Yosh sportchilarga namuna boʻlayotgan tajribali murabbiy

Bugungi kunda mamlakatimizda sport sohasi, ayniqsa, yoshlar sportini rivojlantirishga alohida eʼtibor qaratilmoqda. Olib borilayotgan islohotlar doirasida yoshlar uchun zamonaviy va qulay sharoitlar yaratilmoqda hamda bu chora-tadbirlar oʻz samarasini koʻrsatmoqda. Xalqaro mezonlarga mos musobaqalarning tashkil etilayotgani esa yoshlarda sportga boʻlgan qiziqish va ragʻbatni yanada oshirmoqda.

Shunday imkoniyatlar zamirida qoʻl jangi ham yurtimizda, ayniqsa, yoshlar orasida ommalashib borayotgan sport turlaridan biriga aylanmoqda.

Mazkur sport turi orqali yoshlar orasida nafaqat iqtidorli sportchi, balki salohiyatli murabbiy sifatida ham tanilgan Bekzod Otajanov oʻz faoliyati va yutuqlari bilan alohida ajralib turadi. Uning ustozlik faoliyati, tarbiyalayotgan shogirdlari, sportga boʻlgan muhabbati tumandagi yoshlar uchun chinakam oʻrnakdir.

Bekzod Otajanov sportning qoʻl jangi turi boʻyicha bir qator nufuzli milliy va xalqaro musobaqalarda munosib ishtirok etib, yuksak natijalarga erishgan. Uning sportchi sifatidagi katta yutuqlaridan biri  2023-yil 27–30-aprel kunlari Qoraqalpogʻiston Respublikasi chempionatida chempionlikni qoʻlga kiritganida yaqqol namoyon boʻldi. 2024-yilda esa u yanada keng maydonlarga yoʻl oldi. 8–12-fevral kunlari Toshkent shahrida boʻlib oʻtgan Oʻzbekis­ton chempionatida faxrli ikkinchi oʻrinni, shu yili 15–17-noyabr kunlari Qoraqalpogʻiston Respublikasi chempionatida esa gʻoliblikni qoʻlga kiritib, oʻz ustunligini yana bir bor namoyon etdi.

Uning xalqaro miqyosdagi  katta yutugʻi — 2024-yil 19–24-noyabr kunlari Qozogʻis­ton Respublikasining Os­tona shahrida oʻtkazilgan Jahon chempionatida qayd etildi. Ushbu musobaqada u munosib ishtirok etib, faxrli uchinchi oʻrinni qoʻlga kiritdi.

Bekzod 2023-yildan buyon Amudaryo tumani sport maktabida murabbiy sifatida faoliyat yuritmoqda. Uning tashabbusi bilan Qilichboy ovulidagi 83-sonli umumtaʼlim maktabida qoʻl jangi boʻyicha mashgʻulotlar tashkil etildi. Ayni payt­da bu yerda 90 nafardan ziyod yosh sportchi muntazam ravishda mashgʻulotlarda qatnashmoqda.

Shogirdlari tomonidan erishilayotgan muvaffaqiyatlar uning murabbiylik salohiyati va bilim-taj­ribasini yaqqol namoyon etadi. Hozirga qadar Bekzod Otajanov tayyorlagan 30 nafardan ziyod yosh sportchi Qoraqalpogʻiston Respublikasi chempionati va kubogi musobaqalarida yuqori natijalarga erishdi. Shuningdek, 20 nafardan ortiq shogirdi mamlakat miqyosidagi musobaqalarda muvaffaqiyatli ishtirok etib, tumanimiz sharafini munosib himoya qilgan.

Bunday yutuqlar ortida shubhasiz, Bekzod Otajanovning mashaqqatli mehnati, murabbiylik salohiyati va shogirdlari kelajagiga nisbatan chuqur masʼuliyati mujassam. Mashgʻulotlarda jismoniy tayyorgarlik bilan bir qatorda intizom, vatanparvarlik, oʻz-oʻziga ishonch, hurmat va fidoyilik kabi maʼnaviy qadriyatlarni ham yoshlarga singdirib borilyapti.

Bekzod Otajanovning yoshlar tarbiyasidagi mehnati va sportdagi muvaffaqiyatlari davlatimiz tomonidan ham munosib baholandi: qahramonimiz yaqinda Qoraqalpogʻiston Respublikasi Joʻqorgʻi Kengesi raisi Amanbay Orinbayev qoʻlidan “Umid uchquni” koʻkrak nishonini qabul qilib oldi. Bu mukofot nafaqat shaxsiy yutuq, balki yosh avlod tarbiyasidagi fidokorona xizmatlarining munosib eʼtirofidir.

Bekzod Otajanov kabi sportchi-murabbiylar tumanimiz faxr-u iftixoridir. Ular nafaqat yangi chempionlarni tarbiyalamoqda, balki yosh avlod qalbida Vatanga sadoqat, yurtga muhabbat va fidoyilik tuygʻularini mustahkamlab bormoqda.

Shohzod Qurbonboyev