ҲАР БИР ИНСОН ҲАЁТДАН РОЗИ, ЗАВҚ ОЛИБ ЯШАШИ УЧУН МАСЪУЛМИЗ

Мамлакатимизда аҳолининг эҳтиёжманд қатламларини иқтисодий, ижтимоий ва ҳуқуқий жиҳатдан қўллаб-қувватлашга қаратилган чора-тадбирлар ижтимоий ҳимояга муҳтож фуқароларни алоҳида тизимга олган ҳолда уларга сифатли ижтимоий хизматлар кўрсатишни яхшилаш имконини бермоқда. Хусусан, Ўзбекистон Республикаси Президентининг 2023 йил 1 июндаги 82-сонли Фармонига асосан Ўзбекистон Республикаси Президенти ҳузурида Ижтимоий ҳимоя миллий агентлигининг ташкил этилиши бу борадаги ишларни янги босқичга кўтарди. Унга кўра, маҳаллаларда комплекс ижтимоий хизмат кўрсатувчи ижтимоий ходимлар фаолияти йўлга қўйилиб, айни пайтда 8 хил турдаги асосий вазифалар бўйича аҳолининг 12 тоифасига самарали ижтимоий хизматлар кўрсатиш йўлга қўйилган.

Манғит шаҳридаги Навоий номли маҳаллада ҳам кам таъминланган оилалар, техноген, табиий ва экологик тусдаги фавқулодда вазиятлардан жабрланган шахслар, ота-оналик ҳуқуқидан маҳрум этилмасдан, фарзандлари олиб кетилган ота-оналар, ота-онаси хорижий давлатга кетган болалар, вояга етмаган ота-оналар, етим болалар ва ота-она қарамоғидан маҳрум бўлган ҳамда тўлиқ бўлмаган оилалардаги болалар, озодликдан маҳрум этиш жазосини ўтаб бўлган фуқаролар, гиёҳвандлик воситалари ёки психотроп моддаларни нотиббий истеъмол қилувчи ва алкоголизм, гиёҳвандлик ҳамда заҳарвандликка йўлиққан шахслар, муайян яшаш жойига эга бўлмаганлар, тазйиқ ва зўравонлик ҳолатларига учраган хотин-қизлар ва уларнинг вояга етмаган фарзандлари бўйича хатлов олиб борилиб, ушбу хатлов орқали аниқланган, ҳақиқатдан ҳам зарур ижтимоий ҳимояга муҳтож фуқароларни тизимли равишда қўллаб-қувватлаш бўйича чора-тадбирлар режаси ишлаб чиқилди.

Ҳозирги кунда маҳаллада ўзгалар парваришига муҳтож, ёлғиз яшовчи шахслар 6 нафарни ташкил қилади. Ногиронлик тоифаси бўйича 157 нафар ногиронлиги бўлган шахслар хатловдан ўтказилиб, индивидуал ёндашув асосида уларнинг эҳтиёжлари аниқланди. Ўтган давр мобайнида ногиронлиги бўлган фуқароларга тонометр, юриш мосламаси, 2 та қўлтиқтаёқ, 2 та тирсакли қўлтиқтаёқ, 4 та ҳасса, 3 та кўзи ожизлар ҳассаси, 1 та корсет матодан тайёрланган маҳсулотлар етказиб берилди. Шунингдек, 3 нафар ногиронлиги бўлган фуқаронинг имкониятидан келиб чиқиб, бандлиги таъминланди.

Маҳалла еттилиги билан ҳамкорликда олиб борилган ишлар натижасида кам таъминланган оилалар аъзоларининг бандлигини таъминлаш масаласи ҳам ижобий ҳал этилмоқда. Бундай тоифадаги оилалар 2024 йил охирида 20 фоизни ташкил қилган бўлса, ҳозирга келиб 13 фоизни ташкил қилмоқда.

Маҳалладаги ҳоким ёрдамчиси билан ҳамкорликда ўтказилган сўровнома асосида 58 та оила камбағаллик реестрига киритилди. Ушбу оилаларнинг шароитлари ўрганилиб, ижтимоий ходим ва ҳоким ёрдамчиси томонидан индивидуал режалар ишлаб чиқилди ва ижтимоий ходим томонидан белгиланган индивидуал режалар 95 фоизга бажарилди. Уларга “Саховат ва кўмак” жамғармаси томонидан зарур озиқ-овқат маҳсулотлари етказиб берилди. Бундан ташқари, камбағал оила фарзандларидан 1 нафари туманда ташкил қилинган IT марказида ўқитилиб, сертификат олиб берилди.

