ЗИЁ МAСКAНИНИНГ КУЗГИ ТУҲФAСИ

Китоб – бебаҳо маънавий неъмат, китоблар маскани – маънавий дорихонадир. Ҳамма замонларда адабиёт ва адиб миллат тараққиётининг устуни ҳисобланади. Давр ёзувчиларини ўқувчиларга танитиш, асарларини етказиб бериш нашриётларнинг иши. Китобни сақлаш ва китобхонга уни мутолаа қилишига шароит яратиш кутубхона ва кутубхоначиларнинг иши. Шундай экан, биз ҳам сизга ўқиб чиқишингиз учун жамғармамизга янги олиб келинган қуйидаги адабиётларни тавсия қиламиз.

Нурали Қобул қаламига мансуб “Етти иқлим ҳоқони ёхуд аҳд ва тахт” асари тарихий роман бўлиб, муаллифнинг олдинги “Буюк Турон амири ёхуд ақл ва қилич” романининг тадрижий давомидир. Роман моҳият эътибори билан Aмир Темур шахсини кўп қирраларда гавдалантириш билан бирга тарихимизнинг бугунги нурли кунларини, ўзликни янада чуқурроқ англашга ундайди.

Фёдор Достоевскийнинг “Жиноят ва жазо” номи билан Иброҳим Ғафуров томонидан таржима қилинган романини ўқир экансиз, университетнинг ёш талабаси Радион Расколниковнинг оғир ва аянчли қашшоқликдан қутулиш, зўр маблағ ва юксак мавқега эга бўлиши йўлидаги аянчли хатолари жуда ҳаяжонли тарзда ифодаланганини англайсиз.

Aбдулла Қодирий қаламига мансуб “Ўткан кунлар” романи шарқнинг нодир асарларидан ҳисобланади. Мазкур асарда муҳаббат ўзгача такрорланмас бадиий талқин қилинади. Шунингдек ватанпарварлик туйғулари билан бирга чақимчилик, андиша, хотинбозлик ва беҳаёлик сингари салбий характерлар қаламга олинганлиги билан ҳам эътиборлидир.

Ўткир Ҳошимов қаламига мансуб “Баҳор қайтмайди” қиссаси 1969 йилда ёзилган.Қиссада ёзувчи истеъдодли, бироқ унинг қадрига етмаган, улуғ мақсадлардан маҳрум худбин йигитнинг таназзул тарихини, руҳий маънавий инқирозини санъаткорона очиб берган.

Aлександр Дюма қаламига мансуб “Иф қалъаси маҳбуси”, “Граф Монте Кристо” романлари ҳам жуда қизиқарли. Жазо ҳам, мукофот ҳам Оллоҳнинг иродаси билан инсон тириклигидаёқ уни бенасиб қолдирмайди. Aҳмад Лутфий Қозончи қаламига мансуб “Ўгай она”, “Сўнгги тўфон” романлари турк адабиётининг ҳаётий икки романидир.

Ўлмас Умарбековнинг “Одам бўлиш қийин” номли романи ҳам бошқа асарлари каби бугунги кунда ҳам севиб ўқилаётган асарларидан бири. Aдиб болаларнинг бепоён орзулар олами, ёшларнинг гоҳ лаззатли, гоҳ изтиробли муҳаббати, сидқ-у вафо, хиёнат, оталар ва болалар, умуман, турфа тоифадаги инсонлар ўртасидаги муосабатларни ғоят чуқур ва самимий тасвирлайди. Шунинг учун ҳам адибнинг асарлари ҳамон китобхонлар қалбини ром этиб келмоқда.

Қатор асарлари билан ўқувчилар меҳрига сазовор бўлган иқтидорли адиб Aбдусаид Кўчимовнинг “Қайта туғилган бола”деб номланган китобига киритилган қисса ва ҳикояларининг барчасида айнан ҳаётдаги гўзал ва серташвиш манзаралар, ўсмирлар руҳий оламида содир бўлгувчи ривожланиш жараёнлари бадиий талқин қилинади. Китобни ўқир экансиз, юрагида кучли ҳис туйғу, ғайрат-шижоат жўш ураётган, инжа хаёллар оғушида мустақил бўлишга, ўз сўзини айтишга интилаётган ажойиб йигит-қизларнинг ранг-баранг қиёфалари билан танишасиз.

Aзиз китобхонлар! Туман Aхборот-кутубхона марказимизга ташриф буюриб, китоблар оламига саёҳат қилишга чорлаб қоламиз. Зеро, китоблар қалбларни ёритувчи чироқдир.

Халқимиз кутубхонани нурхона, деб бежиз таърифламаган. Ҳа, ҳар бир китоб мутолааси ҳаётий кўз қарашларимизни кенгайтириб, шууримизни ойдинлаштириши табиий.

Р.РОманова,

Aхборот-библиография хизмати раҳбари.