EKOLOGIK MADANIYaT – FAROVON HAYoT GAROVI: JAYHUN OVULIDA TARGʻIBOT TADBIRI OʻTKAZILDI

Bugungi kunda global iqlim oʻzgarishlari, tabiiy resurslarning qisqarib borishi va atrof-muhitga inson omili taʼsirining ortishi sharoitida aholining ekologik madaniyatini yuksaltirish dolzarb vazifaga aylanmoqda. Ona tabiatni asrab-avaylash, tabiiy boyliklardan oqilona foydalanish har bir fuqaroning nafaqat burchi, balki kelajak avlod oldidagi masʼuliyatidir. Ana shu ezgu maqsad yoʻlida Amudaryo tumanida qator amaliy ishlar olib borilmoqda.

Xususan, “Jayxun ilhomlari” nodavlat notijorat tashkiloti tomonidan Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi granti asosida amalga oshirilayotgan “Ekologik madaniyat – sogʻlom kelajak asosi” loyihasi doirasida aholi oʻrtasida tizimli targʻibot-tadbirlari oʻtkazib kelinmoqda.

Loyiha ish rejasiga muvofiq, navbatdagi targʻibot tadbiri joriy yilning 16-yanvar kuni Amudaryo tumanining Jayhun ovul fuqarolar yigʻini maʼmuriy binosida tashkil etildi. Unda hudud faollari, nuroniylar, yoshlar va keng jamoatchilik vakillari faol ishtirok etdilar. Tadbir Qipchoq davlat oʻrmon xoʻjaligi bilan hamkorlikda oʻtkazilgani uning amaliy ahamiyatini yanada oshirdi.

Uchrashuvdan koʻzlangan asosiy maqsad — aholi orasida ekologiya va atrof-muhitni muhofaza qilishga oid qonun hujjatlarining mazmun-mohiyatini keng tushuntirish, tabiiy resurslardan oqilona foydalanish koʻnikmalarini shakllantirish hamda hududimizning bebaho boyligi boʻlgan oʻrmon va toʻqayzorlarni asrash masalalariga jamoatchilik eʼtiborini kuchaytirishdan iborat boʻldi. Ayniqsa, daraxtlarni noqonuniy kesish holatlarining oldini olish, yashil hududlarni saqlab qolish masalalariga alohida toʻxtalib oʻtildi.

Tadbir davomida mutaxassislar tomonidan ishtirokchilarga tabiiy resurslarni asrashning ahamiyati hayotiy misollar asosida tushuntirib berildi. Taʼkidlanganidek, daraxtlarning kesilishi nafaqat kislorod manbaining kamayishiga, balki tuproq eroziyasi, chang boʻronlari, iqlim oʻzgarishi kabi salbiy oqibatlarga olib keladi. Bu esa, oʻz navbatida, inson salomatligi va qishloq xoʻjaligiga ham jiddiy taʼsir koʻrsatadi.

Shuningdek, uchrashuvda energiya tejamkorligi masalasi ham kun tartibidagi muhim mavzulardan biri sifatida muhokama qilindi. Mutaxassislar elektr energiyasini ishlab chiqarishda katta hajmda tabiiy resurslar — koʻmir, gaz va suv sarflanishini taʼkidlab, har bir xonadonda elektr energiyasidan tejamkorlik bilan foydalanish tabiatni asrashga qoʻshilgan amaliy hissa ekanini tushuntirdilar. Aholiga maishiy sharoitda zamonaviy energiya tejovchi texnologiyalardan, xususan, LED yoritish vositalaridan foydalanishning iqtisodiy va ekologik afzalliklari haqida batafsil maʼlumot berildi hamda amaliy tashabbus sifatida uchrashuv ishtirokchilariga zamonaviy energotejamkor LED lampochkalar bepul tarqatildi. Bu esa aholini energiya tejashga ragʻbatlantirish bilan birga, tadbirning amaliy ahamiyatini yanada oshirdi.

Taʼkidlash joizki, bunday tadbirlar aholining ekologik ongini yuksaltirish, “Tabiat — umumiy uyimiz” degan gʻoyani keng jamoatchilik ongiga singdirishda muhim ahamiyat kasb etadi. Zero, sogʻlom atrof-muhit — farovon hayot asosi, ekologik madaniyat esa barqaror kelajak garovidir.