Кузги шудгорлаш ишлари бўйича семинар бўлиб ўтди

Халқимиз орасида “Ер ҳайдасанг куз ҳайда, куз ҳайдамасанг юз ҳайда” деган нақл бор ва бу бежизга айтилмаган. Қишлоқ хўжалигида мўл ҳосил етиштиришда кузги шудгорлашнинг аҳамияти жуда катта. Ўз вақтида, сифатли ўтказилган шудгор келгуси йил ҳосилига пухта замин яратади. Ҳудудларда кузги шудгорлаш ишларини олиб бориш юзасидан ташкил этилаётган семинарларда бу борада мутахассислар томонидан масъулларга тегишли тавсия ҳамда кўрсатмалар берилмоқда.

Амударё туманида ҳам Қорақалпоғистон Республикаси Вазирлар Кенгаши Раисининг қишлоқ хўжалиги масалалари бўйича ўринбосари Шуҳрат Тешаев иштирокида кузги шудгорлаш ишларини ташкил этиш юзасидан семинар бўлиб ўтди. Семинарда туман ҳокими Собир Хўжаметов, секторлар раҳбарлари, ҳоким ўринбосари, қишлоқ хўжалиги соҳаси масъуллари ҳамда фермерлар иштирок этдилар.

Семинар Тош ёп овули ҳудудидаги “Бекмон Аллаберганов” фермер хўжалиги экин майдонида ташкил этилиб, унда Қорақалпоғистон Республикаси Вазирлар Кенгаши Раиси ўринбосари Шуҳрат Тешаев сўзга чиқди. У ўз сўзида кузги шудгорлашни тўғри ташкил этишнинг қишлоқ хўжалиги маҳсулотларидан юқори ҳосил олишдаги аҳамияти хусусида тўхталиб ўтди ҳамда мавзу юзасидан тегишли тавсиялар берди.

Таъкидланганидек, ерларни сифатли ва юқори унум билан шудгорлаш учун трактор ва плуглар олдиндан ишга шай ҳолга келтирилиши ва созланиши, далалар эса ҳайдовга тайёрланган бўлиши, ҳайдов тўғри ташкил этилиши ҳамда унинг сифати доимо назорат қилиб борилиши лозим. Қолаверса, сифатли шудгорланган майдонларда шўр ювиш, эрта баҳорда тупроқни экишга тайёрлаш ҳамда экиш каби агротехник тадбирларни ҳам ўз вақтида ўтказишга эришилади.

Семинарда туман ҳокими Собир Хўжаметов туманда кузги шудгорлашнинг ташкил этилиши борасидаги ишлар хусусида сўз юритди.

Маълумот ўрнида айтиш жоизки, туманда 2025 йилги экиш мавсуми олдидан жорий йилда 16 минг 27 гектар майдонда кузги шудгорлашни ўтказиш режалаштирилган бўлиб, унда жами 71 та сурим техникалари қатнашиши кўзда тутилган. Мавжуд техникалар 18 та сурим отрядларига бириктирилган. Кузги шудгорлаш ишларини 1 ноябрдан 2 декабргача – 32 кунда якунлаш мақсадида шудгорлаш графиклари ишлаб чиқилган бўлиб, бугунги кунгача жами 1 минг 642 гектар экин майдонларида шудгорлаш ишлари амалга оширилган. Механизаторлар кунига 150-160 гектар далани шудгор қилишга эришмоқдалар.

Туманда фермер хўжаликлари ва қишлоқ хўжалиги корхоналарида 71та лазерли ер текислагичлар мавжуд бўлиб, улар ёрдамида жами 1 минг 73та контурлар ёки 8 минг 70 гектар майдонлар сифатли қилиб текисланган. 2025 йилги экиш мавсуми олдидан 19 минг 201,4 гектар майдонлар шўрини ювиш режалаштирилган бўлиб, ушбу майдонларнинг 782 гектари кучли шўрланган, 4 минг 840,2 гектари ўртача шўрланган ва 13 минг 579,2 гектари кам шўрланган майдонлар ҳисобланади. Шўр ювиш тадбирни амалга ошириш учун 18та суғориш отрядлари ташкил қилиниб, ушбу отрядларга 1 минг 501 нафар малакали ходимлар бириктирилган.

Қайд этиш жоизки, семинар ташкил этилган “Бекмон Аллаберганов” фермер хўжалиги тумандаги энг илғорлар қаторида шудгорлаш ишларини ўз ниҳоясига етказаётган хўжаликлардан бири ҳисобланади. Фермер хўжалигининг жами 110 гектар экин майдони мавжуд бўлиб, шундан 70 гектар майдонда шудгорлаш ишлари олиб борилди.

Семинар иштирокчилари фермер хўжалиги даласида кузги шудгорлашнинг намунавий усуллари билан танишишди, ҳудуддаги илғор фермерларнинг тажрибалари ҳақида фикр алмашишди. Шудгорлаш ишларини совуқ кунларга қолдирмасдан якунига этказиш, шўр ювиш ишларини сифатли бажариш бўйича тегишли масъулларга кўрсатмалар ва тавсиялар берилди.

Чарос Арслонова, туман ҳокимлигининг Ахборот хизмати раҳбари.