Кузги буғдой экилган майдонларда Агроинспекция ходимлари томонидан назорат ишлари олиб борилмоқда

Сўнгги йилларда мамлакатимизда, шу жумладан Амударё туманида ҳам ғаллачиликни ривожлантиришга қаратилаётган эътибор туфайли аҳолининг озиқ-овқат маҳсулотлари, айниқса, ғалла ва ун маҳсулотларига бўлган эҳтиёжи тўлиқ қондирилишига эришилмоқда. Ғалла нафақат аҳоли эҳтиёжи учун, балки чорвачилик ва паррандачилик соҳаларининг ривожида ҳам муҳим ўрин тутади. Шу боис, ғаллакор деҳқонлар кузги буғдой экиш, ғалла экилган майдонлардан тўлиқ ниҳол олиш ҳамда парваришлаш ишларига алоҳида эътибор қаратишади.

Амударё тумани ғаллачилик фермер хўжаликларида жорий йилги экиш мавсуми уюшқоқлик билан олиб борилди. 2026 йилги буғдой ҳосили мавсумида мўл ва сифатли ғалла хирмонини бунёд этишни мақсад қилган ғаллачилик фермер хўжаликлари деҳқонлари айни пайтда далаларда бир текис униб чиққан буғдойзорларда кузги агротехник тадбирларни ўз вақтида, сифатли амалга оширишмоқда.

Олиб борилаётган кенг кўламли агротехник жараёнлар Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Қорақалпоғистон Республикаси бошқармаси Амударё туман бўлими мутахассислари томонидан қатъий назорат остига олинган. Ғалла экишдан тортиб, ўғитлаш, суғориш каби барча босқичлар пухта режалаштирилган тизим асосида олиб борилмоқда.

Туманда 2026 йил ҳосили учун жами 258 та фермер хўжалиги билан шартнома тузилган бўлиб, улар томонидан умумий ҳисобда 4 800 гектар майдонга ғалла экилган. Кузги буғдой экиш ишлари белгиланган агротехник талаблар асосида амалга оширилиб, барча майдонларда фосфорли, калийли ва бошқа минерал ўғитлар билан ўз вақтида ва меъёрда озиқлантириш ишлари бажарилганлиги ғалланинг барвақт униб чиқиши, касаллик ва зараркунандаларга бардошли бўлиши, шунингдек, келажакдаги ҳосилдорликни оширишда муҳим аҳамият касб этади.

Туманда уруғлик ғалла етиштириш йўналишига ҳам алоҳида эътибор қаратилмоқда. Танлов асосида сараланган 12 та илғор фермер хўжалиги томонидан жами 430 гектар ер майдонида уруғлик ғалла экилган. Ушбу хўжаликлар замонавий техникалар билан таъминланган бўлиб, бу уруғлик сифатининг юқори даражада бўлишини таъминлашга ёрдам беради.

Ғалла униб чиқиш жараёни бошланганидан буён туман миқёсидаги барча экин майдонларида доимий равишда дала ҳолатлари ўрганилиб, униб чиқишнинг сифати, агротехник талабларга амал қилиниши, ўғитлаш, бегона ўтлардан тозалаш каби муҳим масалалар юзасидан жойларга чиққан ҳолда назорат ишлари олиб борилмоқда.

Туманнинг Қиличбой ҳудудидаги “Пирназаров Тўрабой” фермер хўжалигида ҳар йили режа бўйича 10 гектар майдонга кузги буғдой экилади. Ўз имкониятларидан келиб чиқиб, жорий йилги экиш мавсумида хўжалик деҳқонлари яна қўшимча 2 гектар майдонга ғалла экдилар. Айни пайтда хўжалик далаларида бир текис униб чиққан буғдой майсалари баравж ривожланмоқда.

Шунингдек, “Уста Оллоёр” фермер хўжалиги ишчилари ҳам 36 гектар пахтадан мўл ҳосил етиштиришдан ташқари, 17 гектар майдондаги буғдойзорлар парваришига ҳам алоҳида эътибор беришмоқда.

Бу каби тизимли ишлар натижасида 2026 йилги мавсумда мўл ва сифатли ғалла ҳосили олиниши кутилмоқда. Бу нафақат аҳоли учун асосий озиқ-овқат маҳсулоти — ун ва нон таъминотини барқарорлаштиради, шу билан бирга мамлакатимизнинг ички эҳтиёжини қоплаш ва экспорт имкониятларини кенгайтиришда ҳам муҳим аҳамият касб этади.

Айни кунларда Агросаноат мажмуи устидан назорат қилиш инспекцияси Қорақалпоғистон Республикаси бошқармасининг Амударё туман бўлими ходимлари томонидан ғаллачилик фермер хўжаликларида кузги буғдой экилган майдонларда амалга оширилаётган назорат ишлари давом этмоқда.

Ғиёсжон Бозорбоев, Агроинспекция туман бўлимининг қишлоқ хўжалиги экинлари уруғлари етиштирилиши устидан назорат қилиш бўйича бош мутахассиси.