“Баркамол авлод” болалар мактабида ташкил қилинган тўгаракларга камбағал оилаларнинг 3 нафар фарзанди жалб қилиниб, айни пайтда касб-ҳунар ўрганмоқдалар. Мактабларда ташкил қилинган тўгаракларга ҳам камбағал оилалар фарзандлари жалб қилиниб, уларнинг мунтазам шуғулланишлари учун зарур шароитлар яратилди. Айнан шундай оила фарзандларидан 15 нафари Тўрткўл ва Элликқалъа туманидаги дам олиш оромгоҳларига юборилди.

Ота-онаси хорижий давлатга кетган, шунингдек, ташқи меҳнат муҳожирлигидаги вояга етмаган болалар бўйича ҳам ҳудуддаги умумтаълим мактаблари масъуллари билан ҳамкорликда иш олиб борилиб, 8 нафар болани васийлик ва ҳомийлик тарбиясига олишга эришилди.

Маҳалладаги тазйиқ ва зўравонликка учраган хотин-қизлар ва уларнинг вояга етмаган фарзандлари саломатлиги ва осойишталигини таъминлаш мақсадида туман “Инсон” ижтимоий хизматлар бўлимининг Оғир вазиятга тушиб қолган оилалар билан ишлаш шуъбаси билан ҳамкорликда иш олиб борилмоқда.

Бу борада хатлов ўтказилиб, маҳалланинг Бердақ номли кўчасида истиқомат қилувчи Мунаввар Жумамуратованинг ўғли ва қизи хорижга чиқиб кетганлиги туфайли онахоннинг 4 нафар невараси васийликка олинмаганлиги аниқланди ва ижтимоий иш очилиб, вояга етмаган болаларни қаровсиз қолдирмаслик бўйича тушунтириш ишлари олиб борилди ва онахонга невараларини васийликка олишда кўмаклашилди. Шунингдек, болаларга бериладиган нафақа учун онахоннинг аризаси рўйхатга олиниб, болаларга нафақа тайинланди.

Маҳаллада яшовчи Асия Матчонова ҳамда Одил Саидовлар якка-ёлғиз яшовчилар рўйхатига киритилган. Уларнинг фарзандлари Тошкент шаҳрида яшаб, давлат хизматида фаолият юритишади. Отахон билан онахонга “Инсон” ижтимоий хизматлар бўлимининг ассистенти Роза Қурбониёзова белгиланган жадвал асосида ижтимоий хизмат кўрсатади. Бундан ташқари, Хоразм кўчасида истиқомат қилувчи Очилбой Холбоевга фуқаролик паспорти олишда кўмаклашилди, тиббий кўрикдан ўтказилиб, унга 1-гуруҳ ногиронлик пенсияси тайинланди, электр энергияси, табиий газ тўловларига компенсация учун аризаси рўйхатга олиниб, якка-ёлғизлар рўйхатига киритилди ва ижара ҳисобида уй, кийим-кечаклар ҳамда кўзи ожизлар ҳассаси билан таъминланди.

Ҳаёт гўзал, унинг ҳар бир дақиқасидан унумли фойдаланган ҳолда, кўнгилдагидай фаровон ва осойишта яшашга ҳар бир инсон ҳақли. Бизнинг вазифамиз эса инсоннинг ана шу гўзал ҳаётдан завқ-шавқ олиб, фаровон яшашига, уларнинг орзу-ниятлари рўёби учун маълум маънода зарур шарт-шароитлар яратиш, давлатимиз ғамхўрлик ва имтиёзларидан баҳраманд бўлишларига кўмаклашишдир. Зеро, “Ҳамма нарса инсон учун, унинг ҳаётдан рози яшашини таъминлаш учун!” деган халқпарвар тамойилни амалга ошириш — биз, “Инсон” ижтимоий хизматлар бўлими ходимларининг зиммамиздаги масъулиятли бурчимиздир.

Адолат Хўжамуротова, “Инсон” ижтимоий хизмат кўрсатиш бўлимининг Навоий номли МФЙдаги комплекс хизмат кўрсатувчи ходими.