УМИДЛИ СПОРТЧИЛАР

Юртимизда  кейинги  йилларда  ёшларнинг маънан етук, жисмонан бақувват бўлиб камол топиши учун кўплаб имкониятлар яратилди. Бунга мисол қилиб, спортнинг оммавийлигини таъминлаш борасида олиб борилаётган саъй-ҳаракатларни ҳам айтишимиз мумкин. 

Буни туманимиздаги Болалар-ўсмирлар спорт мактаби  тўгаракларида шуғулланаётган ёш спорт-чилар ютуқларида ҳам кўришимиз мумкин. Шу мактаб тарбияланувчиси    Фазлиддин  Тожиниёзов  спортнинг каратэ  тури бўйича  кўпгина  мусобақалар  ғолиби. У  ўзининг иқтидори ва қобилияти билан  тенгдошларидан ажралиб туради.  Саккиз ёшида   туман  Болалар-ўсмирлар спорт мактабининг каратэ гуруҳига қатнай бошлади.  Устози, каратэ спорти бўйича Қора белбоғ соҳиби Адҳам Ибрагимов Фазлиддинда спортнинг бу турига бўлган  қизиқиш жуда кучли эканлигини сезгач, унга жиддий  эътибор берадиган, у билан алоҳида шуғулланадиган бўлди. Мураббийидан олган сабоқлари самараси ҳадемай Фазлиддиннинг ютуқларида акс эта бошлади.

Бугунги кунда туманимиздаги 64-сонли умумий ўрта таълим мактабининг 7-синфида таълим олаётган  Фазлиддин  25 та диплом, 9 та олтин, 4 та кумуш, 6 та бронза медаллар соҳиби. У  ўтган йилнинг 16-19 сентябрь кунларида Тошкент шаҳрида Ўзбекистон Республикаси кубоги учун ўсмирлар, болалар ва катталар ўртасида ўтказилган мусобақада биринчи ўринни эгаллаб, олтин медаль, 24 сентябрда Тошкент шаҳри каратэ академияси кубоги  учун ўтказилган мусобақада ҳам биринчи ўринни эгаллаб, олтин медаль билан тақдирланди.

Фазлиддин каби А.Ибрагимовдан  каратэ сирларини ўрганиб, нуфузли мусобақаларда ғолиб бўлаётган ёш спортчилар    талайгина.  Шулардан Қундузой Қўшназарова 3 карра Қорақалпоғистон чемпионати ва кубоги  ғолибаси.  У 2019 йил Болалар-ўсмирлар ўртасида ўтказилган Ўзбекистон кубоги ва халқаро  турнирлар совриндори. 2021 йил сентябрда қизлар ўртасида ўтказилган Ўзбекистон кубоги мусобақасида   фахрли 2-ўринни эгаллади. Улуғбек Отажонов ҳам 4 карра Қорақалпоғистон чемпиони.

Давлатимиз томонидан яратилган имкониятлардан самарали фойдаланиб келаётган ёш спортчилардан бири Зилола  Салаевадир. У ёш бўлишига қарамай, Ёшлар агентлиги туман бўлими қошида ташкил этилган гимнастика тўгарагида тажрибали мураббий  Моҳира Бердибоева  раҳбарлигида  шуғулланиб келаяпти.

Зилола Манғит шаҳридаги 7-сонли мактабгача таълим ташкилоти тарбияланувчиси.  Бир қараганда қизалоқ тенгдошларидан фарқ қилмайдигандек. У ҳам бошқа болалар каби қувноқ.  Боғчадаги  спорт тўгараклардаги  машқлар унинг жон-у дили.

У жорий йилда Нукус шаҳар 1-сонли Болалар-ўсмирлар спорт мактаби  очиқ биринчилигида фахрли 3-ўринни,  Самарқанд шаҳрида “Спортни сев, спорт билан яша” шиори остида ўтказилган мусобақада фахрли 2-ўринни эгаллади ва диплом,  совғалар билан тақдирланди, Беруний туманида ўтказилган “Гимнастика маликалари” деб номланган мусобақада эса фахрли 1-ўринни эгаллаб, “Гимнастика маликаси” деган номга сазовор бўлди.

Митти қизалоқнинг орзулари эса янада юксак.

Биз истиқболга дадил интилаётган умидли ёш спортчиларга келгусида ҳам улкан муваффақиятлар тилаб қоламиз.

Севара  ИСМОИЛОВА, ҚДУ талабаси.