UMIDLI SPORTChILAR

Yurtimizda  keyingi  yillarda  yoshlarning maʼnan yetuk, jismonan baquvvat boʻlib kamol topishi uchun koʻplab imkoniyatlar yaratildi. Bunga misol qilib, sportning ommaviyligini taʼminlash borasida olib borilayotgan saʼy-harakatlarni ham aytishimiz mumkin. 

Buni tumanimizdagi Bolalar-oʻsmirlar sport maktabi  toʻgaraklarida shugʻullanayotgan yosh sport-chilar yutuqlarida ham koʻrishimiz mumkin. Shu maktab tarbiyalanuvchisi    Fazliddin  Tojiniyozov  sportning karate  turi boʻyicha  koʻpgina  musobaqalar  gʻolibi. U  oʻzining iqtidori va qobiliyati bilan  tengdoshlaridan ajralib turadi.  Sakkiz yoshida   tuman  Bolalar-oʻsmirlar sport maktabining karate guruhiga qatnay boshladi.  Ustozi, karate sporti boʻyicha Qora belbogʻ sohibi Adham Ibragimov Fazliddinda sportning bu turiga boʻlgan  qiziqish juda kuchli ekanligini sezgach, unga jiddiy  eʼtibor beradigan, u bilan alohida shugʻullanadigan boʻldi. Murabbiyidan olgan saboqlari samarasi hademay Fazliddinning yutuqlarida aks eta boshladi.

Bugungi kunda tumanimizdagi 64-sonli umumiy oʻrta taʼlim maktabining 7-sinfida taʼlim olayotgan  Fazliddin  25 ta diplom, 9 ta oltin, 4 ta kumush, 6 ta bronza medallar sohibi. U  oʻtgan yilning 16-19-sentyabr kunlarida Toshkent shahrida Oʻzbekiston Respublikasi kubogi uchun oʻsmirlar, bolalar va kattalar oʻrtasida oʻtkazilgan musobaqada birinchi oʻrinni egallab, oltin medal, 24-sentyabrda Toshkent shahri karate akademiyasi kubogi  uchun oʻtkazilgan musobaqada ham birinchi oʻrinni egallab, oltin medal bilan taqdirlandi.

Fazliddin kabi A.Ibragimovdan  karate sirlarini oʻrganib, nufuzli musobaqalarda gʻolib boʻlayotgan yosh sportchilar    talaygina.  Shulardan Qunduzoy Qoʻshnazarova 3 karra Qoraqalpogʻiston chempionati va kubogi  gʻolibasi.  U 2019-yil Bolalar-oʻsmirlar oʻrtasida oʻtkazilgan Oʻzbekiston kubogi va xalqaro  turnirlar sovrindori. 2021-yil sentyabrda qizlar oʻrtasida oʻtkazilgan Oʻzbekiston kubogi musobaqasida   faxrli 2-oʻrinni egalladi. Ulugʻbek Otajonov ham 4 karra Qoraqalpogʻiston chempioni.

Davlatimiz tomonidan yaratilgan imkoniyatlardan samarali foydalanib kelayotgan yosh sportchilardan biri Zilola  Salayevadir. U yosh boʻlishiga qaramay, Yoshlar agentligi tuman boʻlimi qoshida tashkil etilgan gimnastika toʻgaragida tajribali murabbiy  Mohira Berdiboyeva  rahbarligida  shugʻullanib kelayapti.

Zilola Mangʻit shahridagi 7-sonli maktabgacha taʼlim tashkiloti tarbiyalanuvchisi.  Bir qaraganda qizaloq tengdoshlaridan farq qilmaydigandek. U ham boshqa bolalar kabi quvnoq.  Bogʻchadagi  sport toʻgaraklardagi  mashqlar uning jon-u dili.

U joriy yilda Nukus shahar 1-sonli Bolalar-oʻsmirlar sport maktabi  ochiq birinchiligida faxrli 3-oʻrinni,  Samarqand shahrida “Sportni sev, sport bilan yasha” shiori ostida oʻtkazilgan musobaqada faxrli 2-oʻrinni egalladi va diplom,  sovgʻalar bilan taqdirlandi, Beruniy tumanida oʻtkazilgan “Gimnastika malikalari” deb nomlangan musobaqada esa faxrli 1-oʻrinni egallab, “Gimnastika malikasi” degan nomga sazovor boʻldi.

Mitti qizaloqning orzulari esa yanada yuksak.

Biz istiqbolga dadil intilayotgan umidli yosh sportchilarga kelgusida ham ulkan muvaffaqiyatlar tilab qolamiz.

Sevara  ISMOILOVA, QDU talabasi.