодисалари содир этилишининг олдини олиш борасида профилактика тадбирларини янада кучайтириш лозимлиги, ҳар бир фуқаро йўлларда келиб чиқаётган ҳалокатларни камайтиришда ўз ҳиссасини қўшиши лозимлиги, овул ва маҳаллаларда бу борада тушунтириш ва тарғибот тадбирларини янада кучайтириш зарурлиги алоҳида таъкидланди.

Қайд этилганидек, бу каби йўл-транспорт ҳодисалари содир этилишининг асосий омилларидан бири йўл ҳаракати қоидаларига риоя қилмаслик ҳисобланади. Транспорт воситалари бошқарувчиларининг йўл ҳаракати тақиқланган сигналга ўтиш, тақиқланган жойларда қувиб ўтиш, маст ҳолатда автоуловни бошқариш, белгиланган тезликка амал қилмаслик каби йўл ҳаракати қоидаларини бузишлари оқибати аянчли бўлган автоҳалокатларни келтириб чиқармоқда.

Шунингдек, пиёдалар томонидан ҳам йўл белгиларига ва светофорларга эътибор бермасликлари, пиёдалар ўтиш йўлакларида ҳаракатланмасликлари каби йўл ҳаракати қоидаларини бузиш ҳолатлари натижасида ҳам кўплаб йўл-транспорт ҳодисалари келиб чиқмоқда.

Муҳокама мобайнида масъуллар йўл транспорт ҳодисаларининг барвақт олдини олиш бўйича профилактик тадбирларнинг янада оширилиши зарурлиги хусусида тўхталиб, содир этилган йўл-транспорт ҳодисаси, унга имкон берган шарт-шароитлар ва сабабларни атрофлича муҳокама қилдилар. Фуқароларнинг бу борадаги фикр-мулоҳазалар  ҳамда таклифлари тингланди. 

Азиз юртдошлар, йўлга чиққан ҳар бир ҳаракат иштирокчиси сифатида ўз зиммамиздаги масъулиятни чуқур ҳис қилиб, белгиланган қоидаларга қатъий риоя  этган ҳолда ҳаракатланайлик. Ана шундагина йўлларимизда содир этилиши мумкин бўлган нохуш ҳолатларнинг олдини олишга ўз ҳиссамизни қўшган бўламиз.

Туман ҳокимлигининг Ахборот хизмати.