ЭКОЛОГИК МАДАНИЯТ – ФАРОВОН ҲАЁТ ГАРОВИ: ЖАЙҲУН ОВУЛИДА ТАРҒИБОТ ТАДБИРИ ЎТКАЗИЛДИ
Бугунги кунда глобал иқлим ўзгаришлари, табиий ресурсларнинг қисқариб бориши ва атроф-муҳитга инсон омили таъсирининг ортиши шароитида аҳолининг экологик маданиятини юксалтириш долзарб вазифага айланмоқда. Она табиатни асраб-авайлаш, табиий бойликлардан оқилона фойдаланиш ҳар бир фуқаронинг нафақат бурчи, балки келажак авлод олдидаги масъулиятидир. Ана шу эзгу мақсад йўлида Амударё туманида қатор амалий ишлар олиб борилмоқда.
Хусусан, “Жайхун илҳомлари” нодавлат нотижорат ташкилоти томонидан Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди гранти асосида амалга оширилаётган “Экологик маданият – соғлом келажак асоси” лойиҳаси доирасида аҳоли ўртасида тизимли тарғибот-тадбирлари ўтказиб келинмоқда.
Лойиҳа иш режасига мувофиқ, навбатдаги тарғибот тадбири жорий йилнинг 16 январь куни Амударё туманининг Жайҳун овул фуқаролар йиғини маъмурий биносида ташкил этилди. Унда ҳудуд фаоллари, нуронийлар, ёшлар ва кенг жамоатчилик вакиллари фаол иштирок этдилар. Тадбир Қипчоқ давлат ўрмон хўжалиги билан ҳамкорликда ўтказилгани унинг амалий аҳамиятини янада оширди.
Учрашувдан кўзланган асосий мақсад — аҳоли орасида экология ва атроф-муҳитни муҳофаза қилишга оид қонун ҳужжатларининг мазмун-моҳиятини кенг тушунтириш, табиий ресурслардан оқилона фойдаланиш кўникмаларини шакллантириш ҳамда ҳудудимизнинг бебаҳо бойлиги бўлган ўрмон ва тўқайзорларни асраш масалаларига жамоатчилик эътиборини кучайтиришдан иборат бўлди. Айниқса, дарахтларни ноқонуний кесиш ҳолатларининг олдини олиш, яшил ҳудудларни сақлаб қолиш масалаларига алоҳида тўхталиб ўтилди.
Тадбир давомида мутахассислар томонидан иштирокчиларга табиий ресурсларни асрашнинг аҳамияти ҳаётий мисоллар асосида тушунтириб берилди. Таъкидланганидек, дарахтларнинг кесилиши нафақат кислород манбаининг камайишига, балки тупроқ эрозияси, чанг бўронлари, иқлим ўзгариши каби салбий оқибатларга олиб келади. Бу эса, ўз навбатида, инсон саломатлиги ва қишлоқ хўжалигига ҳам жиддий таъсир кўрсатади.
Шунингдек, учрашувда энергия тежамкорлиги масаласи ҳам кун тартибидаги муҳим мавзулардан бири сифатида муҳокама қилинди. Мутахассислар электр энергиясини ишлаб чиқаришда катта ҳажмда табиий ресурслар — кўмир, газ ва сув сарфланишини таъкидлаб, ҳар бир хонадонда электр энергиясидан тежамкорлик билан фойдаланиш табиатни асрашга қўшилган амалий ҳисса эканини тушунтирдилар. Аҳолига маиший шароитда замонавий энергия тежовчи технологиялардан, хусусан, LED ёритиш воситаларидан фойдаланишнинг иқтисодий ва экологик афзалликлари ҳақида батафсил маълумот берилди ҳамда амалий ташаббус сифатида учрашув иштирокчиларига замонавий энерготежамкор LED лампочкалар бепул тарқатилди. Бу эса аҳолини энергия тежашга рағбатлантириш билан бирга, тадбирнинг амалий аҳамиятини янада оширди.
Таъкидлаш жоизки, бундай тадбирлар аҳолининг экологик онгини юксалтириш, “Табиат — умумий уйимиз” деган ғояни кенг жамоатчилик онгига сингдиришда муҳим аҳамият касб этади. Зеро, соғлом атроф-муҳит — фаровон ҳаёт асоси, экологик маданият эса барқарор келажак гаровидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
