Mudofaaga koʻmaklashuvchi “Vatanparvar” tashkiloti oʻquv sport-texnika klublari sportchilari oʻrtasida yozgi biatlon musobaqalari oʻtkazildi

Oʻzbekiston Respublikasi Mudofaasiga koʻmaklashuvchi “Vatanparvar” tashkiloti tasarrufidagi oʻquv sport-texnika klubi sportchilari oʻrtasida har yili anʼanaviy tarzda oʻtkazilib kelinayotgan yozgi biatlon sport musobaqalarida eng kuchli, jismonan va aqlan yetuk sportchilar oʻzaro kuch sinashadilar.

Oʻzbekiston Respublikasi Mudofaasiga koʻmaklashuvchi "Vatanparvar" tashkiloti Qoraqalpogʻiston respublikasi Kengashining 2024-yil 1-martdagi 17-sonli buyrugʻiga asosan Joriy yilning 4-mart kuni Amudaryo tumanida yoshlar oʻrtasida “Yozgi biatlon” sport musobaqasi boʻlib oʻtdi.

Qoraqalpogʻiston Respublikasi Kengashining 2024-yilgi ish rejasiga koʻra, Shuhrat Kamolov xotirasiga bagʻishlangan Qoraqalpogʻiston kubogi sport musobaqasida Oʻzbekiston Respublikasi Mudofaasiga koʻmaklashuvchi "Vatanparvar" tashkiloti Qoraqalpogʻiston Respublikasi Kengashi tasarrufidagi oʻquv sport-texnika klubi jamoalari ishtirok etdilar.

Musobaqada Qoraqalpogʻiston Respublikasi tumanlaridan 8ta jamoa ishtirok etishdi. Ertalab soat 10:00da tantanali ravishda boshlangan musobaqa maydonida barcha jamoalar saf tortib turishdi. Tadbirni tashkilotning Qoraqalpogʻiston respublikasi Kengashi raisi Quatbay Razbekov ochib berdi va sportchilarga omad tiladi.

Musobaqa shartiga koʻra, ishtirok etayotgan jamoalarning har bir aʼzosi 3000 metrga yugurishi va oraliqda bir marta tik turgan holatda, keyingi aylanani yugurib oʻtib, yotgan holatda havo miltigʻidan nishonlarga oʻq otishni amalga oshirdilar. Agarda berilgan 5 ta oʻqdan nishonlarga kam tegizilsa, shuncha marta belgilangan jarima aylanasini qoʻshimcha ravishda yugurib oʻtdilar.

Bu yilgi yozgi biatlon sport musobaqalari har galgidan ertaroq boshlandi va ishtirokchi jamoalar musobaqani oʻtkazish boʻyicha tasdiqlangan Nizom bilan oldindan tanishtirildi. Shu bilan birga musobaqaning namunaviy shartlari asosida puxta tayyorgarlik koʻrishlari uchun oʻzlari aʼzo boʻlgan oʻquv sport-texnika klublari tomonidan zarur sharoitlar yaratildi. 110 nafardan ziyod sportchi-yoshlar ishtirok etgan musobaqa ishtirokchilar uchun ham, tomoshabinlar uchun ham nihoyatda qiziqarli taassurotlarga boy boʻldi.

Shu bilan birga mazkur musobaqada tumanlardagi oʻquv sport-texnika klublari tomonidan yoshlarni vatanparvarlik ruhida tarbiyalash, ularning jismonan baquvvat, maʼnan yetuk insonlar sifatida shakllanishlarini taʼminlashga qaratilgan maʼnaviy-maʼrifiy tarbiyaviy ishlarning holatiga ham alohida eʼtibor qaratildi. Xususan, kuchli, epchil, ayniqsa, merganlik qobiliyatiga ega yoshlarning chiqishlari, sportchi madaniyatiga amal qilishlari ham inobatga olindi.

Musobaqa kurashlarga boy, qiziqarli tarzda oʻtdi. Barcha jamoalar gʻolib chiqish uchun harakat qildilar. Musobaqa yakunida yaxshi natijalar koʻrsatgan jamoalar gʻolib va sovrindorlar qatoridan oʻrin oldilar. Unga koʻra, yozgi biatlon boʻyicha eng kuchli jamoalar aniqlandi. Amudaryo tuman oʻquv sport-texnika klubi jamoasiga 1-oʻrin, 2-oʻrin Beruniy tuman oʻquv sport-texnika klubi jamoasiga, 3-oʻrin esa Qoraoʻzak tuman oʻquv sport-texnika klubi jamoasiga nasib etdi.

Musobaqa yakunida oʻgʻil bollalar oʻrtasida yaxshi natijalar koʻrsatgan sportchilar ham aniqlandi. Unga koʻra, ishtirokchilardan Behruz Baxtiyarov 1-oʻrin, Zafar Qodirov 2-oʻrin, Jasurbek Davletboyev 3-oʻrin sohiblari boʻldilar.

Shuningdek, musobaqada yaxshi natijalar koʻrsatgan sportchi qizlardan Charos Oʻrazboyeva 1-oʻrin, Shohida Bazarboyeva 2-oʻrin, Shohida Sabirova 3-oʻrin sohibalari boʻlishdi.

Tadbir yakunida gʻolib jamoa va shaxsiy birinchilikka erishgan sportchilarga “Vatnparvar” tashkiloti tomonidan diplomlar va esdalik sovgʻalari topshirildi.

Robiya YOʻLDOShEVA.