Ёш спортчиларга намуна бўлаётган тажрибали мураббий
Бугунги кунда мамлакатимизда спорт соҳаси, айниқса, ёшлар спортини ривожлантиришга алоҳида эътибор қаратилмоқда. Олиб борилаётган ислоҳотлар доирасида ёшлар учун замонавий ва қулай шароитлар яратилмоқда ҳамда бу чора-тадбирлар ўз самарасини кўрсатмоқда. Халқаро мезонларга мос мусобақаларнинг ташкил этилаётгани эса ёшларда спортга бўлган қизиқиш ва рағбатни янада оширмоқда.
Шундай имкониятлар замирида қўл жанги ҳам юртимизда, айниқса, ёшлар орасида оммалашиб бораётган спорт турларидан бирига айланмоқда.
Мазкур спорт тури орқали ёшлар орасида нафақат иқтидорли спортчи, балки салоҳиятли мураббий сифатида ҳам танилган Бекзод Отажанов ўз фаолияти ва ютуқлари билан алоҳида ажралиб туради. Унинг устозлик фаолияти, тарбиялаётган шогирдлари, спортга бўлган муҳаббати тумандаги ёшлар учун чинакам ўрнакдир.
Бекзод Отажанов спортнинг қўл жанги тури бўйича бир қатор нуфузли миллий ва халқаро мусобақаларда муносиб иштирок этиб, юксак натижаларга эришган. Унинг спортчи сифатидаги катта ютуқларидан бири 2023 йил 27–30 апрель кунлари Қорақалпоғистон Республикаси чемпионатида чемпионликни қўлга киритганида яққол намоён бўлди. 2024 йилда эса у янада кенг майдонларга йўл олди. 8–12 февраль кунлари Тошкент шаҳрида бўлиб ўтган Ўзбекистон чемпионатида фахрли иккинчи ўринни, шу йили 15–17 ноябрь кунлари Қорақалпоғистон Республикаси чемпионатида эса ғолибликни қўлга киритиб, ўз устунлигини яна бир бор намоён этди.
Унинг халқаро миқёсдаги катта ютуғи — 2024 йил 19–24 ноябрь кунлари Қозоғистон Республикасининг Остона шаҳрида ўтказилган Жаҳон чемпионатида қайд этилди. Ушбу мусобақада у муносиб иштирок этиб, фахрли учинчи ўринни қўлга киритди.
Бекзод 2023 йилдан буён Амударё тумани спорт мактабида мураббий сифатида фаолият юритмоқда. Унинг ташаббуси билан Қиличбой овулидаги 83-сонли умумтаълим мактабида қўл жанги бўйича машғулотлар ташкил этилди. Айни пайтда бу ерда 90 нафардан зиёд ёш спортчи мунтазам равишда машғулотларда қатнашмоқда.
Шогирдлари томонидан эришилаётган муваффақиятлар унинг мураббийлик салоҳияти ва билим-тажрибасини яққол намоён этади. Ҳозирга қадар Бекзод Отажанов тайёрлаган 30 нафардан зиёд ёш спортчи Қорақалпоғистон Республикаси чемпионати ва кубоги мусобақаларида юқори натижаларга эришди. Шунингдек, 20 нафардан ортиқ шогирди мамлакат миқёсидаги мусобақаларда муваффақиятли иштирок этиб, туманимиз шарафини муносиб ҳимоя қилган.
Бундай ютуқлар ортида шубҳасиз, Бекзод Отажановнинг машаққатли меҳнати, мураббийлик салоҳияти ва шогирдлари келажагига нисбатан чуқур масъулияти мужассам. Машғулотларда жисмоний тайёргарлик билан бир қаторда интизом, ватанпарварлик, ўз-ўзига ишонч, ҳурмат ва фидойилик каби маънавий қадриятларни ҳам ёшларга сингдириб бориляпти.
Бекзод Отажановнинг ёшлар тарбиясидаги меҳнати ва спортдаги муваффақиятлари давлатимиз томонидан ҳам муносиб баҳоланди: қаҳрамонимиз яқинда Қорақалпоғистон Республикаси Жўқорғи Кенгеси раиси Аманбай Оринбаев қўлидан “Умид учқуни” кўкрак нишонини қабул қилиб олди. Бу мукофот нафақат шахсий ютуқ, балки ёш авлод тарбиясидаги фидокорона хизматларининг муносиб эътирофидир.
Бекзод Отажанов каби спортчи-мураббийлар туманимиз фахр-у ифтихоридир. Улар нафақат янги чемпионларни тарбияламоқда, балки ёш авлод қалбида Ватанга садоқат, юртга муҳаббат ва фидойилик туйғуларини мустаҳкамлаб бормоқда.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
