ЁШ КИТОБХОНЛАР БИЛАН ИШЛАШИШ МЕНГА ЗАВҚ БАҒИШЛАЙДИ
Мамлакатимизда Президентимиз ташаббуси билан китобхонлик маданиятини юксалтириш бўйича бошланган ишлар изчил давом эттирилмоқда.
Китоб – инсоннинг энг яқин дўсти, маслаҳатчиси, ақл қайроғи, битмас-туганмас билим манбаидир. Шу боис, халқимиз асрлар давомида китобни нондай азиз, мўътабар ва муқаддас деб ҳисоблаган. Ҳозирги кунда ҳам фарзандларимиз ота-боболаримизнинг шонли анъаналарини давом эттириб, китобхонликни интеллектуал мулк даражасига кўтариш, китобхонлик савиясини юксалтиришга қаратилган “Энг китобхон мактаб”, “Энг китобхон маҳалла”, “Энг китобхон оила” каби йўналишлардаги танловларнинг фаол иштирокчиларига айланишган.
Мен ўз касбим тақозосига кўра, ёшларнинг китоб танлаш маданияти, китобга ва унинг ижодкорига бўлган ҳурмат ва эътиборига алоҳида аҳамият бераман. Кўпчилик ўқувчи-ёшлар китобхон тенгқурларига тақлид қилиб, ўзларини ҳақиқатдан ҳам зўр китобхондай кўрсатиб китоб танлашади. Вақт ўтиб, китобни кутубхонага қайтаришганларида айримларининг китобни очиб ҳам кўрмаганига гувоҳ бўламан. Чунки “Китобдан қандай таассурот олдинг?” “Китобдаги ғоя сенга ёқдими?” каби саволларга умуман жавоб беришаолмайдилар. Айрим “китобхон” болалар эса китобни ўқимагани етмагандай, саҳифалари кир-чир, йиртилган ҳолатда қайтаришади.
Лекин кишининг дилини оғритадиган бир ҳолат борки, бу ҳақда гапирмаслик – болалар, ёшлар тарбиясига лоқайдлик ҳисобланади. Китобга меҳр қўймаган айрим ёшлар, ўсмирларга: “бугун интернетда нима гап?” деган саволни бериб кўринг-чи! Сайраб кетишади, тўхтата олмайсиз! Дунёнинг қайси ҳудудида нелар рўй берди-ю, шов-шувга тўла санъат оламида нима гап? Барини ипидан-игнасигача гапириб беришади. Кўпчилик ўсмир-ёшларнинг қимматли вақтларини ижтимоий тармоқлардаги олди-қочди хабарларни ўқишга бағишлаётганлари жуда ачинарли.
Қалбимизда мамнуният ҳиссини уйғотадиган бир тоифа ўсмир-ёшларнинг қўлидан китоб тушмаслиги, уларнинг бу борада юқоридаги каби тенгдошларидан илмда, одоб-у ахлоқда, фикрат оламида анча ўткир, савияси баланд, маданиятли эканлигини англатади. Бундай китобхон ўсмир-ёшлар орзулари йўлида собитқадам, шахсий фикрига эга, дунёқараши кенг инсонлар бўлиб вояга етадилар ва жамиятда ўз ўрнини топаоладилар.
Мактабимизда китобхон ёшлар талайгина. Мен улар билан шуғулланишдан, орзу-интилишлари хусусида суҳбатлашишдан асло чарчамайман. Аксинча, бу китобхон ўқувчи-ёшлар билан бўладиган мулоқотлардан олам-олам завқ оламан. Улар орасида ўз шахсий фикри, ўз услубига эга ҳаваскор шоир ва шоиралар, адабиётнинг наср жанрида ижод этаётган жажжи “ёзувчилар” ҳам бор. Мактабимизнинг китобсевар ёшларидан Шаҳзода Жўллибоеванинг “Кўнгил карвони” илк шеърлар тўплами “Тараққиёт кўзгуси газетаси” давлат нашриётида чоп этилиб, оммага тарқатилди. Шунингдек, Муҳаббат Ўринбосарованинг “Ҳақ ниетлер” Навбаҳор Сарсенбоеванинг “Кевил тўлғовлари” илк шеърлар ва ҳикоялар тўпламлари ҳам чоп этиш учун нашриётга топширилди. Бундан ташқари, бир гуруҳ ўқувчи-ёшларнинг ижод намуналаридан иборат шеърлар, ҳикоялар ва эртаклар гала тўпламини ҳам тайёрлаб, китоб ҳолида чоп қилдириш ниятидамиз.
Мен бу ўсмир-ёшларнинг ҳар бир ютуғини кўриб, илмга чанқоқлигидан, китобхонлик савияси ва маданияти, дунёқарашлари кенглигидан қувониб кетаман. Уларнинг Ўзбекистон ва Қорақалпоғистон келажагига масъул инсонлар бўлиб камолга етишларига жуда-жуда ишонаман.
Тазахан Қдирниязова, 3-сонли мактаб кутубхонаси мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
