Choykoʻl ovulida yoʻl-transport hodisasi muhokamasiga bagʻishlangan yigʻilish oʻtkazildi

Soʻnggi yillarda butun dunyoda aholi sonining tobora ortib borayotgani tufayli insonlarning transport vositalaridan foydalanish ehtiyojlarining oshishiga olib kelmoqda. Avtotransport vositalariga boʻlgan talab va ehtiyojning oshishi esa yoʻllarda haydovchi hamda piyodalarning harakatlanishlarida koʻplab noqulayliklar hamda qiyinchiliklarni keltirib chiqarmoqda.

Achinarlisi shundaki, olib borilayotgan profilaktika tadbirlariga qaramasdan, avtoulov boshqaruvchilarining avtotransport vositalaridan notoʻgʻri foydalanishlanishlari, haydovchi va piyodalarning eʼtiborsizliklari oqibatida natijasi ogʻir boʻlgan yoʻl-transport hodisalarining sodir etilishi holatlari tobora ortib bormoqda. Jabrlanganlarning asosiy toifasini bolalar tashkil qilishi esa kishi koʻnglini xira qiladi. Maʼlumotlarga koʻra, har yili mamlakat koʻchalarida va yoʻllarida minglab voyaga yetmagan yoʻl harakati ishtirokchilari halok boʻlishadi va jarohat olishadi.

Joriy yilning 9-oktyabr sanasida Amudaryo tumani Choykoʻl ovulida ana shunday ayanchli oqibatga olib kelgan yoʻl-transport hodisasi muhokamasi boʻlib oʻtdi. Muhokamada tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldashev, tuman Ichki ishlar boʻlimi boshligʻi Ulugʻbek Xudoyberganov, tuman Yoʻl-harakati xavfsizligi guruhi boshligʻi Dilshod Aminov, ovul fuqarolar yigʻini masʼul xodimlari, ovul faollari ishtirok etdilar.

Mazkur yigʻilishda joriy yilning 8-oktyabr kuni Toshyop ovulida yashovchi fuqarolardan biri turmush oʻrtogʻi nomida boʻlgan “Spark” rusumli avtotransport vositasini spirtli ichimlik ichgan holda boshqarishi natijasida Choykoʻl ovuli hududidan oʻtgan yoʻlda boshqaruvni yoʻqotishi oqibatida oʻzi bilan bir yoʻnalishda harakatlanayotgan traktor tirkamasiga urilib, yoʻl transport hodisasi sodir etganligi holati muhokama qilindi.

Muhokamada qayd etilishicha, mazkur yoʻl-transport hodisasi oqibatida “Spark” rusumli transport vositasida yoʻlovchi sifatida harakatlanayotgan, yoʻl-transport hodisasi sodir etgan shaxsning 11 yoshli voyaga yetmagan farzandi avtohalokat qurboni boʻlgan. Yigʻilishda bu kabi ayanchli oqibatlarga olib keluvchi yoʻl-transport hodisalari sodir etilishining oldini olish borasida profilaktika tadbirlarini yanada kuchaytirish lozimligi, har bir fuqaro yoʻllarda kelib chiqayotgan halokatlarni kamaytirishda oʻz hissasini qoʻshishi lozimligi, ovul va mahallalarda bu borada tushuntirish va targʻibot tadbirlarini yanada kuchaytirish zarurligi alohida taʼkidlandi.

Qayd etilganidek, bu kabi yoʻl-transport hodisalari sodir etilishining asosiy omillaridan biri yoʻl harakati qoidalariga rioya qilmaslik hisoblanadi. Transport vositalari boshqaruvchilarining yoʻl harakati taqiqlangan signalga oʻtish, taqiqlangan joylarda quvib oʻtish, mast holatda avtoulovni boshqarish, belgilangan tezlikka amal qilmaslik kabi yoʻl harakati qoidalarini buzishlari oqibati ayanchli boʻlgan avtohalokatlarni keltirib chiqarmoqda.

Shuningdek, piyodalar tomonidan ham yoʻl belgilariga va svetoforlarga eʼtibor bermasliklari, piyodalar oʻtish yoʻlaklarida harakatlanmasliklari kabi yoʻl harakati qoidalarini buzish holatlari natijasida ham koʻplab yoʻl-transport hodisalari kelib chiqmoqda.

Muhokama mobaynida masʼullar yoʻl transport hodisalarining barvaqt oldini olish boʻyicha profilaktik tadbirlarning yanada oshirilishi zarurligi xususida toʻxtalib, sodir etilgan yoʻl-transport hodisasi, unga imkon bergan shart-sharoitlar va sabablarni atroflicha muhokama qildilar. Fuqarolarning bu boradagi fikr-mulohazalar  hamda takliflari tinglandi. 

Aziz yurtdoshlar, yoʻlga chiqqan har bir harakat ishtirokchisi sifatida oʻz zimmamizdagi masʼuliyatni chuqur his qilib, belgilangan qoidalarga qatʼiy rioya  etgan holda harakatlanaylik. Ana shundagina yoʻllarimizda sodir etilishi mumkin boʻlgan noxush holatlarning oldini olishga oʻz hissamizni qoʻshgan boʻlamiz.

Tuman hokimligining Axborot xizmati.